食香港放題就同食妳呢啲死港女無分別

 

所有朋友圈中,都至少存在住一個港女,港女is everywhere。話說有次朋友生日出黎食飯,whatsapp group內有個叫Macy 嘅港女就硬係要食日式放題,話生日送壽司想試吓…

我心諗壽司蛋糕咪即係黃子華阿爺用燒味壽司,阿強再砌返碟燒味飯一樣!…但因為生日𠴱位朋友係Macy隻二等兵,佢講咗一句「我咁大個仔都未食過壽司蛋糕,好特別啊。」

不過我朋友點都估唔到嘅就係,Macy竟然帶埋佢個男朋友出黎食飯…

佢男友係一個黎香港工作幾年嘅日本人,叫井上乜乜(唔記得),唔知點解會搭上咗Macy,呢位日本男友坐低全程都無講過嘢,淨係不斷點頭,係係係咁…

直到第一輪點嘅刺身船黎到,井上成塊面就即刻青晒,個樣仲有少少反胃。我好奇問Macy :「平時你男友喺香港食乜?係咪都係排一蘭?」

點知Macy話佢知道男友食唔慣香港嘢,所以每餐都帶佢黎食呢間放題…貪佢有齊日韓台泰各式美食…

嘩!唔怪得日本男友個樣會咁樣,當Macy夾起舊三文魚餵到落井上嘴唇邊,井上就突然好大力咁拍枱然後企起身大喝一聲「夠喇!」

「食香港放題就同食妳呢啲死港女無分別!」

全場人即時靜晒,井上就開始用wyman扮托也哥嘅口音講放題與港女有乜相同。

 

香港人食放題好似前世未食過飯咁,就算早幾個月前訂定位,當天準時到達,都係要排隊…
仲要排成個鐘先入到去,咁請問訂位黎做乜呢?訂位仲有乜意義?

情況就好似我約妳出街,明明約妳十二點,死都要點半鐘先捨得出現…我以為妳唔慣太早起身,所以下次約兩點,點知妳又三點半先出現,咁約黎有乜意思呢?有次我發脾氣,妳竟然答我:「我就係鍾意你等我~嘻嘻~」

終於入到間餐廳食嘢,叫一大堆壽司刺身炸物,但個廚房佬唔知係咪有數字認知失調,無論我寫個數量係幾多,黎嘅真實數量都係唔準…

寫10件,佢嫌你太多畀4件你食…到你飽飽哋,想叫多2件埋尾,佢又畀返5件你食。就同妳呢個死港女一樣,我永遠都捉唔住妳個心諗乜。

次次去街提議食乜,又話畀我話事,我話想食拉麵佢又話要排隊,食泰國嘢又怕辣,食台灣嘢又話熱氣…

最後都係去咗食放題,點解?因為放題有齊拉麵、泰國嘢、台灣嘢食…!

最慘係毫無服務可言,侍應好似弱視咁,永遠睇唔到我舉手…到最後終於都叫到侍應,點知我都未開口,佢就話「得得得!幫你催咗廚房做緊,好快出黎!」我其實想要杯水咋…

妳就同個侍應一樣咁傲嬌!妳只會覺得:「係啊!我係港女啊!我認㗎喎,我都係想搵個人鍚我啫,有乜問題?」

但無論間放題食物同服務有幾差,有食過都係要埋單。為當初貪圖「任食」而負上責任。香港明明有好多好嘢食,點心、打邊爐、茶餐廳…點解!偏偏係都要帶我黎食放題啊!!

井上已經完美咁將放題同港女混為一體,再將佢心入面嘅懊悔發洩出黎。

 

不過有件事佢講得好啱,我諗放題侍應唔止弱視,仲係弱智!喺呢個咁尷尬嘅時刻,個侍應竟然拎個壽司蛋糕出黎!

可能侍應見到井上企起身,侍應就一邊棒住個壽司蛋糕對住佢唱生日歌…

生日歌唱完,全枱人無人拍手掌,侍應交足功課之後亦收返起個笑容急步離開。

點知呢個時候,井上再補多句:「我頂!以後唔好叫我Oppa或者小鮮肉啊!」之後井上就離開咗間對佢黎講係惡夢嘅放題。

「不如…食蛋糕啦,Macy妳唔係話想試壽司蛋糕咩?」生日嗰位朋友作為佢隻兵,好盡責咁幫女神打完場。

「食食食,食乜鬼啊!咪又係一碟用壽司砌出黎嘅碟頭飯…」

說畢Macy亦都跟住離開,最後只係剩返我朋友拎住個壽司蛋糕但無人食…

 

 

關於作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

則留言

閱讀後覺得好,請多多讚好及分享~:)

其他熱門文章

  • 我一直以為我們是十年好兄弟,但為甚麼去旅行你要帶安全套? by 蚊子
    十年了,我們之間沒有曖昧,更沒有愛情。我們就像人們所說的那種不存在的男女之間純粹的友情,我們會吵架、會打架、他會跟我說如何「搞掂」那些女仔,我會笑他賤格⋯⋯我們什麼都能分享,無論相處多久都覺得只會是「哥們」,他也曾經向我爸爸敬酒:「uncl…
  • 識揀另一半,人生已經贏左一半。 by 窮家有道——窮一生
    其實呢個題目我想寫好耐,因為講到理財,其實係一件終身事業黎。我教你開支點減都好,都係一時既野,個個人既生活節奏都唔同,套武功都要有所變化。一項咁漫長既任務,當然係由陪你最長時間既人開始!老豆老母冇得揀既,好似窮生咁,出身係單親家庭,家母唔係…
  • 烈女 by 亞愁
    聽説她三十歲那年嫁了個青年才俊,不夠兩年就離婚了。我記得她說過,女人一定要在三十歲前嫁一次,結果她做到了,儘管婚姻是如此的短暫。…
  • 偷食的人有難了:我用GPS追蹤男友(一) by B612
    從來都唔會主動講密碼俾我聽,就連喺我面前解鎖手機都會遮遮掩掩。唔係身有屎嘅,怕咩俾人知?佢越係神神秘秘,我就越覺得佢想要嘅,唔止係私隱咁簡單。果然,一齊咗未夠兩年,就發生咗一連串令我哋無辦法繼續一齊嘅事………
  • 偷食的人有難了:我用GPS追蹤男友(三) by B612
    有時有啲嘢就係咁。你以為自己距離做個壞人、變態佬、或者跟蹤狂好遠,又點會估到有一日,你會歇斯底里地不停check自己男朋友嘅所有電子用品。…
歡迎讚好我們的facebook page,免費資訊源源送上。