本來我只係毒毒港女,
而家我係被困過在差館三十個鐘既港女

 

2014年11月25號,下午三點。
我喺面書見到長毛俾警察抬走,我覺得有大嘢發生,而且我一定要去睇下發生咩事,所以我衝咗過去砵蘭街近麻雀館位置。前面一片混亂,乜都睇唔到。於是,我行過對面馬路即朗豪坊人行道,過咗一陣,我聞到一陣刺鼻氣味,心諗,唔通係胡椒噴霧?後來見到有人喺藝術品旁嘅鐵馬洗眼,有個叔叔走同後面嘅人前面有警察用胡椒,叫大家小心。我立刻攞手巾仔扎好遮住口鼻。

有人抬咗一箱眼罩同一箱頭盔過嚟,我自己拎咗個之後就同幾個市民一直將遞物資上去,又叫人快啲攞傘出嚟。當時上海街朗豪坊開始有動靜,但我睇唔到亦冇人講情況係點。只係一剎那,我由施洛華側門位置逼咗去隔離嘅防火門出口,我企咗喺度,想走又走唔到,我前面物資箱將我同人群隔開咗,我同我前面嘅人講,「唔好逼埋嚟,我走唔到。」但係我依然俾人塞咗喺度,究竟前面咩情況,我係一無所知。

大概分幾鐘嘅時間,人群又再騷動,開始後退,嗰陣我先知有兩排警賊戴晒頭盔攞住盾牌一直逼人退後,前排嘅人頂咗一陣又退幾步,於是我舉手重複大嗌「我想走,但走唔到。Please let me go,i cannot leave.」有個警賊同我講,「得,你落返嚟。」喺我打算放低物資箱時,警賊一手想將我扯落地下,前排市民見到即刻拉住我,唔想我俾警賊拉走,喺咁講「女仔嚟㗎,放過佢啦。」當時我跪咗喺度,完全郁唔到,兩邊都唔放手, 我大嗌「救命呀!」

第一排揸盾牌嘅警賊再逼人群後退,然後我就俾幾個警賊扯落地下,成個身撻落地下,兩邊警賊八個人望住我,由於背光,我睇唔到邊個踢我,但我係見到有一個警賊踢咗我一下右邊肋骨位置,想再踢我時有人話女仔嚟㗎女仔嚟㗎,佢先冇踢第二下。然後我就俾人「meng」住書包格硬扯我走,當時我仲訓喺地下想起身又用唔到力,因為書包有書有筆記,即係話書包「朗」住我個腰(我係冇停過嗌救命),警賊完全冇理過我,繼續拖我走直到兩個Madam夾實我,到我再睇到嘢時,我已經行喺施洛華側門,我向後望咗一眼,警賊繼續逼人後退。

到我坐喺度時,兩個Madam夾住叫我唔好郁,反扣我兩隻手,攞索帶cool住我。 我再重申一次,我書包係好腫的,而且我隻手又短,其實係唔夠位包圍埋個書包的。 我感覺到膊頭就快斷咁滯,我話,「唔得,我隻手好痛。」而且我右手俾佢cool得太緊,痛上加痛。搞咗一輪,我先可之間以將手放喺書包同背脊,稍微喘息一下。

記得我拉上旅遊巴時,我見到賣裝修嘢嗰兩條街企滿晒人,屌,佢哋非法集會,佔領道路wor。而最令我心寒嘅係我聽到有人拍手歡呼,我喺巴士坐咗唔係好耐就已經滿晒人,基本上係一個CID一個市民咁嘅pattern。到咗長沙灣警署,等咗半個鐘先落車,因為入面太多人,冇位俾我哋入。

 

入到差館,整幾塊版就間開咗幾個area,搵個位開始坐,食飯,等打電話搵律師。 直到九/十點咁上下,我同兩個男仔一齊見律師,喺呢時候我先知道有人比我更無辜傷得更重。C姓男仔為咗救人俾警賊拉,有人跌倒,佢唔想有人踩人事件,結果被救嗰個冇事走得甩,佢就俾警賊打到内眼角流晒血。佢問我,「我係咪好傷?其實我冇照過鏡,你哋好似我驚咁。」

我話,「係呀,你隻眼好傷呀,流咗好多血。」結果佢去咗醫院驗傷,有冇投訴警賊我就不得而知了。N姓男仔一樣被警賊打,禁頭落地下再加踩大脾,傷痕應該就睇唔到,我俾人踢都冇傷痕睇得到。 同律師傾完之後落口供打指模影相。聽CID同律師講,冇咩事就好快走得,以上,係25號發生嘅事。 其實之後就係無限等待。。。(ps:我知道最長扣留時間係48小時,不過真係好難過。。。)

26號凌晨,CID將我交低俾軍裝就走咗,我返去繼續坐。呢次,我遇到一個女仔,非常男仔頭,路過旺角,俾警賊老點去對面街,見到有人跌底,扶佢,然後就被砌-夾住個佢頭狂憾地下,額頭同塊臉都腫咗,行路都拐下拐下。女仔嘅朋友想救個女仔,一樣走唔甩,罪名係「阻差辦公」。

