好多港女其實係港媽煉成架

(photo via cc Flickr user Toby Oxborrow)

(photo via cc Flickr user Toby Oxborrow)

 

「港女」真係好難頂,我係女仔,我都真係頂唔順。

咁老實講,港女之所以變成「港女」,當然唔係因為佢地生出黎就已經咁乞人憎啦。

好多人話因為香港男仔縱哂女朋友,一係啲兵當所謂女神係神咁拜,搞到啲港女以為自己係宇宙嘅中心,咩都要人就,蠻不講理。

但大家都始乎忽略左一個重要人物——老母。

養不教,就父之過啦,咁但係係現代黎講,老母都有責任架喎。

港媽其實好世界級,大部份香港女仔開始變港女,通常都係港媽細細個培養出佢地惡頂嘅性格。

香港係2014年嘅女性勞動人口參與率為54.6%(政府統計處,2016)。所以唔少呀媽都係上班一族。但你以為佢地做左職業女性,舊有「男主外、女主內」嘅概念就會逐漸消失嗎?少年,我只能說你太年輕了。唔好講笑,港媽根本就係港女嘅進化版。

就以情侶出街/同異性約會為例,港女最興咩都要男仔比錢,認為男仔請食飯係「應份」同奉旨。

喂,呀哥!以家社會普遍都係主張男女平等架喎,唔少女性更加自稱「女權主義者」(feminist),咁因乜解究仲會有咁多港女會咁諗呢?

筆者老母正是一名現代「港媽」,自筆者出世以來,一直都係一位職業女性。佢嘅收入查實同老豆相若,屋企開支就公一大份婆一小份,出親街買親飯都係老豆比。但老母就周不時同佢啲八婆friend呻,話我老豆唔比家用佢喎。

我心諗,吓?大家都係搵咁多,負擔又重過你,無啦啦點解要比家用你呢?

有讀者可能會覺得:「咁呀媽通常會做埋家務同煮飯架嘛,比家用都唔算唔合理嘅。」

之不過,筆者屋企係十分之污糟。老母番工時間其實相當彈性,但老母呢,係唔做家務,亦唔煮飯架!

老豆叫親老母得閒就執下野掃下地啦唔該,老母都馬上還拖:「點解一定要女人做家務?男人又唔做得架?」

於是,屋企啲塵就長期多到會令人鼻敏感發作,而番親屋企食飯都係買外賣。當然夫妻關係係咁嘅情況之下亦唔方和睦。

大家都搵咁多,又要男人比家用,講到做家務個陣又覺得要男女平等,天呀!點解咁多港媽都可以係咁嘅思想?

諗番轉頭,其實咪又係港女個套囉。出親街都唔知點解奉旨要男朋友包佢地三餐,過份啲嘅仲可能覺得異性朋友都應該要請食飯,但平時又高舉「男女平等」嘅旗幟架喎。

本來請食飯就為等閒事,可能男友呢個月番part-time番得多,搵多左想請下我食飯都好正,掉番轉我搵得多我都會請佢食飯。

個問題係,點解一定要男朋友請食飯先?係香港地自給自足都唔係容易啦,點解要人地辛辛苦苦番工,賺嘅錢就用哂落你身上呀?

如果有男人奉旨要女朋友包佢三餐,必定比人話佢食軟飯,以家性別調轉左咋喎,點解女人奉旨要男朋友請食飯就無錯?

上左大學之後,出pool嘅朋友何其多,會同呀爸呀媽開心share嘅亦為數不少。男方家長就通常好隨和,個仔拍拖咪拍拖囉,咁大個仔自有分數架啦。

但女仔拍拖就唔同啦,一但話左比呀媽聽,就幾乎等同要接受調查。

首先,呀媽一定會問:「你男朋友讀咩架?」

如果係Asso 就大鍋鳥,男朋友已被判死刑。

呀媽一定會明示或暗示條仔學歷低,第時唔方高人工,襯個女唔起。

對話可能如下:「乖女當拍下散拖好啦,佢唔岩你架,你仲有時間慢慢搵個好啲嘅,搵個可以養得起你或者嫁入豪門啦,女人最終都係想搵個好歸宿姐。」哇,唔講我真係以為自己/女人係小動物,生出來就係求包養咁嘅款。

結果唔少極品港女要求男友包三餐外,去到談婚論嫁嘅地步,就會好理所當然要男朋友日日捱麵包,為嘅就係儲錢結婚。

結婚package包括:影婚紗相(可能係海外影)、比禮金同過大禮、擺酒(做場大龍鳳比啲親朋戚友睇)、渡蜜月、同埋最重要嘅一樣野-買樓。

哇,做一個人包哂成個結婚package,不如比埋條命你啦真係。結婚係兩個人結架,點解一定要男方比哂?

唔比哂就嫌人窮/無風度/對你個女唔好,港女長期係港媽嘅熏陶下,又點會唔變成口講主張男女平等,內籠咩都奉旨靠男人嘅女人呀唉。

現代港女亦終究會成為港媽,我亦不例外。

中年人難以改變其扭曲嘅思想,所以希望各位清醒港男/港女可以屌醒身邊嘅極品,又或者唔好再縱容港女繼續咁自我中心。

長此下去,港女只會更加臭名遠播,港男同身邊朋友繼續受苦,這又是何苦呢?

男女平等,唔係得個講字架,講左就要做!唔做正契弟呀港女!

 

關於作者:露西法

一個很法西斯的死港女。一直鬱鬱不得志,惟有文字能抒我心中所想,希望渺小的我能透過文字去感染讀者,令大家變得更法西斯,合力拯救香港。

則留言

閱讀後覺得好,請多多讚好及分享~:)

其他熱門文章

  • 琴日我第1次約PTGF,有感而發(利申23歲男) by losing her was blue
    話說前日放假,無聊係IG到禁下ptgf呢樣野睇下。我就咁睇,行個街,睇場戲,全部都收人幾百蚊個鐘。但我見到個tag有成4萬幾個post。係個刻,我就知道,原來真係有人會幫襯。係到我想講句,多謝哂你班仆街毒撚/9公係到成日頂爛市,做壞規矩,寵…
  • 雞之報應 by 霏子
    二零一四年嘅春天,阿海同阿琪仲讀緊Year_One,阿海仲未識到Miki,同阿琪仲係好friend。嗰一年,佢地見證咗一場悲劇,阿海稱為「雞之報應」。 …
  • TVB 是大到不能倒 by 阿享
    香港有咩企業唔可執笠?公營企業,港燈、中電,煤氣?四大發展商?港鐵?港交所?你依家要我答,通通唔係。TVB先係最香港大唔能夠執笠嘅企業。…
  • 【塔羅個案】你身邊有無日日覺得自己懷才不遇嘅人? by 神婆
    你唔知道自己鍾意、擅長做咩唔緊要,起碼你要話到比我知你討厭、抗拒做啲咩,咁我先可以用最少嘅問題引導到你去較清晰嘅方向;如果你咩都「唔知呀」咁,老老實實,你可能問好多問題都問不出個究竟。 …
  • 點一根煙,記梁天琦 by 程悅
    作為投過他和梁頌恆的新界東選民,我總想找回那夜曾支持他的六萬多人,大家現在是意氣消沉得不欲說話,還是早已恨透他的「懦弱」,變成在連登為他入獄而喝采的人?我寧願相信,大家只是對現實無語,像面對抑鬱病人,了解的盡頭反而吐不出半句安慰說話。…
歡迎讚好我們的facebook page,免費資訊源源送上。