如果妳覺得追男仔好難,可能因為妳以為追就係跑過去追。

 

(photo via cc Flickr user Rafael Castillo)

 

好耐以前稍稍提過下點樣追女仔,有一啲讀者都問過我點樣追男仔。

坊間好多文章講點追女仔,比較少講點追一個男仔嘅原因,除左大家都慣左男追女,倒返轉好似顯得自降身價,導致好多女仔可能好想知,但唔知點開口。另外,因為男人比較膚淺些少,女仔個外表佔嘅分數太重,導致好多方法其實係要好靚先會「有可能」work,例如古人Santino嘅戰略 : 45度角溝仔(自行翻閱相關資料)。老實講如果你生得麻麻,男仔搵你傾計,你企45度,保證你連少少機會都無埋。

呢樣野好似女仔睇男仔咁,本身男仔嘅外貌、學歷、收入、都會成為門檻,其實呢啲男仔都睇架,不過外貌佔既比例大好多姐。我諗靚女發姣多人追就大家都清楚,正如靚仔有學識人工高追女仔方便啲一樣。咁當然你話你本身就喺食物鏈最上層嘅話咁乜都唔洗傾啦。如同上次追女仔一樣,依家想探討嘅係,如果你本身條件唔係咁好嘅話,有啲咩係可以主動爭取。

正如叫男仔上進啲,搵多啲錢,約會嘅時候個人企理少少咁,女仔平時都唔好咁懶,買返幾件戰衣打扮下——呢個係異性嘅要求,你可以鬧話點解男仔咁注重女仔嘅外表,膚淺狗公無內涵……等等。正如無時無刻都有人鬧緊女仔未一齊就睇男仔搵幾多錢一個月咁,呢啲野各取所需,你覺得自己一個人無問題,唔想參予世俗嘅規則嘅,真係完全無問題,我甚至有啲欣賞你添!其實依家咁多娛樂,一個人生活,唔洗同其他人協調,生活更加自由自在。

但係,如果你都想嘗試下愛海浮沉嘅滋味,首先真係執正左自己先。唔洗太over,搵個衣著好少少嘅女仔朋友教下路,你話你係宅女無朋友嘅,上youtube睇下啲有化妝嗰啲女仔,特別係同自己差唔多身型嗰啲女仔,上鏡嗰時大約會著啲咩,抄返個八、九成,醜極都應該唔會死得人嘅。

然後,放開所有嘅幻想,依家唔係韓劇日劇,唔好再覺得完全唔郁,都會有人主動黎了解你。依家時代唔同啦,香港讀書做野壓力咁大,科技發達到無限咁多娛樂,要一個男仔真係好想追個女仔,追到返黎又要各方面維繫——起碼要哄同比錢食飯先,咁你要有野吸引到人囉。

男仔追女仔嘅原則,基本上得一條——回報高過風險。

追一個女仔本身都有成本,諗方法投其所好,主動約出黎又怕比人拒絕,你必需要提供到誘因,一個男仔先會咁做。咁如果追每個女仔嘅成本大致上差唔多,都係睇下戲食下飯展示下急才風度同細心。假設每個男仔都係認真嘅,唔係諗住同時追好多個,或者暪黎暪去有七個女朋友,名額得一個,咁當然搵個最值得all in架啦!

而人呢,係唔會

而值唔值得,就有兩個方向睇嘅,你可以增加佢嘅回報,例如變靚自己/令自己變得好了解佢/有共同嘅興趣/佢失意嘅時候安慰到佢……等等。或者,減低佢個風險,比多啲Signal 佢,當佢初步認識你嘅時候,做多啲野,換言之,減低佢尷尬嘅機會。

 

先講左減低風險。

如果你同個男仔嘅距離係十步,你唔可以行多過四步——你係要引佢追你,而唔係你去追佢,原因?男性是天生的狩獵者……唔吹到咁威啦!男人天生賤骨頭掛,總覺得主動黎搵自己嘅係伏伏地,唔想take太大嘅risk,但又唔可以完全無,享受唔到個樂趣。呢種概念其實好常喺男人度出現,例如其實男人係好怕女人蠢,但同時又怕佢醒過自己……等等。

