【港產爛片】爛到無從入手嘅《神龍賭聖之旗開得勝》

 

年份:1994年
導演:彭綺華
編劇:陳健忠
演員:梁家輝、梁朝偉、曾志偉、吳君如、鄭伊健、陳加玲、歐瑾 、 麥家琪

 

劇情簡介:

賭霸傳人任天仇(鄭伊健)為得至尊賭皇之名譽,挑戰賭神之子沙三少(梁朝偉),欲讓兩人進行三局兩勝制之賭皇大賽。可惜沙三少為人好吃懶做,一心只想做個小賭徒,經過第一回合慘敗以後,沙心灰意冷之餘決定找中國賭聖許文龍(梁家輝)回來助陣。另沙家眾人恐任派殺手前來暗殺,於是沙家之管家小梅姐(曾志偉)請來神探羅拔(梁家輝)及怪俠一枝梅(曾志偉)協助保護。

不過,許要求巨額酬金才肯出賽,但沙家早已家道中落,財政大權落在沙三少太太Lulu(吳君如)手中,沒錢的沙三少為了練得搓牌神功自己出賽應戰,數次欲偷神功秘笈可惜無功而返。最後許竟誤打誤撞下,把沙三少弄致無法出賽。眼看第二、三回合之賽事即將展開,在小梅姐之營救下,終由羅拔代沙家出戰。面對任天仇的精湛賭術,羅拔一直處於下風……

 

──────────────────

 

***文章有劇透***

寫呢個系列,開頭講明只寫千禧年之後嘅戲。當時不少好事之徒表示,90年代嘅《神龍賭聖之旗開得勝》,堪稱史上第一爛片,必定要寫。為求滿足我求知慾,早兩星期睇咗呢套奇片……

我寫《阿嫂》時斷言,一套戲有三個或以上影帝級人馬參與,幾乎必爛。《神龍賭聖之旗開得勝》上影之時(1994年),梁家輝及曾志偉已為影帝,梁朝偉亦憑當年嘅《重慶森林》奪得影帝,結果《神龍賭聖之旗開得勝》無令我失望,劇情爛到核爆。

要簡單講解此戲之劇情,只需一張配圖。作為鄭伊健同梁朝偉賭局大戰嘅背景版道具大字,理應金碧輝煌、美輪美奐,先可以襯托出呢場賭局有幾重要。配圖呢個道具,偏偏甩皮甩骨,粗製濫造,水平不如中學生壁布版作品,簡直係成套戲嘅縮影。

事實上,之前寫嘅《我阿媽發仔瘟》、《內衣少女》、《女人本色》,甚至係《阿嫂》,劇情再爛,仍叫做有劇情,一般人仍可以正常智商理解劇情,但係呢套《神龍賭聖之旗開得勝》,劇情爛到可用奇特嚟影容,以常理難以理解,更遑論評論。

諗咗好耐,呢套戲之所以「奇特」,皆因每一幕(1)可以用上「胡鬧」嚟形容同埋(2)對劇情推進毫無幫助。

-開首之賭局:鄭伊健同梁朝偉開首三鋪賭局,第一局點數鬥多,鄭取巧,骰寶中有多一粒骰所以勝出,完全有歪常理;第二局點數鬥少,鄭伊健六粒骰疊埋,最頂一粒係一點,而梁朝偉粒骰打斜,無點數,尚算合理;最後一局,一粒骰鬥大,鄭伊健居然用一粒體積較大嘅骰仔而勝出,簡直痴撚線。

一套以賭為主題嘅戲,開首三舖賭局,全部以捉字蚤、文字取巧、語言藝術決定勝負,淨係呢幕已經要界櫈。

呢場賭局,鄭伊健獲勝,贏得對方一隻手。豈料梁朝偉求其搵嚟一隻假手,就話係對方嘅勝利品,因為賭注係「一隻手」,無講明係邊個隻手,咁就過咗骨!

嘩,我屌!

之後嘅每一幕,我大概講出如何胡鬧-

-梁朝偉練功:浸滾油練功,同賭錢無關,對劇情作用為零;之後明明係梁朝偉浸滾油,變咗吳君如浸,唔搞笑,更突顯多鳩餘。

-中國賭聖(梁家輝):跟住搵嚟中國賭聖,諗住傳授梁朝偉捽牌。中國賭聖呢個角色,無教到梁朝偉任何嘢,中國賭聖亦無喺戲中有任何作用。即係,你踢走中國賭聖呢個角色同幾幕戲,對套戲嘅發展一啲影響都冇。中間涉及嘅介紹各類賭具、吳君如學識捽牌、梁朝偉兩個妹、偷返嚟本秘芨,零用處。最搞嘢係各人話好重視本所謂捽牌秘芨,連梁家輝唔見咗都冇去搵返本嘢!

-之後再出現乜嘢怪俠一支梅、神探羅拔,既無謂,所謂笑話又唔好笑,睇得出係編劇左拼右砌,求其套戲夠90分鐘就得。

每一幕戲都係多鳩餘,加上梁朝偉嘅角色喺套戲毫無成長,你睇第一幕賭局,再skip去最後嗰局,無傷大雅,既唔影響套戲嘅流暢連貫性,亦慳咗你唔少時間。

一幕又一幕唔連貫、無起承轉合,唔搞笑,純粹胡鬧嘅戲份,細心想想,只有人類第一爛片《天機:富春山居圖》先比得上。但《天機:富春山居圖》尚有美人美景,金雕玉砌,奈何《神龍賭聖之旗開得勝》尤如配圖之豆泥及兒嬉。

最後,片中有提到梁朝偉同鄭伊健分別係賭神同賭霸之子,但梁朝偉喺戲中之名乃沙三少,與賭神高進似乎全無關係。由片名、劇情、賭局、對白全部掛羊頭賣狗肉。

 

