「都好吖~」

 

有冇發現香港人有句萬能口頭禪──「都好吖~」。你搵到份得雞碎咁多嘅人工,朝十晚十豬狗不如覺得好辛苦,於是同朋友大訴一輪,然後劈頭第一句多數同你講:「都好吖~」。呢四個字(連埋蛇仔),雖然講唔出咩大道理,但係好有親切感,而且係最鳩最敷衍嘅鼓勵。

有時明明件事唔算唔好,你亦唔覺得差,但好多人會衝出黎安慰你。記得我有一次去教班,有學生問我:「呀sir,你讀邊間大學咖?」「我係某某大學畢業嘅。」你估下佢講咩?唔係好奇追問、唔係講thanks for sharing、竟然係話:「都好吖~」吓?!哥哥仔,明明我都冇話唔好,而且嗰三年我都讀得非常之咁開心,點解要忽然安慰我呢?點解我要被強行鼓勵?我望唔透。

學子不責,但成個社會就係咁,即使你冇否定自己,對方都會正面「鼓勵」你。乜有人話唔好咩?乜有話唔開心咩?點解忽然將成件事強行賦予「好」嘅價值,好似同情你咁。

你讀hku,人哋會話:「叻仔喎~」
讀八大,人哋就會話:「都好吖~」,完全唔理你咩系。
讀恆管、珠海、OU、asso、ive,人哋仲會話:「都好吖~唔緊要啦~」,由此可見,有時會加多句「唔緊要啦」以示強烈鼓勵性。

「都好吖~」呢幾隻字,完全反映出成個社會嘅階級價值觀,認定你係次一等,而呢種「被鼓勵」,你係駁唔到的。所以話香港人真係好正面,成日鼓勵人,擺出一副「我們都是正能樣」嘅正能樣。相反,即使成件事真係好差,差到你要宣之於口喇,好多人仍然只係識講呢幾個字。

「我男朋友好小器成日發我脾氣……」 「都好吖~」
「我文憑試得10分咋,點算呀……」 「都好吖~」
「我GPA得1點幾咋……」 「都好吖~」
「我今個月窮到日日食粥咋……」 「都好吖~」
「我老婆勾佬呀……」 「都好吖~」

由此可見,呢句嘢其實好萬用,可以亂咁將一件事變成唔好,唔好嘅嘢都包裝得好似好美好。早排西九故宮事件,有人鬧政府事前封口不提,蔣麗芸反駁話:「有時有個驚喜畀你,都好吖~」。一句「都好吖~」,肯定咗成件事有若干價值,將明明好差好垃圾嘅嘢,重新賦予價值,你話廣東話幾咁有力度、幾咁博大精深呢。

「我間屋得一百尺咋,點住得人呀?」 「都好吖~」
「我人工唔夠一皮,搵埋都唔夠食!」 「都好吖~」
「民主黨,賣香港!」 「都好吖~」
「網上食薯片」 「都好吖~」
「全部特首候選人都係建制派喎!」 「都好吖~」
「其實除咗淋病,另外兩個都會為23條立法喎!」 「都好吖~唔緊要啦~」

香港人真是個正面的族群喔,天天自慰,樣樣都好,打牛工好、食屎好、法輪大法好、投共好、雷鋒精神好、無產階級好,总之啥都好!

 

 

關於作者:潮文社

潮文社
潮文社,實錄生活百態、個人小品,以流行通俗形式表達,由社長親筆原創,亦歡迎投稿。專頁:https://www.facebook.com/9.Literature

則留言

閱讀後覺得好,請多多讚好及分享~:)

其他熱門文章

  • 【塔羅個案】有個客為咗受男人歡迎,走去養狐仙 by 神婆
    Rebecca唔算係一個好精明嘅女人,佢做侍應嘅,但因為唔識英文,所以黎黎去去都係喺啲大財團連鎖店度打工。佢本身外表唔算特別標青,年紀都唔係青春少艾;偏偏對愛情仲有好強烈憧憬,渴望壯健、俊美嘅肉體同外表,「咁我先有安全感」,佢咁講。…
  • 【真人真事】現代名妓嘅完美經營模式 by 阿標
    佢一心想做雞,都係想多啲錢去多啲日本,但佢想做雞之餘,又非常揀擇喎,咁點算呢?佢就諗到一個「以服務換服務」既經營模式:橫掂都係去旅行,佢就用旅行去做交換。你只須要提供來回機票,基本食宿,佢就提供性愛服務同拖手仔行街街。而最鬼馬地方係,朋友S…
  • 【真人真事】識到個唔會去蒲既女朋友,其實已經好好 by 熱豆腐仔
    男女之間拍拖,點都會有嘈交既時候。 而好多時都係基於對方同異性有懷疑過份親密既行為,好似成個醋罈子打爆左一樣,成地酸味湧上心頭 。//除左舊知已舊朋友舊同學舊同事之外,往往出現最多異性既,就係Party或者酒吧。…
  • 【重口味真人真事】禁室 · 幼齒 · 血紅色 by 陸子瀧
    AV女優將會長駐在互聯網上,不會消失。…
  • 有咩好得過有馬紀筠做女朋友? by 毛言地
    講外表唔係差,甚至有一種睇片仲靚過睇相嘅感覺(嗱,你唔好話我知你冇睇過),而且一個喺床上面配合度咁高嘅女朋友,冇邊個男人會討厭。講真吖,好多女仔連含都未必肯,仲話要拍片?你今晚準備定瞓廳都可以。你話我咁諗好膚淺咩?有幾多個女仔大叫碧咸靚仔同…
歡迎讚好我們的facebook page,免費資訊源源送上。