《出羽櫻愛山純米大吟釀》:要換瓶醒酒才能盛開

(原載於:酒在超市

出羽櫻愛山

 

早幾日小編湊熱鬧跟住幾個日本酒達人去參加咗個日本酒品酒會,諗住抆衫尾可以學吓嘢,不過去到發覺嗰場嘅氣氛似聯誼酒局多過品酒會(大家當堂滴汗,各位睇到張相都明啦),但係點都好,一場去到,就算係伏,都要試晒所有酒先講! 不過可能真係環境氣氛問題,小編總係覺得啲酒唔好飲,而同行嘅幾個達人朋友更話大部份酒嘅感覺都唔同晒……

 

但就喺小編死心諗住唔會飲到好酒學到嘢嘅時候,竟然就俾小編遇到她 - 《出羽櫻愛山純米大吟釀》。 小編見到侍酒嘅姐姐將枝清酒換瓶倒落醒酒器,小編即刻遞隻杯俾姐姐要酒,一聞已經香到不得了,酒香帶有極香嘅香蕉同大樹菠蘿等等熱帶果氣息,再細心聞更會發覺有甜甜梨香同白花香! 入口香醇圓潤,甘甜嘅餘韻悠長,而且酸度同旨味亦等味道平衡,絕對係一枝出色嘅薰酒。 小編好好奇咁問身邊達人,佢同小編講因為枝《出羽櫻愛山純米大吟釀》係用《愛山》呢種酒米釀造,呢種米一般嚟講如果即開就飲嘅話不單止香氣封閉,而且更會有朕藥水味令人唔鍾意,所以需要好似紅酒般透過換瓶醒酒,最好起碼等番一兩個鐘頭,咁呢枝愛山先會盛開啦,有時某啲酒造嘅甚至要四五個鐘都唔奇呀!小編真係從來都冇諗過清酒都要醒酒,更估唔到喺咁樣嘅環境都學到嘢,真係要多謝嗰幾個達人朋友!

 
 
【購買地】City’super又或Apita有時都會見到
【價錢】約HKD500–600(720ml)
【性價比】因為酒米係愛山嘅關係,價錢偏貴,不過真係特別而且吟釀果香一流,可以一試

 
 
【日本酒小知識】

近年越嚟越多酒造用愛山米釀酒,大家知唔知呢個愛山米潮流其實喺由大名頂頂嘅《十四代》高木酒造所帶起?話說愛山呢隻米種本身喺好難種植,只集中喺兵庫縣出產,而且產量極少,更被譽為「幻之酒米」!其實以前只有兵庫縣嘅老字號劍菱酒造獨佔所有愛山米,但係因為90年代「阪神大地震」令到劍菱酒造嘅廠房受破壞,又因為重建廠房需時,喺無辨法下停止釀酒一段較長時間。但係嗰啲米農都要食飯呀,所以唯有向外求助,最終由山形縣嘅高木酒造首先出手用愛山米釀酒,而且取得空前成功更令到愛山米成為其他酒造爭奪嘅米種!

另外,講多少少啦,呢枝《出羽櫻愛山純米大吟釀》同《十四代》都係產自山形縣,除米種同樣採用愛山釀造之外,就連釀造水都係一樣採用「立谷川伏流水」。所以大家不妨試試用買一枝<十四代>嘅六份一價錢(更可能喺十份一),試試呢枝《出羽櫻愛山》,睇下會唔會飲到《十四代》嘅感覺!哈!哈!

 

 

關於作者:酒在超市

酒在超市
去到超市唔識揀葡萄酒?我哋幫你揀埋,我哋比意見你!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。