《Mario Kart 8 Deluxe》3000分 Online 小心得

 

上一篇《極速寫完Mario Kart 8 Deluxe攻略》我講過,想贏,首先你架車要快。

但成篇野最後我都有講返,當大家都差唔多咁快嘅時候,又會變返道具戰。

當你捱過左一輪 100cc 嘅慢駛抗議之後,爬上左3000分,你就正式踏入左呢個道具戰嘅世界(同埋亦都可以同 100cc 講再見)!

 

1. 道具戰?運氣嘢黎嫁咋喎,我抽三隻紅龜,你抽一條蕉,你點都要比我打停嫁啦!

無錯,道具戰的確係運氣野黎。
呢個世界,玩一場、兩場、甚至十場、二十場,你玩緊嘅都係運氣!
但當你要玩100場、200場、甚至1000場嘅時候,就係統計!

我總共玩左 205場 Online Play,分數而家係3502分,底分1000分,即係話,我一場平均其實係拎 12.2分左右,一場齊十二個人嘅 Online Play,第四大約會拎16-19分,第五就係9-12分。

 

 

咁我覺得作為一個打機白痴,勉勉強強算合格啦。

而呢一個平均12.2分,佢受運氣嘅影響其實好細嘅,因為你無可能場場都比人係第三個圈終點線之前比人用藍龜(我都係鐘意叫佢做「第一龜」,專打第一嘅龜)打你,你亦都無可能場場係第十二拎星星加金菇,然後有人幫你電停全世界比你上)。呢D情況會發生,但係佢唔會每一場都發生,佢十場出現一次,二十場出現一次又好,呢個「平均」嘅運氣值其實已經融左係呢個數入面,而好運同唔好運,到最後係會好奇妙咁剛剛好 Balance 左嘅(至少我地要咁樣相信),呢個平均分,係一個純實力嘅數。
亦可以講,如果你連續玩幾百場,場場都咁好運,我有理由相信,你嘅運氣係你實力嘅一部份。

呢個係我公司入面打得最好果個同事嘅 Record,佢 4747分,276場,平均一場大約係13.576分(都話我係打機白痴)。

 

 

我用1996年大富翁世界盃總冠軍畢華流先生嘅一句說話總結呢條問題嘅答案:「運氣,係公平嘅使者。」
即係話每個人都有好運同唔好運嘅時候,而運氣對Mario Kart嘅單場勝負影響係好大嘅,當你打幾百場嘅時候,你要諗嘅,係點樣係好運嘅時候利用好你嘅運氣贏到盡,同埋點樣係唔好運嘅時候唔好輸得咁甘。

2. 咁點比心機打呢?點先會贏呢?

黎到呢個階段,除左架車要快(呢個基本),你要贏,就要用道具用得合理。

你諗下以下一個情況:150cc,你拎住三隻菇,你對手又拎住三隻菇,你地而家係 Toad Harbour 最後一排箱果個位平排。

 

《呢個位》

 

你要點樣先會贏佢?

前面最多可以連續食兩個加速台,最後右邊有個草地內灣,最理想嘅噴法應該係:
噴,加速台,熄火前再噴,再加速台,內彎草地前掟彎,一入草地再噴。

咁如果你對手揀左左邊條細路,又或者佢係個加速台度噴(Double左唔計),又或者佢食少左個加速台,咁你就贏啦。

即係話,你每用一個道具,都要令你自己架車快過其他車一D,又或者令人地架車慢D。

 

以下我揀幾樣我覺得好重要嘅道具講下General用法。

– 菇/金菇
菇真係好重要,因為,我唔介意再講多一次,呢隻Game,係鬥快嘅,而菇就係加速道具,而且唔使包尾都會抽到。
而菇最好嘅地方,就係用黎行OffRoad嘅內彎或者捷徑,每條賽道或多或少都有D位噴菇係快好多嘅,咁你抽到菇嘅時候,就可以考慮留唔留返黎係果個位用。
通常我遠過一個箱位我就唔會留,一黎下個箱位可能再抽到,二黎而家好多時都有鬼,拎住三隻菇比人用一條蕉或者兩蚊換走都係好不爽嘅。
除非真係完全無位偷(N64 Rainbow Road真係有菇可以立刻鳩噴),否則唔好直路用菇。

– 星
星獨立用個加速好少,同樣可以行OffRoad,但賺得唔夠菇多。
上到3、4000分呢,人人都識睇小地圖,你有星,其實人地係唔會電的(唔好天真)。所以星星其實可以亂用,除非有D OffRoad 位你留左係好有用。
因為你手捧住粒星唔用,然後比人用綠龜掃中嘅感覺應該一D都唔好,係咪?
另外,記得你有星星時,係同時可以噴菇嘅!(我都要成日提自己)

