我曾經都想做個MK仔,玩盡天下少女心

 

(photo via cc Flickr user Nattawong)

(photo via cc Flickr user Nattawong)

 

「你都廿歲啦,仲唔拍拖,我會擔心架。」

說這句說話的人,叫做阿見,正所謂情場鬼見愁,你問我點解佢唔叫阿愁,原因係佢不論男女,口頭禪都係:「哎,我好想見你啊。」,磁性沉聲,甜到入心入肺,好快就變咗係你想見佢,從來唔會愁。

冇錯,頭先果句說話,係佢喺我屋企一路同我打winning,一路隨口講出嚟,佢已經將溝女嘅招數,變得渾然天成,唔識佢仲以為佢溝緊我。

而我俾呢句說話,搞到唔小心own goal咗,怒瞪住阿見,佢扮cute咁V字,忽然間好想將佢果一把MK長髮斜陰,一下子剃光。

不過,佢MK得嚟又唔係好MK,因為佢天生靚仔,濃眉大眼,身材修長,有啲似走韓風嘅鄭伊健,再加埋把糖尿嘴,剃光頭都冇所謂。

 

我隨口回應:「你都廿歲啦,仲唔結婚,我會擔心架。」

「喂喂,我同你一樣大咋。」阿見把聲幾時都好溫柔,但又冇GAY嘅感覺,實在太神奇。

「係囉,我都講緊結婚,你仲講緊拍拖咋。」阿見露出迷人的笑容。

我見人少少,也不禁嘆一口氣道:「你估我想同你鳩FingFing打機咩,寧缺勿濫丫。」

「NONONO!」阿見搖著頭,「你思想有問題,未試過又點知岩唔岩呢?」

吓喔咦哦嘩!?我思想有問題?

我不可置信地瞪著阿見,而佢好似躂著咗個制,開始發表獨樹一幟嘅偉論。

「女人,就好似一間餐廳咁,入到去食番餐先知好冇味。」阿見舔了舔嘴唇,微微一笑道:「如果好食,咪長期幫襯,唔好食,就下一間,好簡單。」

「又好似幾有道理喎。」我隨口應道,只專心著球賽,今次我用阿仙奴,現實嘅失敗,我要係PS4上狠狠奪回面子。

可惜嘅係,當奧斯爾傳俾基奧特,門前一射,阿見條粉腸突然間禁暫停,漠視我嘅憤怒,無視我嘅咆哮,小心翼翼拎起個電話,睇清楚邊個先起身再講:「May bb?哎,我好想見你啊。」

 

那一聲bb,讓我毛骨悚然到至今。

 

等到佢番嚟,佢春光滿臉道:「喂,我今晚唔同你食飯喇。」

「咁又係,陪條女要緊丫嘛。」我急忙回應,唔想俾佢知道基奧特離門兩碼炒飛機,「不過,打埋呢場先啦。」

「唔打啦,我要去第二到搵個朋友。」阿見著起大褸,忽然微微一笑:「仲有,岩岩果個唔係我女朋友呢。」

原來,佢岩岩唔只傾一個電話。

我呆了一呆,努力想著佢上個月提過佢條女,係叫咩名呢?

Ada?Cherry?Doris?Nina?Tracy?Kelly?Yuki?Yumeko?Esther?TingTing?PoPo?Winnie?Siu Yan?根本系梨?Kristy?Jennifer Lawrence?…

「我冇咁仆街嘅,我同Funny 散咗喇。」阿見似乎知道我諗緊乜,走到全身鏡前Gel緊個頭。「我唔鍾意佢太乖,都唔funny 嘅。」

「咁樣好咩?」我不禁衝口而出,「每個月拍一次拖,好咩?」

「都話你思想有問題啦。」阿見搖頭道,「一間餐廳食一個月,好快厭。」

「點同!?」我有點怒氣,罵道:「女人唔係餐廳…..」

「所以你咪冇拖拍囉。」阿見一副孺子不可教也嘅模樣,「你太認真喇,輕鬆啲,你咁樣,冇女埋身架。」

 

