【少不更事】所謂氣質貼地港姐背後也不過是個耍手段扮上菜的真港女

 

最近出爐港姐冠軍馮盈盈成為話題焦點,除咗大讚佢樣靚身材正,清純又有氣質之餘,仲有人挖到佢曾經喺自己Facebook流暢爆粗發表意見,如此大剌剌又率直既性格吸引唔少人大讚佢夠貼地,直頭係「十年難得一遇高質港姐」咁話。

講靚唔靚呢家野就好見仁見智,不諱言以近屆港姐嘅質素而言,佢上咗妝個樣的確見得吓人(但千祈唔好素顏喔,冇眉毛係會嚇到你甩褲),加上功能內衣百出嘅年代,即使飛機場亦能夠輕易製造驕人身材,所以被封女神亦不為奇。不過認識網絡世界背後嘅佢,知道佢係一個點樣嘅人嘅時候,見到如此一面倒嘅好評,就好想打個冷震。

打冷震唔係因為佢講粗口,係因為呢條女真人同「貼地」呢兩個字真係完全扯不上邊。

 

女人為左上位,可以花盡心機,但其實來來去去都係果幾招。四年前盈盈由本來讀女校果陣薯薯嘜嘜冇咩人識(曾聽聞連佢嘅任教老師都唔記得佢個名),到上大學之後好快就成為學院嘅風頭躉,甚至隔離Faculty嘅男仔都話自己盈盈Fans,靠嘅都係那些好很浮誇的妝(佢對眼d閃粉可以璨死你),同冧死仔嘅動人聲線(但係你千祈唔好望住佢講緊野個口),得閒落力喺soc房嗲下男仔,喺igflirt吓人地個仔仔咁。曾聽過佢好誇張好高調地喺班男仔面前力讚另一個女仔又靚又好身材,就為咗換來一句「佢都唔係好靚之嘛,都係盈盈你靚啲」。好似高峰時期曾經有十個來自唔同hall嘅男仔同時追緊佢,後來佢揀左一個樣貌平平嘅男仔一齊左兩年,而最後,你懂的,成為棄將,兔死狗烹,今日仲要被報紙冠上「毒男」之名。或者如果唔係俾記者踢爆,佢應該會話自己大學時期冇拍過拖,宅男邊度襯得起未來港姐喎,係咪先。

不過校內亦唔係個個人都咁鐘意盈盈。除咗覺得佢把聲太煩,為人太出位搏表現(除咗災難級嘅私服sense,舞會衝出嚟solo跳舞跳到核核突突果啲都聽過太多,全盛時期嘅盈盈到底要柒幾多次先夠?),亦因為盈盈好鐘意用喊去解決問題。無論groupmate定係莊友都冇辦法推得郁佢做嘢,因為一鬧佢就會喊,搞到好似你恰佢咁,所以好多人都驚鬼咗佢。

人紅咗自然會變得現實,都正常嘅。自從贏咗一個model攝影比賽,盈盈開始跟風做model,愈接愈多job,知名度愈來愈高。本來嘅閨蜜、知心朋友漸漸唔再喺佢嘅社交平台出現,連舊合照不知不覺間全部消失,換之而來係同啲當紅model合照,曬吓手上隻撈,幾十萬一個限量版手袋,有錢嗲哋同屋企架靚車,去左邊度邊度渡假,上左邊度邊度食上千蚊一餐嘅好西。不少得自己對長腿(高165cm報稱對腳42吋,褲浪應該生到去肚臍),同埋時大時細嘅2D變幻球。啲caption轉晒用英文,打吓啲九唔搭八嘅深度野、人生感悟,加十幾廿萬個hashtag。其實如此港女周街都係,又冇話有何不可,甚至有人話鐘意佢夠MK,夠地道。之不過MK還MK,佢到底邊忽貼地?睇過?我淨係知佢個Hermes我連個扣都買唔起咋。

 

