終於,睇你哋啲片我係會大笑

 

十一個月前嘅某個晚上,忽然,有個人facebook message我…….

「阿享」
「咩事?」
「返工呀?」
「放假呀,冇工介紹俾你喎」
「非也非也,有鴻圖大計」
「搞咩呢咁?」
「香港綜藝」
「然後呢?」
「沒有然後……」

呢位哥仔,叫阿pat,其實係我大學同學。係熟,但又未係最熟個啲,雖然畢左業之後都會一大班人約出黎食飯同玩。仲讀緊書個陣,佢已經好多諗頭,想拍下呢樣,又想拍下嗰樣。最後,我地真係付諸實行嘅,就係拍左一個圍繞四個大學生合租一間屋,而之後有多個女仔想租房所發生嘅爭女趣事。簡單黎講,套劇基本上就係寫返自己,做返自己。但同普天之下嘅學生作品一樣—粗疏、求其,唔謹慎(咪即係跑得慢、唔夠快,冇速度)。因為我地借左一間教會黎拍嘅原故,咁多集其實一張似樣嘅床都冇。而四個大學生每人有一間房,成間屋差唔多成千呎更加係不合常理到一個唔知咩點。

儘管係咁,拍嘢嘅呢段時間都係我大學時份好美好嘅一段回憶。每個星期等嗰一日Dayoff就晨咁早出發去拍嘢,大家一齊度劇本、度gag、度機位、度點打燈,仲有就係練成用最快最慳錢嘅方法解決現場無限問題。久而久之,大家成為左一team人,大小project都係同呢班人一齊做。不過,拍劇呢壇嘢,最後就係爛尾嘅。第四集拍左都剪埋,好似淨係漏左啲vo未錄就冇出街;至於第五集,拍左一半,大家就好似冇再提起要埋尾(係我做主角,真係好彩)。

所以,當佢第一次提呢個idea嘅時候,我第一時間彈出兩個字-「爛尾」。

係嗰次之後,阿pat間唔中都會係facebook搵我。因為我多睇韓國綜藝,所以會問下我覺得做一班人主持,類似《無限挑戰》咁嘅綜藝work唔work、有時又會問下我啲遊戲點樣玩先至好睇,啲gag要點樣出先好笑,搞到好似半個顧問咁,當然有時都係問下有冇場地借咁。終於,第一集出爐,節目名叫《四仔》,咁明顯就係每集都搵4條仔做主持。第一集係講4條仔去髮型屋剪指定嘅髮型,途中又問下啲髮型師問題黎玩遊戲咁喇。

「你睇完有冇咩意見?」
「開緊工未得閒睇哂」
「唔緊要,明白」
「但過場好靚」

我唔知邊度黎嘅智慧,驅使我答個咁嘅答案。咁的確佢啲過場真係好靚,當你做過電視台見啲graphic鳩做你就明。但咁樣亦其實側面講左個答案俾人聽,我都坦白,唔係唔好嘅,不過唔夠好啫。而之後佢哋都出左唔同系列,做朋友嘅嘢,坦白講,有啲我都真係開左幾分鐘就會熄,咁你煮下嘢食個啲都幾有趣嘅,但係就唔會有追嘅心囉。

正當諗住都差唔多時間收皮嘅時候,但佢哋冇好似預期咁執柒左佢,反而做下又一集,做下又新一集,做下做下做到第六集,做緣份速配計劃,又真係俾佢哋捱出個頭來。無可否認呢一集係幾精彩,因為啲人嘅反應夠真心,又夠老尷,而香港人(包括我)又極鍾意睇啲情情榻榻老套嘢,係中到應一應嘅。但反過黎諗,呢一集咁順眼,亦都可能係呢集你哋班主持出得好少XD

雖然,第六集係有啲noise,但其實講緊都不過係7百幾like,百幾share,同埋三萬view左右,呢啲數對於啲大紅page黎講簡直係用一,兩個鐘就夠數。甚至佢哋自己個page,都係啱啱先夠1千like。但係,我見到嘅係呢班人一點一點咁累積,一步一步咁經營。佢哋有收到唔少負評,我亦相信唔少人都同我一樣抱住「睇下你幾時執」嘅心態食花生。個網係好殘酷。佢好快就會俾你知道你啲嘢係咪好笑,係咪有橋,係咪有質素。唔得嘅話,你好快就會俾人淘汏,或者自己都意興闌珊。就算依家個勢好地地,可能呢壇嘢都會不夠於人世。但係呢個之前,我想講嘅係,終於,睇你哋啲片,我係會大笑。

四仔,加油!前面尚有一萬里!

 

茫茫人海中遇唔到真愛?
咁倒不如試下相信緣份!
今集四仔試下走上街頭幫人速配,
睇下會成功撮合幾多對情侶?!

.更多四仔系列節目:https://www.youtube.com/playlist?list=PL4wYikwi8hJ3xjHcnlA3TvfAB26sw-WpZ

#哈利係愛呀
#咦就到情人節喇
#其實阿pat好想玩

特別感謝每一位願意同我地癲既朋友仔!!

Posted by 四仔工作室 on Saturday, February 11, 2017

 

關於作者:阿享

一個戒緊牛肉,但打邊爐仍然會忍唔住既耶青。

則留言

閱讀後覺得好,請多多讚好及分享~:)

其他熱門文章

  • 身為管理層,真係想對所有同事講句:“Don’t Shit Where You Eat” by 犁牛
    當時有個隔離部門年屆40既已婚中年同事「借個」膊頭畀佢,又陪佢入廁所嘔,我覺得唔妥就叫女同事一齊入埋個k房獨立廁所睇睇,擾攘左10幾分鐘條IT佬又耍開d女同事,兩個人單獨係殘廁10分鐘......到第二日有人話畀我聽佢地拖住手落樓,然後等條…
  • 女校這回事 by belle
    「阿女,點解倒數你都可以留係屋企?」、「無人追你咩?點解你又留係屋企?」作為一個二十八的女人,社會認為單單一份穩定工作是不足夠,你必須有伴侶,繼而組織家庭,順理成章加入樓奴行列。拍拖,結婚,生仔就好似是人生的公程式,若果你問我照足指示做,是…
  • 男朋友家住在天水圍,而我呢,住大埔 by 甜蜜冤家
    是的,大家都在新界區,可是平常時間裡根本沒有巴士直接連接天水圍和大埔(早上和傍晚各有一班特別班次,只是我們都不適用)。若我倆要到對方住的地方,那就只可乘坐巴士及轉乘港鐵,合共需約一個多小時(大概足夠飛一轉台灣了)!說實話,這對我們的影響並不…
  • 姊妹婚禮都唔俾我請假?不如等佢下次結婚我先去賀佢丫? by HR熊
    我阿姐近年自己新開左條policy,就係嚴禁我地同team之間互相重疊放假日子,一日都唔准!唔批!皆因有次佢自己同我地teammate撞左連續四日假,仲要咁岩都係去外國出席朋友婚禮。照道理我同事比佢早申請假仲已經獲批,係咪以為好完美無位俾人…
  • 【識食一定食__】邊個星座嘅男人性能力最好? by 神婆
    話說當時我當同仁上下開緊PS4Party講緊無聊嘢,此話既出,全班人一秒爆笑。而我呢,真係唔知應該反白眼定係笑出聲。邊個星座男人性能力最好?…
歡迎讚好我們的facebook page,免費資訊源源送上。