啤酒應該飲樽裝定罐裝?

 

接觸精釀啤酒係一個認識自己嘅機會。

點解咁講?因為當你開始飲精釀啤酒,就會慢慢發覺,一d由細到大相信嘅嘢都會逐一被推翻。你會有機會重新審視自己,有冇不知不覺間,對啤酒(同身邊其他事物)形成咗一d唔知邊度嚟嘅睇法?

例如啤酒應該金黃清澈?啤酒越凍越好飲?

又例如我今次想討論嘅問題:「啤酒應該飲樽裝定罐裝?」

每次教自釀啤酒堂,我都會問呢個問題,而參加者每一次嘅答案都係一樣:樽裝好過罐裝。

跟住我就會問:「點解呢?」

依依哦哦一輪之後,通常答案都係離唔開三點:凍d、多氣d、冇金屬味。但係,係咪真有其事?

 

 

樽裝好處1:凍d?

呢個係真嘅,因為玻璃係絕緣體,相對於鋁,更加能夠保持樽內飲品溫度。即係話玻璃樽可樂或者啤酒,相對於鋁罐裝,就算離開雪櫃一段時間,仍然可以咁凍。

問題就在於,啤酒凍d 唔等於好飲d。

大牌子啤酒梗係同你講,雪到有咁凍得咁凍先好飲,點解?因為凍可以令味覺冇咁敏感,令你分唔清好唔好味,淨係覺得飲完好爽。

但係如果你追求嘅係品嚐啤酒嘅香、醇、滑,同埋層次豐富嘅味道,咁凍就唔係最好。所以而家最講究嘅craft beer bar都會分開唔同溫度serve啤酒,香港大坑就有一間。

 

樽裝好處2:多氣d?

呢個都係真,準確d講係「樽裝可以多氣d」。因為玻璃樽可以承受更大嘅壓力,所以可以泵到更加多嘅氣落去。

問題都係嗰句,啤酒多氣d 唔等於好飲d。

汽水就話追求多氣嘅感覺,越多氣越爽。但係啤酒唔同風格都追求唔同嘅氣泡量,唔係一味鬥多。

 

樽裝好處3:罐有金屬味?

呢個就… 一半半啦。首先而家製罐技術已經進步咗好多,基本上唔會有任何金屬味滲到落去啤酒度。你唯一飲到金屬味嘅機會,係你直接喺罐度飲而個嘴掂到個罐造成。

不過,其實任何品酒班都會教你,飲啤酒盡可能倒落杯飲。因為落杯先有空間俾香氣揮發,你先會聞到佢嘅麥味、花香、同埋其他氣味。

所以講來講去,玻璃樽嘅好處,都同啤酒好唔好飲冇關係。可能係大牌子廣告影響下,大家都飲啤酒都只係追求凍、爽、金黃色、Angel Ring,同埋飲完就個個都係朋友,間酒吧仲會變埋沙灘,再加一堆靚女着比堅尼同你一齊玩,已經唔記得,原來啤酒都可以好味。

事實上,精釀啤酒廠近年都逐漸推出罐裝啤酒。例如香港beer drinkers比較熟悉嘅丹麥Mikkeller、美國Founders同Evil Twin、英國Brewdog、日本Hitachino等,都有好多款啤酒同步推出罐裝版,甚至淨係出罐裝。

 

 

咁多人咁做,梗係有原因:

 

罐裝好處1:唔透光

光係其中一種最影響啤酒味道嘅元素,佢除咗會加快氧化,更加會產生一種臭鼬鼠(skunky)嘅氣味。所以大部份啤酒樽都用深啡色,就係想減少光嘅影響,但係無論點減少,都比唔上完全唔透明嘅罐。

順帶一提,如果大家想知道「臭鼬鼠味」係點嘅,其實好簡單:落街買一支用無色玻璃樽包裝嘅啤酒(來自墨西哥,叫你加青檸飲嗰支呢),跟住倒落酒杯度,聞下你就明。

 

