420? Green Day? 到底係啲乜嘢嚟?

文教 / 最新文章綜覽

 

(頭盔:吸食或藏有大麻在香港均屬犯法)

 

喺每年都有嘅4月20號,可能唔知發生乜事嘅人會覺得係平平無奇嘅一日,又可能有人會覺得呢日係希特拉嘅生日(佢今年終於Cut到有線好似係)云云,但喺大家身邊,乃至社交平台之中都總會有人高呼4月20號係Green day、Happy 420之類嘅說法,咁到底420係乜玩法呢,不如我哋就嚟探討吓啦!

 

420嘅起源係乜?

話說420呢,要追溯返1971年喺美國加州聖拉菲爾有班自稱The Waldos嘅大麻Fans,呢班友仔喺秋季開始咗一個叫「狩獵大麻」嘅行動,主要係搵自已區內廢棄咗嘅樣大麻田,只要佢哋搵到先,就可以獨佔食幾世都食唔完嘅貨源。咁The Waldos就定咗晏就4點搭4個字(Four-twenty)喺聖拉菲爾高中(San Rafael High School)裡面嘅路易巴士德(Louis Pasteur,知名法國化學家)雕像前面集合,以「4:20 Louis」作為暗號嚟稱呼呢個計劃。喺The Waldos失敗歸來幾次之後,喺佢哋集合嗰陣就索性改用「4:20」呢個簡稱嚟表達行動,後來就一傳十、十傳百咁樣,慢慢喺大麻圈子裡面炒熱咗,結果420去到今時今日就變成「隊草」(Weed)嘅代名詞喇。

 

1971年好遠啦喎,去到今時今日又演變成點?

其實依家就唔使等到每年嘅4月20號先使用得大麻嘅,今時今日世界各地對大麻嘅接納程度都好高,好多國家或當中嘅洲分都可以合法使用大麻,比如舊年嘅美國大選,有5個大州分都通過咗娛樂用大麻合法化嘅議案,另外超過半數州分容許醫學使用大麻(用嚟麻醉、止痛等)。而每年嘅4月20號前夕,喺英國、荷蘭等地都會有一系列嘅慶祝活動,當地嘅執法人員乃至一般市民都唔會有乜衝突甚至會與眾同樂,其實情況同大家見到香港警察喺九龍城同啲市民一齊參與撥水節無異,點解香港或者台灣會一見到種大麻/或者藏有大麻就即刻起哂鋼又拉又告咁,呢一點正正反映咗歐洲國家同亞洲國家對大麻嘅接受程度之間有差異問題,而呢啲問題又係點產生出嚟嘅呢?

依家美國境內合法化使用大麻嘅地方,包括醫學用同埋娛樂性則

 

望返香港同台灣,依家大麻到底係點?

上面講緊亞洲國家對大麻嘅態度對比起歐洲係有180度嘅轉變,咁我哋不如講吓設身處地嘅香港同鄰近嘅台灣,呢兩個地方同樣地係將大麻列為毒品之列,近年大家都聽唔少香港/台灣人種植或者收藏大麻畀人揭發呀、大義滅親之類再畀人拉咗然後定罪,可笑嘅係兩地之間,特別係香港政府同執法人員將大麻歸類為毒品,但偏偏政府同社會大眾平時就甚少討論大麻,結果大麻就好似去咗Grad din嗰位那年十八嘅毒撚咁企埋一邊,無人想知無人想理咁,係近呢兩年個政府先係咁易喺啲禁毒廣告到拉埋大麻落水(睇返香港保安局禁毒處係上年,即2016年先針對講大麻),跟手又係一如既往公式化咁show完「大麻」兩隻字,搭多句:「企硬,_ _ 衰硬!」情況如同台灣啲法務部、衛生福利部部等等跟住啲條文淨抽大麻有害成份出嚟講:「大麻當中的社會危害性、成癮性、濫用性會危害國家安全。」其實呢兩個地方嘅政府部門都對當中嘅負面評價選擇避而不談,解釋都欠奉,淨係擺出一副「我話有問題就有問題啦。」嘅姿態出嚟。

老實講,筆者淨係覺得呢種玩法只係行緊愚民政策,針對住市民對大麻無認知嘅狀況,政府就踩多兩腳,順勢再定性佢做毒品,畀多啲標籤同污名佢洗吓大家個腦,咁就慳返唔使拗。不過真係唔好意思,多得香港嘅填鴨教育做得夠差,差到我哋唔獨立自主咁去思考問題都唔得。係咪只要政府定性大麻做毒品,大家就唔使再了解大麻係一種乜嘢嘅產物呢?答案唔使講都知,所以喺其他國家嘅政府同市民先會對大麻有進一步討論,繼而集成議案將大麻各種用途合法化。世間本來就無萬惡之物,但當權者恃勢凌人呢點其實仲毒過毒品,一個披住偽民主皮毛嘅獨裁政府,只會助長、甚至產生更多非法交易同行為,最尾咪又係市民埋單,得不償失。既然係咁,我哋係咪好應該開放返對大麻嘅討論,畀大眾知道返大麻嘅利弊先再幫大麻蓋棺或合法化呢?嗱,咪話呀叔我唔教精淋病穴鵝,呢啲無成本又可以修補社會撕裂嘅方法,點解唔做?我先唔想佢幫手將 _ _ 用大麻合法化呀。

