點解你要問點解?

 

「點解而家啲細路咁唔挨得?」「點解唔好好同自己父母講下自己內心感受?」「點解唔諗下身邊仲有好多值得珍惜同留戀既野?」「點解咁小事都要走去尋死?」

點解?點解?點解?

踏入2017年,學童自殺問題依然嚴重,今個學年年頭至到而家已經有22宗個案,而最新一宗都只不過係兩日前發生既事。生活唔如意,家庭、感情、學業有問題,繼而逐漸陷入精神病,甚至自殺既境地,唔通呢啲學生真係邊緣到連屋企人都唔去理佢地?茶記既叔伯兄弟或者辦公室既三姑六婆,口沫橫飛咁問點解點解;當事人既父母痛哭流涕希望眼前既一切都唔係真既,希望時間能夠返轉頭。好笑既係,有人會叫前者用同理心去代入後者度諗下,希望佢地講野唔好咁涼薄;有人亦會叫啲細路尋死前諗下如果自己死左阿爸阿媽會唔開心乜乜物物。

咁你地又有無諗過點解佢地要尋死?

唔知有無人會發過類似既夢:一個人係一個迷宮裡面,唯一既指示就係「呢度係無出口既」,你能夠做既就只有行同企係度。一開始你當然會行下睇下,行左好似好耐後都搵唔到出口,心灰意冷然後決定企係度乜都唔做,因為咁行法好攰。呢種攰除左係體力上既攰,心理上亦覺疲累,而且只有自己一個去承受晒呢種疲勞感。到醒返個陣完全就係發左個惡夢咁既感覺,無休息不突止,仲要比起發夢前再攰左。

我唔敢話自殺學童身邊無人去開導佢地,我亦都相信佢地既老豆老母唔只會講「做好啲功課呀溫好啲書呀考試要考好啲呀學多啲野呀」之類,但係呢啲父母或者身邊朋友係出事前係咪同其他人一樣,都會將一堆「點解」塞俾當事人?點解點解,諗到既話就唔駛走上絕路啦,就係因為諗唔到先覺得無出路,先覺得「企係度係最正確做法」呀嘛。

當社會一面倒咁去「關注」呢啲野然後問點解既同時,其他學童都係會睇到呢個社會去點樣回應佢地。有同自己年紀相近既人自殺,見到大家咁樣既反應就會覺得「你地根本就唔明我地需要既野」,漸漸咁將自殺變成一種奇怪既社會現象。可以係單純既「無人明白我我好想死」,亦可以係「反正我死左你地都係會咁諗」。

其實以前既年代好好呀,有壓力可以落公園踢波打波,約一班朋友出街落下網吧打下機,傾得埋冷既就將自己唔開心既野講出黎大家互相訴下苦,而家有呢枝歌仔唱咩?日日返學放學返興趣班ABC然後返屋企訓覺,功課呢啲唔駛講就學校做埋架啦,啲生活隨時仲社畜過而家啲大人。對於佢地黎講,唔需要你地係隔離拎住把遮講「聽日一定會好天既」,因為佢地既人生從來無好天過,亦都唔會期盼有聽日。佢地需要既單純只係你拎把遮幫佢地遮雨,咁就已經係最大既鼓勵。

唔希望再有學童自殺,但「摸木」真係再有,我希望啲人唔好再問點解,因為好多時你地都知原因,而且你地都有份做成。

 

關於作者:純儚

就單純一個80後肥宅,無咩簡介可言...

則留言

閱讀後覺得好,請多多讚好及分享~:)

其他熱門文章

  • 港島人同九龍人,有鬼分別咩! by 小李子
    筆者係地道九龍人,由細到大讀書做嘢都係九龍區,冇乜必要好少喺港島區留連。 但自從上個月搬咗去上環做嘢,我就發覺港島人真係零舍唔同,係零舍串呀! 行去中環食lunch,個個西裝友都好似特別白鴿眼咁, 連翠華個阿姐都特別惡! 但我到最近機緣巧合…
  • 我可以肯定,大部分人並不適合一個人旅行。 by 達米安
    獨自一人在舉目無親的地方會令人變得緊張,因為無論遇上甚麼難題,發生了甚麼意外,都不會像在家鄉一樣有家人朋友的支援,也沒有了對公共系統的熟悉,所有後果都得自己承受。更甚者,當在語言不通的地方時,連如何向路人求助,都可以是一個難題。只要不是太缺…
  • 【塔羅個案】基督徒黎開牌問:「我個仔契比黃大仙好唔好?」 by 神婆
    「我想問下個仔契比黃大仙好無呀,」Angela個樣好認真,「會唔會以後條路易行啲?」…
  • 【偽影評】 《棟篤特工》:電影的隱喻? by 馮志豪
    作為大學主修哲學的子華神,不少演出都是借故事諷時事,甚至有時直接觸及政治神經,例如他在楝篤笑中曾經說過 : 「知唔知一國兩制最偉大地方係乜?就係肯承認佢自己個制真係嚇親人!」和「全港市民熱烈慶祝『收返』!」等,令中在笑中帶來一點思考。…
  • 25歲以後 by 小盛女
    當我永世做Marketing,由assistant升到officer再升到senior又甚或是咁好彩升到manager,人工都可能只有2、3萬,日日做到隻狗咁,到頭來首期都儲唔到,真係諗起都一額汗,最後我想了十萬九千次,只有兩個辦法可以解決…
歡迎讚好我們的facebook page,免費資訊源源送上。