罐裝好處2:唔透氣

氧氣係另一種好影響啤酒味道嘅元素,氧化咗嘅啤酒普遍會產生紙皮味,令人有種「舊啤酒」嘅感覺。玻璃樽嘅蓋位比較脆弱,如果運送稍有疏忽撞親,好容易會漏氣,導致變味。罐裝當然都有可能撞凹漏氣,但係凹嘅罐消費者一眼就望到,唔會中伏。

罐裝好處3:運送/儲存成本低

以330ml計,鋁罐每個十幾克,玻璃樽每個三百克有多,相差超過二十倍;仲有鋁罐可以疊起,但係玻璃樽唔得。兩個因素加埋,消費者嘥喺運送/儲存玻璃樽嘅錢(都未計碳排放)其實真係唔少。

講咗咁多,我諗對於啤酒應該飲樽裝定罐裝,大家都好清楚。

 

不過,時代不停變,啤酒同包裝方法都不停變。今日啱嘅答案,聽日可能已經變咗錯。只有不停發問、審視、思考,我哋先可以避免俾自己嘅成見蒙蔽而變得盲目。

「重要的事是永遠不要停止發問。」 -愛因斯坦

共勉之。

 

 

關於作者:HK Brewcraft

HK Brewcraft
於2013年成立,是香港首間自釀啤酒專門店。不論你是釀酒高手還是新手,或者只是想喝精釀啤酒,HK Brewcraft 都幫到你。我們售賣高質素的釀酒工具及材料、以及超過二百款我們精心挑選的精釀啤酒。我們是一班啤酒愛好者,對香港味道一式一樣的大品牌啤酒感到厭倦,所以決定開設這間小店,希望令更多人愛上精釀啤酒、愛上自釀啤酒。歡迎隨時上來與我們交流,一起分享你釀的啤酒!

則留言

閱讀後覺得好,請多多讚好及分享~:)

其他熱門文章

  • 嚟得見工嘅你,可唔可以比少少誠意? by M女皇
    有人黎見工,著牛仔褲,孭住個細到爭啲連電話都擺唔落嘅細袋仔,連淡妝都唔化下。咩事呀?去完 shopping呀?我就知道,佢唔會做到我同事。有人黎見工,外表正正常常吖,佢填完表,我問佢拎學歷證明黎影印。佢同我講: 「因為你地尋日係電話度冇叫我…
  • 示好不示愛,想點? by 柏原太賀
    兩個人走近,由朋友變成情人,很多時也是通過示愛。但此時,若要靠近一個人,就會先示好。這種好比朋友的義氣多一點,也會比朋友的關心暖一點,卻又有一點模糊不清的界線。我們通常稱呼這種關係叫「曖昧」。…
  • 你仲以為林鄭民意失利?人哋根本唔係鬥呢啲嘢! by 鵝鑾鼻燈塔
    早年在金融界打滾時,就知道投行招聘不成文規例:請人首看英文字頭,拼Yeung的,打折;拼Yang的,立即加分。有內地背景,熟知政經金融人脈,絕無被Decline_Offer的可能。至於土炮大學和美國長春藤英國牛津劍橋的分別,更是無用多說。小…
  • 蔣介石差點成功賣掉新界——1938年收購新界主權提案 by 謝淏嵐
    早在1938年,中英兩國已經在香港的問題上有所注目。理論上繼承清帝國而擁有新界主權的中華民國政府,主動提出以兩千萬英鎊的價格,將新界主權賣給英國。蔣介石不是什麼「漢奸賣國賊」,也不是為了讓新界人繼續享受英國文明管治,而是為了拯救在崩潰邊緣的…
  • 如果建制派學識打輿論戰…… by 鵝鑾鼻燈塔
    明明建制派就已經坐擁最多既資源,以及人脈。換句話說,真係「成個球場除左觀眾,都係我既人」,係著重表面皮相既世代下,要搞好形象,真係咁難?重賞之下,亦必有人變節,棄明投暗,幫手洗白。要知道,世界一向崇優,呢個係人既天性。假如君主進行極端統治,…
歡迎讚好我們的facebook page,免費資訊源源送上。