或者佢係一個好醒目嘅女仔,知道邊啲野人哋啱睇,知道自己要擺咩出黎俾人起底。至少喺佢開始做model之前我就從來未見過佢如此「過激」發表時事偉論,亦從未見過佢喺投票日講到自己咁愛香港。可能真係如佢所講俾周圍熱切嘅氣氛影響,所以先會前所未有地咁關心時事;又或者說穿了,黃絲或者本土都不過係識得對準大眾口味而已。咁當然會落老蘭喺唔同party姣仔,飲到爛醉俾仔仔帶走咗果啲嘅真性情,就唔會俾你起到底。

盈盈係網絡世界開始走紅嘅轉捩點,應該就係幾個月之前有知名YouTuber同佢傾合作,幫佢拍咗段片試水溫。條片一出街,網民反應熱烈,一時之間盈盈就多咗萬幾個followers,可謂一炮而紅。但其實背後,人地就完佢個時間表,搞咗場大龍鳳捧紅咗佢,佢就用「之後讀書好忙」為由反口冇簽約。過咗橋,梗係快手抽返塊板。當然話之後會讀書都係假,因為佢一早鋪咗路要去選港姐,而當初點解話咁急要拍咗條片先,大家就心知肚明了。

有腦識上位唔係錯嘅,畢竟盈盈想食嘅係娛樂圈飯,佢都不過係識做人。不過過於賣弄本身就唔屬自己嘅形象,遲早只會欲蓋彌彰,弄巧成拙。爆粗事件一出,盈盈就好醒目咁即刻今日的我打倒昨天的我,話自己少不更事,因為「女仔唔可以講粗口㗎」——

「女仔唔可以講粗口㗎」
「女仔唔可以講粗口㗎」
「女仔唔可以講粗口㗎」

咁扭軚法,你叫後面點跟?

 

睇到呢度應該實會有人話,你不過係一個葡萄人地成功嘅廢青,喺度生安白造堆砌抹黑。以上所講真係信不信由你,我只係覺得,一個人為左上位,踩過幾多個頭頂,抽咗幾多塊板,都係要還的。不過我真係冇諗過原來要佢露底,一日都俾多咗佢。

 

關於作者:亦玗

無。

則留言

閱讀後覺得好,請多多讚好及分享~:)

其他熱門文章

  • 人失敗到盡頭總要學會打飛機 by 田小姐
    我呢位朋友,大學畢業五年,一個月前搵到一份寫字樓工,月入唔夠一萬。早幾日成班朋友約出黎食飯,呢位朋友就話佢想辭職唔做,自己搞生意。我心諗,搞生意?你連自己嘅生活都未搞得掂喎!於是我就問佢:「你份工好哋哋做咩唔做呀?」佢「唉」左一聲,話:「我…
  • 愛男友,請愛埋佢屋企人 by 小盛女
    「有無人要食麵啊?幫你地夾。」Mike大喊。「使乜幫佢地夾,佢地無手o架?」Brenda黑面說。Mike即時怔了一怔,他從沒想過這麼簡單的舉動會令Brenda爆seed。「都係順便姐,大家一家人,我幫你夾埋喇。」Mike盡量壓抑自己的情緒,…
  • 應如何對待男友嘅朋友? by 小盛女
    晚飯後她又教大家玩大學時O-Camp的集體遊戲,很快便和Mike的朋友們混熟,特別是男性朋友。玩遊戲少不免有些身體接觸,Mike都一一看在眼裡,他最怕就是看到這些疑似抽水的行為,出聲唔係唔出聲又唔係,自己女友又鬼死咁主動,同人玩得鬼死咁盡興…
  • 「我想結婚之後先搞,有錯咩?」 by 樂人
    點會有錯呢,我覺得堅持係好事,o岩架,千其唔好俾佢得手添呀,唔係好快趙完鬆!VV,你要醒水!呢啲咁嘅臭男人,我仲見得少咩!…
  • 【年輕新貴】識打工一定係做半更保安 by 鵝鑾鼻燈塔
    看更呢樣野,做得真係好足,而且唔需要太多體能訓練,單係實踐呢方面抱負,門檻又低,已經贏左。…
歡迎讚好我們的facebook page,免費資訊源源送上。