14個情人節留港平價啪啪攻略 第3個必睇

(photo via cc Flickr user Trang Angels)

(photo via cc Flickr user Trang Angels)

 

事先聲明

呢篇文係獻俾天下有港女跟身又或者有對象嘅窮巴打。
如果你冇港女跟身,你可以bookmark定,然後下年再睇吓有冇需要。

如果你連對象都冇,輔仁仲有好多文可以睇; 快手Click去其他文章,唔好再睇落去。如果唔係,真係會Sad死自己。

 

有港女跟身嘅窮L望住個日曆,就知道距離情人節得番唔夠一個禮拜。

世界上有女嘅窮L都要諗點過情人節,偏偏香港嘅有女窮L要過情人節,比世界上任何一個角落嘅窮L都要難過。

如果你有自己間房,即使係劏房都好,你已經唔洗煩無房啪啪啪,你亦都唔洗再睇篇文。但香港偏偏冇空間俾人去啪。主場有老母,作客有伯母,點都係要死出去。窮L要有空間,都係要錢,仲要同城棚人一齊搶時鐘!萬一一個唔好彩撞個EX同另一條仔一齊喺個狹窄時鐘大堂排隊,真係唔知到同唔同襟弟Say個HI ,轉頭再出番Lobby 交流心得好。

有此及此,我就送幾招過各位輔仁窮L,令到窮L們過情人節都唔洗大出血。

 

  1. 有得提前或者拉後,肯肯定要做

情人節正日,所有嘢都要同巴打搶,仲要所有餐廳花店都例牌加價,貴到HIHI。今年情人節正日,仲要撞正酒店最貴嘅星期六。所以,如果你個麻煩港女肯提早一日慶祝又或者推後一日慶祝,就一定要做。

唔信?以SOHO飛的落去唔點跳錶嘅法國佬IBIS酒店做例子

2月13日住一晚 690HKD
2月14 日住一晚 750HKD
2月15日住一晚 540HKD

既然2月15平到同去百佳起個雙鐘再過夜差唔多,又何必一定要迫呢。

即使揀2月13過一晚,第二日CHECKOUT去上環小店老店食BRUNCH,之後去AIA 又或者年宵打發,咁又成功過咗情人節,係咪幾好?所以,有得唔洗做老襯就千祈咪做。

 

  1. 提前訂房(係,即刻做)

好多酒店有提前一星期、兩星期甚至提前一個月Book房優惠。酒店房越近同日,就越係貴到入肉。所以唔好係條女面前扮有錢佬,啪果陣就牙咁痛。快手去酒店網站搵房啦。

P.S. Google神有時會幫你搵到訂房網站或者酒店官網Discount Code,請多加利用。

 

  1. 果日先訂平酒店房

歡好嘅嘢,唔係吓吓都係Plan定。Plan 咗但臨場唔做又白洗錢,但唔Plan又怕果日冇地方。咁點算?

幸好受惠於強国自由行,香港過去十幾年多咗好多中價酒店。好多時果晚賣唔晒房,就會特價放出嚟。有個手機app叫做Hotel Quickly,專門搜羅即晚吉房,即book即住。呢個app簡直係情人節同落夜場旁身必備。

 

  1. 搵間有煮食爐嘅酒店房或者Service Apartment

點解要搵間可以煮嘢嘅房?因為可以玩煮飯仔,唔洗同街上一堆男男女女焗食一式一樣嘅情人節二人餐,仲要堆單貴一貴個半鐘就俾人催交檯。煮飯仔豐儉由人,煮得嘛嘛地唔係問題,重點係煮飯仔嘅過程。雖然房價一定比中價酒店貴,但係慳番果筆貴夾唔飽情人節二人餐,條數都喺番度。

 

  1. 搵間遠一遠又或者專Serve自由行嘅酒店

(又係受惠於自由行国策)好多住宅區、 工廠區又或者山卡拉地方附新都開咗中下價酒店。新蒲崗、牛頭角同觀塘有幾間呢啲嘢自由行酒店;青衣、將軍澳同汀九橋底又有專門困住大陸團嘅酒店,價錢尚算相宜。如果唔想同強国團友爭食酒店免費自助早餐的話,黃金海岸同天水圍兩家遠一遠都係選擇。

 

  1. AirBNB

呢個真係唔洗我多講,如果想試吓非酒店又有特色嘅地方,用AirBNB搵條證你會發現新大陸。個人極力推薦遊艇房同叫天不應叫地不聞嘅澄碧邨。

想知係咩地方?快手去AirBNB網站又或者Download個 app睇吓(我冇收AirBNB錢做寫手)。

 

  1. 渡假屋

其實weekend租渡假屋,分分鐘貴過住酒店。之不過,長洲部份渡假屋有海景雙人浴缸。要背水一戰的話,就真係焗住。

之但係,冇人話一定要入長洲俾人當做水魚嫁嘛,Right?長沙、貝澳同塘福都有渡假屋,價錢仲平過長洲一個價位。而家果頭仲有外國露營車渡假屋,又係慳咗食餐果筆,可以煮飯仔。

 

  1. 行維園年宵 然後唱夜K

K房都可以啪?Why not?話說維園側果間K,啲房有獨立廁所,尚算乾淨清潔。之但係K 價貴,就當然係等到貓頭鷹時段先好入場啦。之不過成晚流流長,點樣可以打發時間?好簡單:去大坑食個分子雪榚,或者去Paul Con 側邊條街食綠茶甜品,再去維園年宵迫幾個鐘,咁就夠晒鐘去K房啦。

