Celine 老母扮無辜都唔好太誇好不好?

Celine楊鎧凝《童萌時光》相片集介绍:原定4月復活節Celine去韓國參與一旅遊書拍攝,最後關頭計劃被取消了。Celine 媽咪告之出版社唔緊要 ,因是假期會如期出發去觀光 。出版社靈機一觸;日本有攝影大師”川島小鳥”的《未來baby…

Posted by Celine 楊鎧凝 on Monday, June 29, 2015

 

見有人講起Celine老母,不如我幫大家整理下啲時序啦。♥

 

 

28/6/2015(日)19:39
【on.cc東網專訊】出咗一篇題為〈楊鎧凝殺入書展 化身萌神撼性感女!〉嘅報道,內有寫真集其中九張相。

29/6/2015(一)15:23
【Celine 楊鎧凝】fb page貼咗寫真集其中一張相,簡介《童萌時光》,但冇提及出版同購買資訊。個post一出已經有好多fans留言話好期待、好想買,問係咪書展有,【Celine 楊鎧凝】fb page冇直接回應,但有like晒每一個comment。15:45,一個叫Arthur Lam嘅人留言貼咗28/6嗰篇東方報道,【Celine 楊鎧凝】fb page都有like到呢個comment。

9/7/2015(四)20:23
【Celine 楊鎧凝】fb page貼咗四張Celine韓服造型嘅相,簡介多次《童萌時光》(同一段c&p),同埋講咗14/7同17/7嘅宣傳活動資訊。【Celine 楊鎧凝】fb page一如以往好勤力咁答fans問題,去到當晚凌晨00:02仲答緊人本寫真集有128頁。

10/7/2015(五)
明報娛樂版C2全版為〈6歲楊鎧凝賣萌突圍 0靚模「胸」群襲書展 50歲羅霖挑機未驚過 〉,將雞排妹、羅霖、一班我唔識嘅女人同Celine放埋一齊比較。呢版嘅女人都係著三點式嘅(有bikini有underwear咁啦),係事業型女性,其中一個事業線仲夾咗枝甜筒,而Celine都有一張疑似著住underwear影嘅相。

10/7/2015(五)09:49
【Celine 楊鎧凝】fb page喺前一晚個post度留咗個comment,以「Celine媽咪」身份多謝明報報道,感慨啲媒體成日拎Celine呢本寫真同其他人嘅寫真比較,強調Celine嗰本內容絕對健康。有個叫Cherry Ho嘅人喺13:17留言貼咗明報OL網條link(即係10/7嗰篇報道)。Comment嘅thumbnail大大隻字寫住「6歲楊鎧凝賣萌突圍」,【Celine 楊鎧凝】fb page都有like到呢個comment。

14/7/2015(二)13:39
【on.cc東網專訊】出咗一篇題為〈楊鎧凝寫真疑似走光 阿媽即黑面〉嘅報道,Celine媽咪被問到寫真集有疑似引人遐想相片,表示愕然,強調只係啱啱睇到啲相,然後黑面嬲嬲豬。

 

 

其實我本身對Celine呢個細路女就冇咩感覺,唔覺得佢特別可愛(fb有出樣有fanpage嘅小朋友黎講呢,我係鍾意台灣嘅小羊小豬twins迷路爆走兄弟嘅),我亦都唔係特別鍾意狙擊呢啲發「星媽」夢嘅老母(咁我覺得得意咪睇囉唔鍾意睇咪hide all囉)。只係今日見網友又講起,有啲奇怪點解我兩個星期前已經睇過其中一啲相,而個童星阿媽話自己尋日先啱啱睇。於是好奇去望望【Celine 楊鎧凝】fb page,見到佢推書竟然咁講:「原定4月復活節Celine去韓國參與一旅遊書拍攝,最後關頭計劃被取消了。Celine 媽咪告之出版社唔緊要,因是假期會如期出發去觀光 。出版社靈機一觸;日本有攝影大師「川島小鳥」的《未來baby》寫真集,為何香港從來末出版過任何《小孩子》類型的寫真集?之後攝影師在旅行過程中捕捉了Celine的『快樂』,把孩子最自然真摯的一面拍攝了下來,改寫了香港寫真界的歷史…..」

喂!!!!!!川島小鳥呀!!!!!!你知唔知邊個係川島小鳥?!稍為識少少攝影嘢嘅文青(都話我之前係咯)都會知道川島小鳥幫朋友女女影嘅寫真集《未來ちゃん》!!!

我睇到個出版社拎Celine本《童萌時光》同川島小鳥本《未來ちゃん》相提並論,真係頂唔順,所以先會走去考多少少古。但主因都係因為今日食飽飯冇嘢做,而考古係我嘅專長…

又話說我考考下古,發現嗰個喺29/6已經貼咗東方報道喺【Celine 楊鎧凝】fb page嘅Arthur Lam,就係Popcorn Production & Bubble嘅Sales & Marketing Manager(佢fb寫囉),呢排都有輕輕推下Celine出寫真嘅資訊。而由於我個人真係太得閒嘅關係,我見到Arthur Lam上年有宣傳過《Bubble寫真月刊》嘅三週年party。上年書展嘅「Bubble & friends寫真祭」佢都有宣傳。

我又輕輕Google咗一下,《Bubble》嘅出版社係Popcorn Publishing,攝影師係Ronald Lam,亦即係Popcorn Production老闆;自稱「把新人拍成巨星,把𡃁模影成超模…自認係影得事業線最多又無乜事業嘅攝影師,如何保持對女性身體的熱衷度,成為RONALD不斷探索的課題」。Celine寫真《童萌時光》嘅出版社係Popcorn Publishing,據傳媒報道,攝影師叫Ronald,姓乜我就唔知了。

拿,我真係唔係向可愛妹妹同佢媽咪抽刀,真係食飽飯冇嘢做,先會睇下又一啲睇下又一啲。(「網民」係咁架啦,廢青黎架嘛,除咗匿喺電腦後面同人圍爐仲有咩做啫…)我就唔會話人哋媽咪賣女求榮、為咗錢推個女影疑似hard candy嘅(事實上啲相勾唔起我任何歪念或慾望,我覺得還可以啦,但真係唔係川島小鳥嗰種層次囉)。不過如果俾得個女出黎拋頭露面,長期生活喺鎂光燈下(雖然我唔會排除個女真係表演慾好強而阿媽覺得阿女開心就俾佢玩下),而個fb page講緊有223k fans,我諗真係要小心選擇出版社同攝影師呀~~~ 唔係話人哋唔好,人哋喺香港寫真界好似都算出名(我唔識啫,我見有唔少網友有like《Bubble》架 ♥),不過如果以前人哋出開嗰種寫真,風格、方向可能唔係一時三刻變到架嘛,同埋落人口實、招人話柄就唔好啦。Celine得六歲咋,天真無邪邊玩邊影嘅相俾人話似hard candy,無論係做父母嘅自己聽到定係Celine大個聽返,都唔係咁好受呀。>_<

 

(後加:墳場新聞發起聯署,如欲參與請細閱並填妥資料)

 

作者:Grace

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 111366
Date: 2015-07-16 00:19:41
Generated at: 2020-09-22 23:53:50
Permalink: https://www.vjmedia.com.hk/articles/2015/07/16/111366/celine-老母扮無辜都唔好太誇好不好?