唔化妝返工原來都係一種罪

 

「Brenda,其實你返工有無化妝㗎?」腦細Michael突然問。
「我淨係查咗少少有色防曬咋。」我說。
「佢不嬲都無化妝㗎啦,80後青春吖嘛。」70後同事May說。
「下!乜你連唇膏都唔搽㗎?唔係掛?」90後同事Bibi驚訝地說,無啦啦佢又答嗲。
「我剩係返工無搽咋嘛。」我衝口而出地說,講完其實都知瀨嘢。
「哦,即係你唔尊重公司啦?」Michael說。
「梗係唔係啦,我專注喺我嘅工作度嘛,其實平時出去開會我都有化㗎。」我說。
「公司日日都好多internal meeting㗎喎,即係唔尊重公司內部啦?」Michael說。
「哎呀腦細唔好玩我啦。」我說。

雖則腦細係笑笑口講,半玩嘢成份,但係其實我都算半瀨嘢。因為公司嘅女同事十個有九個日日都會化妝返工,只係得我同小貓一兩隻係無化。以前我做PR,日日都要化妝返工,執靚個人,因為隨時都要去見客,正所謂唔打得都要睇得,但係而家轉咗做Marketing,基本上都唔使點見人,只係久唔久要出去開會,所以我就開始越來越hea,搽防曬就算。

須知道化妝其實真係一件十級煩嘅事嚟,首先每朝本身已經要做一堆護膚程序,即係洗面、搽爽膚水、面精華、眼精華、面霜、眼霜同防曬,然後先可以開始化妝。化妝又分好多部份,先查BB cream打底、再上粉、搽眼影、畫眼線、搽睫毛液、畫眉,最後查胭脂同乾粉定妝。你知朝早啲時間幾趕㗎啦,有時真係瞓得一分鐘得一分鐘㗎嘛,邊有時間搞咁多嘢,加上我又唔係熟手,最怕就係畫眼線,手要好定,畫得夠貼先好睇,有時唔小心震咗一下又要由頭再畫過。

好喇當我真係早啲起身搞呢場大龍鳳,其實夏天咁熱,基本上我化完妝,由屋企行去地鐵站已經溶咗一半,落地鐵行返公司又再溶埋嗰半,其實已經溶到所剩無幾,同無化無乜分別,咁我化嚟做乜呢?無錯我係可以返到公司先化,咁我食完個lunch咪又係溶晒。我係可以補妝,不過好煩囉。再者,落妝又係另一樣好煩嘅事,落得唔乾淨仲會好易起粒粒。我覺得最難落係眼線同眼線液,抹極都仲係黑色,而且我畫到好貼眼,好鬼難落。

其實返工化妝係咪真係咁緊要?我努力做好我嘅工作咪得囉。當然,我都明白有時化咗妝個人睇落係會精神啲,人係適當嘅時候亦都要包裝下自己,但係唔使日日掛?而且有時我覺得化咗妝但溶咗又或者係眼線花咗、睫毛液印到眼底黑咗,其實咪仲衰過無化。隨住年紀增長,我都知道終有一日我都可能會變成一個唔化妝就唔出得街嘅女人,但係唔係而家囉。

 

P.S. 其實我有條好蠢嘅問題想問,我見好多人都係烈焰紅唇咁款,開會有時會飲水或者食嘢,咁咪要抹咗啲唇膏先?定係有唇膏可以防水㗎?

 

 

關於作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。