《猿人爭霸戰》唔係咩神作,但就係荷里活近年嘅良心之作

 

雖然唔係咩驚天地泣鬼神嘅燒腦神作,但我欣賞呢個系列,係因為佢有別於現今一般荷里活大片嘅「濫」:

同普通大片一樣,《猿》都有CG視覺效果,但呢個年代嘅觀眾唔多唔少都已經睇厭《變形金剛》、《超人大戰蝙蝠俠》嗰種狂轟濫炸,完全係將視覺同故事嘅莊閒關係掉轉晒。視覺效果係應該被用作協助講好故事而存在,呢套系列唔會見到幾多千軍萬馬來相見嘅視覺奇觀,猿人唔係征服地球,而係純粹為咗保衛自我尊嚴嘅反擊,場面亦都係經過角色之間嘅衝突而出現,見好就收,相當節制;當然動態捕捉技術常客Andy Serkis亦功不可沒,將主人公凱撒矛盾到極嘅一生,表現得幾乎無死角。

故事內涵以至處理亦都明顯係有用心之作,凱撒由溫室小花變成猿族領袖,由依賴人類到對人類死心,都係經過人類劣根性以及叛變者陷害嘅洗禮;人類想由醫治老人痴呆症進而妄想操縱自然法則,到頭來反被自己發明滅絕;編導亦喺不經不覺間已經將觀眾嘅代入感成功移情(冇人敢希望人類打贏猩猩啩?),系列著重凱撒經歷內心轉變多於展示一場大龍鳳,映射政治嘅主題亦夠深入淺出,亦係呢個系列其中一個可觀之處。而且亦見唔少向經典電影致敬嘅影子,由第一集《飛越瘋人院》(One Flew Over the Cuckoo’s Nest)、第二集《獅子王》(The Lion King),再到而家第三集嘅《現代啟示錄》(Apocalypse Now),都係別具心思。

但作為一套商業片,當然都有屬於呢個界別嘅主流規範及小通病,的確都令人感到有大成若缺嘅感覺。除咗某啲必然嘅主角光環,最明顯就係「思想西方化」,當猩猩智力提升到越嚟越接近人類,但溝通以至思維亦只能夠跟隨返人類主流思維,如果放低商業片包袱,其實設定上可以去得更盡;細節處理上,其實就算猴子猴孫一個簡單肢體語言,大可以嘗試俾觀眾更多想像空間去猜度。而第三集暫時都普遍被人詬病節奏慢,筆者呢點就有所保留。

冇錯,佢嘅成就未必及得上《魔戒》、《蝙蝠俠》呢啲史冊級嘅三部曲。但喺呢一個視覺垃圾充斥嘅年代,佢已經係一小道清泉,值得大家觀賞、咀嚼、反思。

 

 

關於作者:Hinnie @ 廢青吹戲台

Hinnie @ 廢青吹戲台
https://www.facebook.com/faichingblowfilms 每周,一晚,Facebook Live。兩個廢青同你有氣吹戲!

則留言

閱讀後覺得好,請多多讚好及分享~:)

其他熱門文章

  • 地鐵 by 李天恩
    生活在香港這樣的都市,女孩子們基本上都能從對方的衣著、裝扮、服飾及姿勢態度上得知許多資訊,從經濟狀況到住在哪一區,大致都能看得出來。我瞄了瞄自己的手腕,同時察覺那兩位女孩都偷偷督向我左手配戴著的卡地亞手錶,這隻手錶一般不是我這個年齡的女生有…
  • 雞之報應 by 霏子
    二零一四年嘅春天,阿海同阿琪仲讀緊Year_One,阿海仲未識到Miki,同阿琪仲係好friend。嗰一年,佢地見證咗一場悲劇,阿海稱為「雞之報應」。 …
  • 我係搞手我係狗(二)——「啲女係咪處?」 by 霏子
    屌,我知你有畀錢,但都唔使咁過份,問埋我啲女係咪處㗎?我班女都係畀同一個價㗎咋,咁佢地係咪又可以要求你有超強御女術呀?呢條友真係當正我係媽媽生。最後,我冇追問佢嚟唔嚟,而佢都係嚟咗。…
  • 影帝在身邊 by 睜開雙眼做場夢
      人生就像一套連續劇,每個人都是一位演員, 由睜開雙眼開始,都在演繹著屬於自己的戲份。 在平淡的一 […]…
  • 第一次約會?要唔要睇戲特登挨落佢膊頭,要唔要胸壓佢? by FAKE 文青
    首先要化個淡妝,所有大眼仔,濃妝not_ok…
歡迎讚好我們的facebook page,免費資訊源源送上。