不過,K房嘅嘢先到先得。請提早用app 或者電話book房,反正最後失敗no show 又唔洗俾錢。

 

  1. 租車

車震呢味嘢,唔理男人係HEHE定HESHE,都會有嚮往。如果你有車牌,就租番一晚車啦。兜去西貢定赤柱都係睇係銀包有幾大實力,同埋你點樣package個旅程。

食完甜品,上飛鵝山睇夜景定去北潭涌睇星星,一切盡在你對腳控制之內。然後揸埋去暗角,就可以開始入正題,慳過住酒店加大餐好多。

之不過呢,大帽山就太多人照田雞;而水塘就有慈母巡邏(聽聞政界有對男女去水塘邊車震被慈母撞破,好似係),所以都係唔好去啲大路地方又或者太近邊境禁區,以免啪人不成卻被開菊。

 

  1. 去露營

有冇睇過《早熟》?睇過就明我講咩。

之前佔領果排,幾多人一番熱血買咗帳篷同其他露營用品。就算你自己冇買,又冇朋友去到Poly個貨倉拎貨,咁你身邊總有一個兩個黃絲有營可儲掛?

個人覺得啦,貝澳、 大帽山一帶同石壁營地係算方便。如果好有時間,入去大浪西又或者塔門都係選擇。

至於點樣游說到港女冬天去露營?睇星星可能橋太舊,所以買熒光指環影time-lapse 上ig做理由都應該站得住腳,好似係。

 

  1. 渡假營

如果你咁好死,搵到一個朋友充撐人數又或者一對又係要房啪嘅一對,渡假營呢個Option簡直係平通街。

鯉魚門渡假村為例,營費位位50,再加膳食費3餐合共74蚊。平到裂開嘅Option,去邊度搵?而且,渡假營有空位的話,係接受10日前電話申請候補宿營的。之但係,呢個香港只係得鯉魚門同麥理浩有得最少3人成營,所以我頭兒話要搵朋友充撐就係咁解。而更加不幸嘅係,而家麥理浩做咗隔離營唔收人,鯉魚門營餐廳又裝修緊,所以真係報鯉魚門的話大家要考慮考慮。

 

  1. 殘廁或育嬰室

你唔係有錢仔,而你條女都唔一定係Coffee。不過,你都可以有殘廁Gathering 嘅享受。

自從Gathering事件之後,好多商場都開始要問Reception 拎key card先可以用殘廁,搞到十分唔方便。之不過,呢個世界仲有啲酒店大堂殘廁比較隱密,夜晚又冇清潔工;呢啲酒店通常都係連接商場,四通八達,大家可以Google 一下。

至於最終極嘅育嬰室,就當然係機場啦。橫掂機管局(講大話)講機場嘅閉路冇錄影功能,洗驚咩?

 

  1. 沙灘暗角

情人節夜晚有成16度,吹微風。唔怕太激太凍的話,青山公路沿岸有好多沙灘。由於冬天嘅沙灘係冇人當值,慈母亦都冇心機去行沙灘照田雞。所以呢,果堆沙灘樹下真係好選擇。而你需要嘅,就係去宜家買張20蚊沙灘席。

 

  1. 記得戴套

搞出人命,就點都唔平!所以,記得唔好慳果10幾廿蚊。

 

祝各位出入平安。

 





關於作者:蔚藍

則留言

閱讀後覺得好,請多多讚好及分享~:)

其他熱門文章

  • 愛男友,請愛埋佢屋企人 by 小盛女
    「有無人要食麵啊?幫你地夾。」Mike大喊。「使乜幫佢地夾,佢地無手o架?」Brenda黑面說。Mike即時怔了一怔,他從沒想過這麼簡單的舉動會令Brenda爆seed。「都係順便姐,大家一家人,我幫你夾埋喇。」Mike盡量壓抑自己的情緒,…
  • 應如何對待男友嘅朋友? by 小盛女
    晚飯後她又教大家玩大學時O-Camp的集體遊戲,很快便和Mike的朋友們混熟,特別是男性朋友。玩遊戲少不免有些身體接觸,Mike都一一看在眼裡,他最怕就是看到這些疑似抽水的行為,出聲唔係唔出聲又唔係,自己女友又鬼死咁主動,同人玩得鬼死咁盡興…
  • 【偽影評】 《棟篤特工》:電影的隱喻? by 馮志豪
    作為大學主修哲學的子華神,不少演出都是借故事諷時事,甚至有時直接觸及政治神經,例如他在楝篤笑中曾經說過 : 「知唔知一國兩制最偉大地方係乜?就係肯承認佢自己個制真係嚇親人!」和「全港市民熱烈慶祝『收返』!」等,令中在笑中帶來一點思考。…
  • 我可以肯定,大部分人並不適合一個人旅行。 by 達米安
    獨自一人在舉目無親的地方會令人變得緊張,因為無論遇上甚麼難題,發生了甚麼意外,都不會像在家鄉一樣有家人朋友的支援,也沒有了對公共系統的熟悉,所有後果都得自己承受。更甚者,當在語言不通的地方時,連如何向路人求助,都可以是一個難題。只要不是太缺…
  • 25歲以後 by 小盛女
    當我永世做Marketing,由assistant升到officer再升到senior又甚或是咁好彩升到manager,人工都可能只有2、3萬,日日做到隻狗咁,到頭來首期都儲唔到,真係諗起都一額汗,最後我想了十萬九千次,只有兩個辦法可以解決…
歡迎讚好我們的facebook page,免費資訊源源送上。