– Lucky 8
Lucky 8 你留低唔用,放係度轉係會比人用鬼食走嘅。
然後撳制時佢會直接用你正前面果一粒,所以其實係有得揀嘅。
建議無論如何都要先掉舊炸彈去後面,然後食左粒星,之後其他就隨意。
因為我係無能力好好咁運用呢八舊野,每次抽到,我都只係想送走佢。
我知好多高手用得好好,可惜唔係我

– 一隻紅龜
如果我第二,我抽一隻紅龜呢,我一定會用黎擋後面。
點解?因為我後面係一定都會抽到紅龜嘅!我好有信心!
前面條友?自然有法律會制裁佢嫁啦!我指第一龜(藍龜)呀!

 

 

– 三隻紅龜
三隻呢,千祈唔好好似D初學者咁機關槍咁射出去,佢比人打停左係有無敵時間嘅,個時間大約係秒半至兩秒左右,通常我打完一隻,數123,先會再打第二隻。

– 火
垃圾黎嘅,亂咁掉啦,中咪中,唔中咪算。
因為佢難中,所以佢擋唔到嘅,但又因為佢射程短,所以真係好難中。
用黎防守都 OK,記得響聲會越黎越密,夠近先掉,唔使一次掉晒六粒。

– 閃電
記得睇小地圖,有人有星等一陣,如果唔係你係幫佢上第一嘅啫。
如果有時間可以等第一果個飛緊車再劈更佳。

– 第一龜(藍龜)
自己拎第一龜就第一時間掉佢出去啦,佢有排飛先到。
而家要講嘅係,你排後面,一定唔可以比隻第一龜掃中,佢「多數」行條路嘅正中間,無錯,係「多數」,請好好練習,玩多幾鋪,記熟第一龜嘅飛行路線。

 

3.講左咁多道具嘅留放,其實有個更根本嘅問題未講,就係食箱!

因為如果你食唔到箱,根本就無道具拎到,咁打條毛咩,食唔到一個箱,係傷過比龜打停的。
所以,千祈!千祈!千祈!唔好食唔到箱。
換句話講,首選梗係食孖箱,但你咁諗啫,你前面果個人都係咁諗家嘛。
D箱有重生時間,你要捉好同你前面個人嘅距離,因為佢有得揀的話,佢都係會食孖箱先的,咁你見佢食左個孖箱,如果你覺得佢重生得切嘅,咪繼續行去孖箱囉,如果唔得嘅,就食隔離個單箱囉。
總之!千祈!千祈!千祈!唔好食唔到箱。

你第三個圈食唔到箱兩次,基本上你已經一定會包尾了。
好多時我會用菇噴上去搶箱添。

 

4.其實你有個制叫倒後鏡

 

或者你從來都撳過果個制,因為佢好唔就手,但其實佢係有用嘅。
佢可以幫你阻止你後面果個人食你風,其實食風係要好長時間嘅,你聽到聲,可以睇一睇佢,左右避下等佢斷,又或者,拎D 野出黎放係你後面,等佢食風食著龜。
因為食風真係快好多的。
我又又又唔介意再講多一次,呢隻Game,係鬥快嘅。

 

5.我發現我真係好黑仔,鋪鋪都比人係終點線前第一打落第8-9,心都灰撚埋

梁詠琪話:「越爛既牌就要越俾心機打」

 

屌你老味第六抽一隻蕉!
唔緊要,做好自己,拎好條線,準備下次再抽箱,通常今次個孖箱就會係星加三菇,好好地用,咁又上返去嫁啦!
如果都仲係一隻蕉,唔緊要,仲有下場丫嘛。

機會一定會黎,你一定有方法返上去前面,如果好多場都返唔到上前面,咁你應該要還原基本步,練返快架車先!
機會呢樣野,你就係要相信佢會黎!你就係要為佢黎果日你準備好!呢個世界唔係奉旨要比機會你嘅!
人生就係咁嫁啦,機會唔係時時有,無嘅時候唔好鳩衝,有嘅時候唔好鳩縮。

咁就自自然然有好成積嫁啦!

 

 

 

關於作者:Katarina Prestor

Katarina Prestor
好想寫小說,但寫親都無人睇。當然我唔覺得係自己問題。因為呢個世界上,當問題出現既時候,永遠都係人地有問題。https://www.facebook.com/katarinaprestor

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。