姐係點?小朋友心態囉,又要enjoy玩嘅過程,又唔想輸嗰隻。所以你真係好似男追女咁「狩獵」返個男仔轉頭,其實係破壞左個遊戲,亦都係女仔成日講主動追唔矜貴嘅道理,意思就係做得太多。

追男仔,真係唔係趕狗咁追法,你咁追,人地就會走。

咁具體點做?行動前記左以下呢句心法先,以後所有行動以呢句為依歸。

 

「我係唔會黎追你,但我會比你知我嘅喜好,我嘅困難,從而不斷比機會你發揮。」

 

假設你係一般女仔,無咩特別長處,面皮又薄。依家唔洗諗任何色誘呀,志趣相投嗰啲,首先當你做唔到咁高難度嘅野,咁執正左你後天可以努力嘅化妝同衣著之後(講左幾次啦真係重要,認真聽,多謝合作。)你要做嘅,唔係盲目去chur個男仔,更加唔係倒轉約佢去街……而係……

喺朋友嘅交往之上,有意無意咁提出你既問題(problems),但唔提供任何解決方法。我知係有少少玄妙,所以我已經準備好例子。

例如話「呢間餐廳啲抹茶雪糕好好食呀,好想去!」(如對綠茶婊敏感,請自行改為其他食物)

例如話「份功課就Deadline啦,我又唔識做,睇黎呢兩晚無得訓啦。」。

例如話「套戲就黎落啦,我好想睇呀!」。

大家都聽過呢啲說話,呢啲說話收兵得黎係咪有少少內斂。無錯,依家要吸引男性,就係要令佢對你有種為你犧牲嘅狂熱,兵之所以為兵,因為女神從來都無打算同佢一齊,如果你係打算接受佢,咁佢就係駙馬爺,再無道德上嘅爭議。

掌握方法,唔等於你要拎黎收兵,「給妳一柄手槍 給妳一發子彈 不等於要放進誰的胸」,潛龍勿用嘅智慧,十幾年前已經有教。

以上方法多見於messages,文字收兵往往係利器,因為唔需要演技,又有鬼五馬六emoji幫手助攻。男人天生會藉住解決問題黎顯得自己更有價值,呢個概念就係令佢地入局嘅第一步。現實執行上都要留意兩個問題。

1) 實際解決問題嘅難度

唔好搵啲太難達成嘅任務,原因好簡單,因為太難人地未必幫你。你係「永遠都唔會」直接開口叫人幫,只係會提出你依家嘅困難。你話帶唔夠衫而凍嘅,如果距離係近嘅,男仔都仲有可能過黎買杯熱朱古力比你,但個男仔住青衣,你喺將軍澳圖書館,咁不如算啦好嘛!

2) 身價

唔好講啲自貶身價嘅說話,你唔係奇貨可居,都唔好無啦啦話自己約唔到人呀,無人陪呀呢啲。例如你話有套新戲想睇,個男仔問你咁做咩唔去,個答案係好淡咁講「唔會自己一個去睇架嘛。」而唔係賣慘情「因為無人陪我睇」,原因?前面嗰句防守性高啲,比人已讀不回都唔會好難睇。

後面呢個答案只得一種情況會講,就係你知贏面高,甚至乎食硬佢,先至會咁樣直接收割。

呢種女仔專用嘅講野方法可以講係立於不敗——佢幫你就如你所願,唔幫你亦都唔會核突,以致影響到觀感同成個對話既氣氛。主導權永遠喺你度,佢要出黎幫你,想博個interview,你隨時可以好合理咁拒絕。記住個概念——你唔會主動求救,唔係八婆唔係煩膠,但你滲個concept比對方知,可以黎幫助你,從而搏取一齊嘅機會。