個女仔被帶走後,又嚟咗個男仔,佢被懷疑「襲警」同「非法集會」,原因係佢背對住警賊扶人起身時掂到個警賊,跟手就俾警察禁落地下,砌咗一輪先上警車,行路都「桔」下「桔」下。

跟手又嚟一個男仔,又係路過,扶人起身,被警察打,上警車。

 

之後我哋都冇嘢做等保釋,就圍埋一堆傾下計,互相支持下咁。我先知道早些少時候見到有個圍住圍裙阿嬸係咩人,原來佢就係前腳喺茶餐廳行出嚟,後腳就俾警賊拉咗嗰個人!當時個個都聽到O晒嘴,連茶餐廳阿嬸都唔放過,警賊都唔係人嚟嘅!大家越講越火滾,明明咩都冇做,點解會喺差館鳩坐,仲要驚屋企人擔心驚被人告要上庭。我哋唔敢同阿媽講我哋俾警賊拉咗,都係搵fd或細佬妹。再者,我見到有人身上嘅衫扯到爛晒,正常一副眼睛應該係有一對鏡片,依家得返一隻,再衰啲就執得返鏡框,仲要「咩」晒冇得救,WHAT THE FUCK!財物損失,湯藥費,精神損失真係想同警賊逐樣計。我亦都好好奇「適當武力」呢個詞係點用的。許鎮得狗賊麻煩你出一出嚟同大眾解釋下。

餓餓哋,我開咗包糖出嚟俾大家補充下糖分,一開,散晒,冇一粒完整嘅。回想返,好彩有個書包幫我頂一頂,如果唔係,撞親條腰骨都講唔定。當戰友休息緊時,我就點訓都訓唔著,攞住張全家福望呀望。唉,我真係好想返屋企,好想見到媽媽,亦都好想知出邊發生緊咩事,與世隔絕咁多個鐘,想收風,只有聽差佬傾計同聽間歇性電視直播--25號夜晚拉咗80幾個人,紅磡,北角﹑葵涌警署已逼爆,黃之鋒被拉,彌敦道通返。。。

下晝唔知幾點,我同一個女仔先入臨時羈留室,然後嗌人出嚟將你身上嘅物品逐件pack好,再入羈留室,一人一格。最低能嘅係要除鞋帶出嚟然後再叫你著返自己對鞋,但係入到羈留室要除鞋,咁做乜鳩要除鞋帶先!?on9無極限囉~穿鞋帶係好晒時間架,柒頭!仲有,從佢哋辦事方式嚟睇,班警賊係好團結,有咩事都互相幫忙,唔該前唔該後,真係以為自己睇「愛回家」咁溫馨。那邊廂,西口西瞼對市民,當正個個係汪洋大盜。屌,我真係良好市民嚟架,定期捐血者,見唔見到我個徽章呀,撚樣!而最撚賤格係攞走我副眼鏡放喺我隻鞋入面,屌屌屌!

 

入到羈留室,對住四面牆,四周圍冷冰冰,張毛氈仲臭過警賊個名,所以都係鋪張氈坐。坐坐下又諗起阿媽,真係忍唔住喊出嚟!我已經超過廿四句鐘冇返屋企,成世人都未試過唔返屋企,冇錯,係未試過!我知阿媽實擔心到訓唔著,而且心裡怪我走去旺角。其實我唔後悔去旺角,我做錯咩啫?!人行道係俾人行架啦!無啦啦整條封鎖線喺度,前後包抄圍堵市民,見人就捉,只要就手。呢次係旺角,咁下次係觀塘呢?咁全香港人個個都唔敢出街啦。

我望住個呢扇所謂嘅窗亦只不過有個窿搵密密麻麻嘅鐵網封死咗,又望下出面個唔識郁嘅鐘,心裡又好撚絕望,警賊究竟係咪要告我呢?留我喺羈留室即係咩意思呢?佢哋會唔會攞舊small potato嚟祭旗?我有眼罩喺身會唔會成為證據呢?依家幾點呢?

以上嘅疑問一直喺我腦海打轉,於是乎,我祈禱,我問個天,究竟世上有冇公義?我係咪住喺香港?然後,我諗起海闊天空,諗起黃家駒,我又唔撚驚了。唱咗好多次「海闊天空」同「do you hear people sing?」,就連「少女的祈禱」都唱埋。冇咩好做,就試下打坐,咁好似時間又冇咁難過了。嗰陣有Madam入嚟問我有冇一千蚊喺身,我話冇,得四十。佢又問搵屋企人得唔得? 我話得。 咁佢就走咗去了,我繼續坐。又唔知過咗幾耐,Madam行入嚟開閘叫我走。26號夜晚十一點三十九分,我終於獲得自由,保釋外出。

 

一行出差館,三層鐵馬擋喺門口,屌!你班契弟真係好撚驚好撚心虛。

 

作者:少少毒的女學生

港女心,大人身,不拜金

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 92121
Date: 2014-11-28 01:40:57
Generated at: 2019-11-22 01:10:14
Permalink: https://www.vjmedia.com.hk/articles/2014/11/28/92121/本來我只係毒毒港女,而家我係被困過在差館三十