 

延伸閱讀:

4/20國際大麻日:不美化、不恐嚇,透過科學來重新認識大麻

(曲到直)香港為何竟容不下一個農夫? - 兼論香港本土農業的潛能

 

大麻引申出嘅香港次文化

其實大麻喺香港政府努力同堅持不懈之下(平時做第二樣嘢就揸流攤或者卸膊)塑造到一個極負面嘅形象都好,都仲有一班創作家同後生仔幫大麻整咗啲Facebook Page或者寫歌/二次創作出關於大麻嘅作品,因為都比較多,恕筆者揀咗啲比較想同大家分享嘅列出嚟,大家有更多提議不妨回覆補充呀。

Facebook Page方面就有:

420HK(拎咗佢哋個教材出嚟分享畀大家,有興趣可以睇吓)

香港大麻協會 HK Cannabis Association – HKCA

抽大麻會讓你腦袋壞掉_Smoke Weed Is Bad For You(雖然呢個係台灣嘅,但實在太精彩要貼堂)

 

而創作類嘅大家都可能好熟悉,分別係有中出羊子參與填詞,由The Smoking Bear主唱,二次創作咗《自由花》得嚟嘅《大麻花》:

//但有一個夢 不會死 種大麻
無論雨怎麼打 大麻仍是會開花
但有一個夢 不會死 種大麻
來自你我的心 種大麻//

 

另外就係My Little Airport原創嘅《今天沒大麻在身》:

//我的煩惱不是沒有照顧好父親
亦不是看見他變成衰老的人
no, non, いいえ, 不是憂慮無處棲身
而是今天沒大麻在身 而是今天沒大麻在身//

 

可能你睇完以上嘅資訊會見到使用大麻並唔係一種唔見得光、要收收埋埋做嘅嘢,總之大麻唔係你一掂到就會上癮、會死、要去坐監之類,咁當然喺現時嘅香港大麻係非法嘅嘢嚟,但呢件事並唔係由當權者話係就係,大家都有權利去知道呢啲規則、法例係點制定出嚟,並唔係盲目地做條應聲蟲,人哋話係你就跟住話係,無論喺大麻定係其他事上都好,不論你年紀大小,呢啲公民權責都係與生俱來嘅,唔好畀藉口自己逃避、懶理。懶吓懶吓,好快你就會連隻車都畀人食埋。

 

關於作者:健華

90後廢青,如果你認同我的文章,可以多留意一下輔仁媒體的廣告及其他文章,以表支持,如對文章有任何疑難,歡迎PM。fb: https://www.facebook.com/KelvinKinWa.7

則留言

閱讀後覺得好,請多多讚好及分享~:)

其他熱門文章

  • PTGF 有咗餡,唔想生又懶得落,可以點? by 神婆
    男子唔想阿媽再受驚,一嘢拉咗個女仔去樓梯,大約係講「妳再玩嘢我就報警」之類嘅說話。我睇到呢度已經覺得呢件事嘅發展好Dramatic,但真正難以想像嘅嘢,而家先開始。…
  • 寶寶抽煙,但寶寶不說 by 的士陳
    見多識廣嘅朋友,應該一睇就知,女神手上嘅係iQOS;一款由煙草商推出嘅電子產品。而Angelababy嘅回應,其實相當巧妙,充分應用邏輯學上訴諸無知謬誤去為事件解畫。正如當年有記者問Baby有無整容,佢答人話箍咗牙;同梁振英回應護老院虐老風…
  • 買避孕套或者食避孕藥係咪真係咁難? by 神婆
    首先,個女仔今年十七歲,未讀完書;經手人(經佢推斷)係一名三十幾歲單身男子。女仔發現有饀之後,第一時間同個男人講,咁人地梗係唔認數啦:「點知妳出黎做會唔食藥架啫」「妳接幾多客我鬼知啊」「妳話加錢可以中出架」女仔好嬲咁同我講返當時男方嘅說話,…
  • 女人要脫離「不幸」 by 三個水
    女人際遇不好的時候就會想「最多咪嫁人」。如果本身財政、家事一團糟,處處需要人去照顧,東不成西不就的人,嫁人,不過是從一個家庭的包袱,轉讓成另一個家庭的包袱。所以,嫁人,又叫找個歸宿。我不是男人,已經覺得女人天生投胎是easy_mode,男人…
  • 女人的賞味期限 by 喜言
    女人的賞味期限是在十多歲至四十歲左右。如果將近四十的女人保養得好的話,美態可以多延幾年。而到五十、六十仍保持吸引力的女人,屬極端例子,不提。坊間有個講法,說男人幾時都鐘意十八廿二的女人,其實不然。好多廿零三十甚至四十的女人好多都仲風韻猶存,…
歡迎讚好我們的facebook page,免費資訊源源送上。