天才眼中,你只係一個著熱褲跑步嘅傻仔

 

生命當中,總會遇到某些人。佢擁有某種技能,係你無論點努力都超越不了。

以前的中學時期,隔離班有個同學跑得好快,幾乎每年陸運會都破大會記錄。

不過對於佢黎講,跑步只係其中一種令佢獲得成功感嘅興趣。

 

而另一邊廂,我班亦有一個同學好鍾意跑步,由中一就加入田徑隊,因為幾年我都同佢同班,所以好清楚佢付出咗幾多努力。

有幾努力?幾乎每日放學都練跑不在話下,佢仲係唯一一個唔理旁人目光,每次體育堂穿著標準賽跑短褲嘅男同學…

條褲仲短過啲熱褲喎大佬!但係佢唔理!佢只係想跑快啲!

 

可能大家都見到佢嘅努力,所以全班都好支持佢。

頭幾年,佢都輸咗畀隔離班…個結果仲要相差好遠,可以話係慘敗。

但佢無放棄,佢話除咗跑步我無嘢叻,所以一定要贏。於是佢開始搵私人教練,喺跑姿同起步下苦功。

 

終於喺中四嗰年,起步一刻,佢一支箭咁彈咗出黎,起碼快其他人成個身位。

當下全場都爆炸式歡呼,因為從來無人試過超越隔離班個同學。

但係好可惜,未跑到一半,佢就畀人追返轉頭,最後只能夠拿亞軍…

 

我到而家仲非常深刻,當時佢企喺亞軍台上喊到成個豬頭咁。

當佢返到黎觀眾席,其實大家都眼濕濕,佢滿臉眼淚鼻涕咁同我哋講,下年佢一定會贏。

 

到咗中五,佢讀書成績好差,知道自己一定升唔到中六,所以嗰年陸運會係最後一年。

佢搏晒老命咁去備戰,最後…

隔離班個同學竟然無參加到任何項目。點解唔參加?佢話溫書好攰,唔想跑。

結果,好理所當然地我班同學好輕鬆咁拿咗冠軍,不過佢企上冠軍台,連一滴笑容都無。

無人去質疑隔離班同學係咪怕輸,因為大家都有眼見,佢根本唔在乎個冠軍,由始至終亦無人見過佢練跑。

 

以前我唔明,點解唔跑?點解唔尊重別人嘅努力?點解無體育精神?既然唔在乎勝負,點解唔跑?

 

出到黎工作,我終於都明白。有好多時,無論你付出幾多努力,工作能力幾出色都好,

總有人靠關住關係,靠父幹去爬喺你頭上。而喺呢班有先天優勢嘅人眼中,你只係一個堅持著住熱褲跑步嘅傻仔。佢根本唔會在乎你嘅努力,呢個就係所謂嘅人生。

 

的確,人生會遇到好多人輕輕鬆鬆就跨過所有難關,亦一臉不在乎你堅持嘅努力。

但無辦法,因為做乜都改變唔到事實,

你只可以講句…

人生,我頂你個肺!

 

 

關於作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。