尋根究底,睇返製作團隊,此鬧劇嘅導演彭綺華與王家衛合作,任製片居多,唯獨佢早年執導嘅三套戲,當中《玫瑰玫瑰我愛你》、《千王情人》,喺劇院上影時不幸睇過,當時已不敢恭維,加上今次《神龍賭聖》,我居然不幸睇過晒佢嘅作品;編劇陳健忠,90-97每年平均編兩套劇,生產力之高,果真神人。

《神龍賭聖之旗開得勝》,可謂90年代《阿嫂》。集合梁朝偉、梁家輝、曾志偉三個好戲之一,加上英俊小生鄭伊健(當時仍未拍古惑仔),吳君如,劇情粗製濫造,不知所言,若非要寫作,睇完五分鐘已經要熄機。

90年代,賺快錢容易,黑社會入侵娛樂圈,此等7日鮮(即只用七日拍好嘅港產片)一街都係。

好咧,咁嘅垃圾戲,究竟當時收幾多票房?

$14,094,286

講多次,係一千四百零九萬四千二百八十六元。當年……排全年票房第18。(順帶一提,當年《東邪東毒》嘅票房係八百幾萬、《重慶森林》七百幾萬)

以當時一張飛$30-$45計(拎$35計),入場人次大概係402700人;如果計返今日每張飛$100,票房係$40,270,000,四千幾萬。舊年,除咗《寒戰2》(which I swear to god is rubbish),最高票房嘅純港產片係《使徒行者》,接近千一萬;口碑一絕,拎埋最佳電影嘅《樹大招風》,九百二十萬。再睇清楚啲:

《神龍賭聖之旗開得勝》,四千萬;
《樹大招風》,九百二十萬。

當然,《神龍賭聖之旗開得勝》係賀歲片,一般觀眾喺新年嗰陣都會放低個腦,求其戲院有乜戲有空位就睇乜。舊年某人套《賭X風X》,隔咗23年都仲玩緊賭,新年收二千幾萬。

另一邊廂,你望下《狂舞派》千五萬、《點五步》同《導火新聞線》,各四百萬,覺唔覺得好唔公平?係,絕對係,100%中的100%,好撚唔公平。

俗語有云:「有咁耐風流,有咁耐折墮」,前人享受完成果,種落嘅孽,後人有撚排還。你睇下1995-97年,樓市幾咁瘋癲?結果之後咪還足6年。呢個世界,真係有報應嫁。

 

──────────────────

 

養分時間:如何改寫《神龍賭聖之旗開得勝》

抱歉。劇情實在太爛,苦思良久,實無可能喺原有框架下改寫劇情。若可以重頭再來,較理想嘅方法係索性唔開拍,慳返時間金錢心機,以免造孽

 

──────────────────

 

票房資料來源:

(必睇)

 

──────────────────

 

【港產爛片系列】
《阿嫂》
《我阿媽發仔瘟》
《王老吉、OSIM特約:女人本色》
《內衣少女》

關於作者:史兄

史兄
80後,機緣巧合成為第一代博客。博客群組《香港原人圈》成員之一。2013年出版首本著作《婚姻這種邪教》,2014年出版第二本著作《辦公室七不思議事件》。空餘時以玩弄excel表為樂(多麼變態的嗜好)。無聊之下與友人共同開發app「求偶大作戰」,無厘頭地登上《蘋果日報》A1頭條。世上就有如此多不可思議的事......:FB 個人帳號:兄史(!)史兄史臉書2號(aka後備戶口)史兄FB 專頁史兄主理「捐條毛做善事」FB PAGE

則留言

閱讀後覺得好,請多多讚好及分享~:)

其他熱門文章

  • 我一直以為我們是十年好兄弟,但為甚麼去旅行你要帶安全套? by 蚊子
    十年了,我們之間沒有曖昧,更沒有愛情。我們就像人們所說的那種不存在的男女之間純粹的友情,我們會吵架、會打架、他會跟我說如何「搞掂」那些女仔,我會笑他賤格⋯⋯我們什麼都能分享,無論相處多久都覺得只會是「哥們」,他也曾經向我爸爸敬酒:「uncl…
  • 烈女 by 亞愁
    聽説她三十歲那年嫁了個青年才俊,不夠兩年就離婚了。我記得她說過,女人一定要在三十歲前嫁一次,結果她做到了,儘管婚姻是如此的短暫。…
  • 我寂寞,所以才會想抱一個中三畢業的男人? by 葉希林
    忽然,我收到Mark的一條短信:「今晚得唔得閒出嚟食餐飯?」Mark就是我之前的健身教練,30歲,高174厘米,中三畢業。上次,我跟他在旺角吃完油炸鬼,我以為我們之間有過的丁點兒火花都一併炸光了,還有待續?中秋節那晚,我說不要因為寂寞而搞著…
  • 識揀另一半,人生已經贏左一半。 by 窮家有道——窮一生
    其實呢個題目我想寫好耐,因為講到理財,其實係一件終身事業黎。我教你開支點減都好,都係一時既野,個個人既生活節奏都唔同,套武功都要有所變化。一項咁漫長既任務,當然係由陪你最長時間既人開始!老豆老母冇得揀既,好似窮生咁,出身係單親家庭,家母唔係…
  • 每次搭巴士,我都見證緊後生仔嘅悲哀 by 擇言
    坐喺位嘅阿伯,企喺走廊中間嘅阿叔,喺間口僅僅上到車嘅中年人,心入面都喺度諗:「抵死啦你哋班死廢青,咁唔努力梗係上唔到車啦。」…
歡迎讚好我們的facebook page,免費資訊源源送上。