我拎起手制,再次開波,不過,今次係單機。

 

唔知阿見係覺得自己語氣有啲重,定係可憐緊我,佢搭著我肩頭道:「其實我而家落club,不如….一齊啦。」

「我想打機。」我搖頭,淡淡道:「你去玩盡天下少女心啦。」

阿見見我拒絕,也不勉強,聽到我的說話,自豪一笑:「SURE LA。」

「唔好咁sad啦,我遲啲再同你打機啦,一齊做毒男。」

隨著阿見的濃情香水慢慢飄散,即使現在阿仙奴進了四球,基奧特帽子戲法,我的心情也很差。

 

先撇開外貌,其實,我曾經都想做個MK仔,風花雪月,見女就聊,好似阿見嘅「餐廳論」一樣,唔岩咪下個囉,最緊要每時每刻都有女陪,有女摟,有女屌。

但有冇諗過,間餐廳可能因為你呢個唯一食客,再冇心情做落去,一蹶不振,最嚴重嘅係會執笠。

我寧願慢慢搵,直到搵到一間地點、環境、裝飾、服務、食物質素都岩口味嘅餐廳,即使只係咸魚白菜,但我都願意坐係入面一世。

點解我做唔到MK仔,最大原因係我顧忌太多,MK仔都有優點,就係思想單純,諗到咩就講,諗到咩就做,將來?將來先算,佢哋唔會諗到呢啲問題,簡單啲講,冇良心。

我思想有問題,佢思想都有問題。

所以我寧願獨自係屋企打各種機,都唔想落club同佢一齊沉淪。

咇!完場哨聲吹響,銀河唯一笑得燦爛,我好似有小小鍾意咗佢,嗯,鍾意得阿仙奴嘅,都有番咁上下長情,你懂的。

可以玩盡天下少女心,令到阿見自豪,而我自豪嘅係,係呢個繽紛世界裡面,仲可以保持到一顆唔值錢嘅良心。

 

 

關於作者:樂人

人生苦短,及時行樂。快樂是甚麼?是在人世間留下一點痕跡,證明曾經快樂存活過。

則留言

閱讀後覺得好,請多多讚好及分享~:)

其他熱門文章

  • 地鐵 by 李天恩
    生活在香港這樣的都市,女孩子們基本上都能從對方的衣著、裝扮、服飾及姿勢態度上得知許多資訊,從經濟狀況到住在哪一區,大致都能看得出來。我瞄了瞄自己的手腕,同時察覺那兩位女孩都偷偷督向我左手配戴著的卡地亞手錶,這隻手錶一般不是我這個年齡的女生有…
  • 我係搞手我係狗(二)——「啲女係咪處?」 by 霏子
    屌,我知你有畀錢,但都唔使咁過份,問埋我啲女係咪處㗎?我班女都係畀同一個價㗎咋,咁佢地係咪又可以要求你有超強御女術呀?呢條友真係當正我係媽媽生。最後,我冇追問佢嚟唔嚟,而佢都係嚟咗。…
  • 第一次約會?要唔要睇戲特登挨落佢膊頭,要唔要胸壓佢? by FAKE 文青
    首先要化個淡妝,所有大眼仔,濃妝not_ok…
  • 【網購】唔好再助長奸商,買物非所值嘅衫 by 夏長樂
    生氣的不是買到劣質衣服,而是覺得商家都當消費者是笨蛋嗎?值百多元的衣服賣百多元,很合理。值百多元的賣三百多,就不合理了,還不如去買淘寶,起碼可以以價判質,心裡有個底。…
  • 琴日我第1次約PTGF,有感而發(利申23歲男) by losing her was blue
    話說前日放假,無聊係IG到禁下ptgf呢樣野睇下。我就咁睇,行個街,睇場戲,全部都收人幾百蚊個鐘。但我見到個tag有成4萬幾個post。係個刻,我就知道,原來真係有人會幫襯。係到我想講句,多謝哂你班仆街毒撚/9公係到成日頂爛市,做壞規矩,寵…
歡迎讚好我們的facebook page,免費資訊源源送上。