澳門教育裏的心理專業

 

(photo via cc Flickr user Adam)

 

融合教育,係澳門近年嘅熱話。報章上,成日都見到唔同人會講吓法規上制度上之後會完善,咩「促關注特殊兒童」。電視上又見咩咩學會協會講吓師資呀咁。每次睇完,究竟佢哋講緊嘅係特殊教育,定還是融合教育…

老老豆豆,唔好講澳門,就算鄰近嘅香港,唔講一般市民,做教育嘅又有幾多識協助有需要嘅學生?香港制度上有特殊教育需要的分類,於有需要時會轉介到兒童精神科,由醫生於臨床/教育心理學家協助下作出診斷;每間學校定期都有教育心理學家到校。而澳門現時會由教青局評估,以個別學生需要(即所謂嘅弱項),作出教育安置;被評為有需要嘅,學校會收到按有需要學生人數嘅資助。兩者各有好壞之處啦。

咁其實,咩係融合?點樣融合?咩又係特殊?點樣特殊?教育安置咗咁又點?

最懶咁用維基百科嘅話,特殊教育(special education),可以係好廣咁包括埋特殊教育需要(special educational needs),唔只係講以往嘅特殊教育學校。澳門教青局將教育分成普通班、融合教育班、特殊教育小班同特殊教育班。

而融合教育(inclusive/ integrated education),本意係想將所謂未去到要去特殊學校嘅有「特別教育需要」嘅學生放喺一般學校接受普通教育,但校方可以按該學生需要,作出協助或調適;而校方會以全校參與方式支援該學生嘅成長。「特別教育需要」唔只係學業上,仲會包括情緒行為方面等等。教青局嘅教育心理輔導暨特殊教育中心就係負責呢類協助嘅部門,個別化教育計劃嘅表格,內容豐富,仲包括多方面,理應可以協助到同調適到。

協助,可以係「課後功課輔導」及加強學習技巧(並非補課講多幾次)、安排職治物治語治、為其設計及實行個別學習計劃等等。調適,可以係平日功課量嘅調整、調整科目數量範圍、加長考試時間、放大試卷、安排考試場地及設備等等。

試諗吓一位學習上有障礙嘅學生,佢嘅需要唔單只反映喺學習上認字、寫字、理解等等,好多時喺生活上因為呢類嘅需要,理解其他事情亦會有同樣狀況,影響學生嘅情緒、社交等等。學生唔會因爲同學習冇關,就會冇咁呢類情況。咁究竟要協助呢類需要,要有幾多、同邊一方面嘅專業人員呢?

曾經聽過一位本澳老師感嘆:「學校唔只係學習學術上嘅地方,但政府嘅IEP(個別學習計劃)通常只談學業部分,完全唔顧及學生情緒行為社交溝通等等嘅需要」。做融合教育嘅學校,體制裡面除咗平常制度嘅教師同學生輔導員,仲會有負責有學習需要嘅學生嘅資源教師,治療師?有學校會根據需要購買到校服務,安排物理治療師、職業治療師、語言治療師到校提供物治、職治、語治咁。

咁教育心理呢?唔好意思,澳門本地冇心理學家制度,衛生局註冊嘅得治療師(心理治療)。「心理治療師」又同心理學家有咩分別呢?

心理學家通常由學士至碩/博士都係讀心理學出身。半途出家?好多地方如英國、香港、澳洲,都要讀返心理學嘅學士或同等學歷,先畀入碩士課程,咁當然美國制就唔同啦,有本事考到博士咪得囉;碩士開始就睇吓自己會專邊個範疇,好似臨床(clinical)、神經(neuropsychology)、工業組織等等。心理治療師(或者叫「註冊輔導員」)係其他地方通常規定同心理治療有關碩士課程或以上學歷,唔同人可以有唔同嘅modalities去做,如遊戲治療、家庭治療、音樂治療、認知行為治療、人本治療等等。

提供教育心理服務嘅心理學家可以係完成臨床或教育心理(專業訓練)碩士學位課程嘅,好多地方如香港、澳洲、台灣、新加坡,心理學家都係心理學碩士以上先註冊到,英美就唔該讀相關嘅心理學嘅博士學位啦;但係本澳就有少少與別不同啦,衛生局現時定咗「全日制心理學學士加半年認可醫療機構實習」就可以申請成為「治療師(心理治療)」。而原本本澳唯一提供政府認可之臨床心理(專業訓練)碩士學位嘅澳門大學,出過兩屆畢業生後就一直再冇收生嘅意思;可能呢個就係我哋澳門人成日要依賴外來專業人員嘅其中一個原因吧。