以上係基本中嘅基本,呢啲方法亦都無咩門檻可言,唔需要靚,唔需要面皮好厚,容錯率都高(你要真係一日講幾次人地先會覺得你煩)。你有時會見到好多唔算好靚嘅女仔桃花運好好,多數係呢啲技巧用得好。會收兵嘅女仔,除左知道點樣去搏人幫佢,對之後「如何有效地reward一個幫過你嘅兵仔」有進一步嘅研究,呢個課題我之後再講。

 

你渴望愛情,但係唔好急,首先搞返好個心態先。

有件事我覺得所有女仔都要知,追人係一定要隱惡揚善,我聽過好多女仔講話要等一個岩嘅人,會完全接受到佢嘅人……

呢句其實又唔係錯,但都唔係Day 1 就比晒啲缺點人地睇架嘛,好多女仔拎住呢句就開始任性,巴渣八婆爛口是非精乜都出晒黎,但同時佢地又會拎啲社會標準去要求男人,話依家啲男人唔夠細心唔識讓女仔等等。喂,講道理丫,邊有男人天生有風度識讓女人架,咪又係喺成長過程慢慢領悟返黎……我指領悟到點扮出黎。

呢個世界係無野唔洗學,同埋無野一定得架。如果你想爭取愛情,一定要知道促成拍拖呢件事,本身就係唔自然。以前你以為唔覺唔覺一齊左,兩情相悅嘅野,其實係經過好多男仔諗過度過先拎出黎追你嘅招數。依家你要主動出擊,就要知道現實係點,再去用相應嘅策略去達成目標。

靚女容錯率高,咪可以用啲賭博性高啲既招數,你用啲穩打穩扎嘅方法,理解左男仔個習性先,然後當佢係兵咁收伏,再慢慢步向完美嘅戀愛結局。

打左好多字,第一課就係咁先。結尾都要講返聲,行不義收兵者,五雷轟頂,不得好死。

 

 

關於作者:求其花

求其寫,求其賣,求其志不求奢華|求其真,求其愛,求其花不求其果

則留言

閱讀後覺得好,請多多讚好及分享~:)

其他熱門文章

  • 新同事,唔識記住要問人呀! by 扮工室の膠秘s
    花生友:「喂新同事,你個email_id係咩啊?經理叫我send_email要cc你。」新同事:「無啊。」…
  • 真正既朋友係咁樣寫Postcard既.. by 港女友
    寄卡畀我既係中學既好朋友,而我印象中佢都唔係第一次令我發笑,有次寫左「朋友我當您一世朋友」,有次佢去左澳洲寄左張佢攬住樹熊既鋪卡畀我,我指係真係有佢個樣係鋪卡上面!我媽第一時間問:呢個人係您朋友呀?係。我諗澳洲同香港既郵差應該都想問我...…
  • 不懂得愛,不懂得我,別親我 by 焦總的蕉很腫
    有晚送佢返屋企個陣,佢拉左我去後樓梯,過程大家都好投入好激烈,第一次有人對我講老公我愛你,第一次有人對我講好鍾意我插係佢入面,第一次有人問我感唔感覺到我同佢合二為一。 …
  • 馮盈盈都叫唔造作,咁麥美恩叫咩? by 小盛女
    無可否認,人靚真的比較多著數,至少兵都可以收多一點,發姣都可以稱為不造作、率真。說句公道說話,盈盈都算靚,雖然比她有氣質/靚的藝人也大有人在,例如李佳芯、黃心穎等,但盈盈都叫做比上不足,比下有餘。靚也分很多種,清純的、詩文的、誘人的、可愛的…
  • 校友會上的野獸與餓狼 by 單字晴
    為什麼我會想起《美女與野獸》?因為我眼前確實有一些野獸,可惜伴隨野獸的不是貝兒,而是一隻隻餓狼。三大畢業的男生,即使沒有城堡,也有一隻「三斤釘的小船」,襯得起貝兒有餘。但「三高」中女卻不是清純的美人兒。所謂女人三十如狼,四十如虎,餓狼們遇上…
歡迎讚好我們的facebook page,免費資訊源源送上。