PTGF 有咗餡,唔想生又懶得落,可以點?

 

 

喺你開始睇呢篇文之前,請先睇咗上集《買避孕套或者食避孕藥係咪真係咁難?》先:)

上回講到女仔客占完卜走咗,但其實佢最終決定係生定唔生,我係唔知道的;一來我唔會主動追問,咁樣就已經違背咗我工作性質了。至於主動搵我嗰啲,都唔代表我會即時覆啊,例如半夜一點想傾計嗰啲,對唔住,有事請另行預約占卜,神婆都有放工時間的:(

但係呢個客喺半夜兩點連續 Message 咗我幾次,我忍唔住睇咗;睇完,我好嬲,嬲到喊嗰隻嬲。

佢唔打算生,因為佢驚生咗搵唔到男人。
佢亦唔打算落,因為去婦科貴。

但係女仔客搵我嘅時候,佢話佢喺醫院。

事緣係咁。女仔客知道疑似經手嗰位男子住邊,於是,佢搵上門,對方個媽媽開門。

「你個仔搞大我個肚唔認數,咁點計先?」

屋村伙數咁密,仲有啲人家鍾意鎖閘開大門扯風,其實就真係無秘密嘅。個女仔咁樣嗌一嗌,隔離鄰舍自然就個個裝個頭出黎睇吓咩事。

男子唔想阿媽再受驚,一嘢拉咗個女仔去樓梯,大約係講「妳再玩嘢我就報警」之類嘅說話。

我睇到呢度已經覺得呢件事嘅發展好 Dramatic,但真正難以想像嘅嘢,而家先開始。

「我諗住大家做過咁多次,點都會對個肚有啲感情,」女仔客個 Voice Message 咁講,雖然我生平至憎就係 Voice Message 但客人是至高無上的所以我點都會聽,「我想佢緊張,所以我自己轆落樓梯囉!」

我聽到呢度,呆咗。

「我計過架,我呢排日日飲凍嘢,個肚應該好虛架喇!如果因為咁,佢心痛,肯認數,我咪生囉;如果轆落去無咗個肚,變急症流產,我咪唔駛睇婦科囉!」

我聽到呢度,終於忍唔住喊咗。
當時又係咁啱同輔仁上下打緊 PS4,大家聽到我無啦啦爆粗流馬尿,全人類又係呆咗,「咪理佢啦」「由佢啦」「唔識自愛咪算囉」……

但係,我真係好嬲。

我唔鍾意小朋友,亦唔打算生:一來個社會環境問題,二來我自問我享受自由,三來我並唔成熟⋯⋯話題扯遠了。當然我亦見過好多不負責任嘅父母個案,但因為自己懶,變咗肚入面嘅生命;而呢條生命,已經有心跳有形狀,卻成為咗佢母體去搏得男人同情甚至金錢嘅道具,就算生與死都無人在意⋯⋯

最後女仔客咁樣轆一轆,佢話流咗好多血,但個肚仲喺唔喺度,佢無講,我都無問;或者咁講,我唔敢問。我只係好無奈咁覆咗佢一句「Take Care」,就將佢個名擺入我嘅 Blacklist 入面。

雖然我唔想寫性教育文,但係如果唔想生仔,請做足安全措施;戴安全套又好,女仔食藥又好。喺呢單嘢之後我去萬X 屈銀紙嗰啲地方望過,避孕藥一舊水至三舊水都有,一個月份量;真係怕貴嘅,去母嬰健康院或者家計會查詢,好似平好多。

總之,唔想生,就唔好搞出事:(

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。