咁臨床或教育心理學家點幫到學生?兩者之間會有啲分別嘅。喺學校入面嘅心理學家通常要:

1)諮詢、評估:同家長見面,了解母親懷孕史、學生發展及成長史、現時需要等等,於有需要時要先排除智力對其影響,再安排其他評估;

2)個別學習計劃及校本方案(協助及調適):提升學生如學習、社交、自理、情緒控制等多方面;

3)輔導、治療及訓練:無論係學生定家長,要接受與別人不同最初會有啲反應,雖然時間可能會沖淡到啲,但同專業人士傾訴、討論及多少少了解係需要嘅;而有啲學生可能需要唔同嘅治療及訓練,如提升專注力、社交溝通技巧、情緒管理等等。

4)協助及促進家校合作:學生唔係24小時喺學校,學校以外嘅時間對得比較多嘅就係家人,家人嘅理解、關懷、支持同合適係好重要。

教育心理學家(Educational Psychologists)會比較集中喺2)、4),同埋教育系統上面;而臨床心理學家(Clinical Psychologists)大都可做哂4樣,但會集中返喺1)同3)上面。先進國家通常兩者都會有,由兩者加上其他專業嘅合作去最大化滿足學生嘅需要。例如學校社工/輔導員收到學生會轉畀教育心理學家做評估及調適,訂定計劃並將有需要學生轉介予臨床心理學家進行評估及治療;亦有啲心理學家喺接受相應培訓後成為學校心理學家(School Psychologists)總領學校入面有關教育發展同特殊教育需要嘅安排。

喺學校入面,好多時冇話某一個職業可以做哂所有嘢,而唔同嘅心理專業不單止可以幫到有唔同需要嘅學生,仲處理咗一啲要深入先處理到嘅問題,令教師同學校輔導員/社工可以更有效面對全校嘅學生,唔會因爲集中喺某類耗時嘅服務而多咗壓力。咁多種專業一齊去努力,先令到學生可以專心學業、多元發展。

 

 

關於作者:心籽

則留言

閱讀後覺得好,請多多讚好及分享~:)

其他熱門文章

  • 好多謝啲網民haters 幫Emilia 宣傳裸體寫真 by Cmw Boni
    Emilia嘅plan由八蚊美金去到四十美金不等,值唔值就見人見智啦,我覺得呢個世界,明買明賣,當你地班友,又要睇又要罵,咁點解唔好好利用呢個勢去順便搵下錢,就算科學家都會搵下點樣儲起行雷啲電啦,將負面嘅嘢化為錢唔好咩。…
  • 【塔羅個案】名校老師婚外情的故事 by 神婆
    大家對老師嘅印象係乜嘢?係有教無類,抑或係道德端正?我中小學都有幸就讀風評唔錯嘅所謂名校,大部分老師教學用心,係我嘅榮幸。…
  • 【堪輿命理】用術數搵「淫娃」?! by 庵念慈
    所謂「淫」,其實正確去講,就係性需求比較大,主要由於人類要繁衍下一代,所以內在某種基因自然會推動自己去尋覓繁殖嘅目標,而以我觀人於微所留意到嘅特徵,歸納如下…
  • 分手後她振作起來 by 霏子
    分手後的一個月,她如常生活。只是,每一晚她也會寫一篇日記,記下自己的痛苦。然後,晚上又會夢見他。獨居的壞處是一個人容易胡思亂想,好處是哭了不必向家人交代。因此,她每天哭醒。…
  • 人到底值幾錢?我只係值萬五蚊一個月 by 小盛女
    「喂,阿A今日無化妝啊!你睇吓佢幾殘!」、「嘩,阿B使咪著啲咁貼嘅裙啊,都唔知搏咩!」、「阿C係咪同經理有路?成日一齊食飯嘅!」每天就只有這些事事非非,比小學雞更要小學雞,而這裡的同事就只會是同事,不再像以前在廣告公司般,同事既像朋友,更是…
歡迎讚好我們的facebook page,免費資訊源源送上。