【塔羅個案】上流社會的分手方式:左手機票,右手支票

 

好耐無寫文過輔仁,原因係神婆最近除咗占卜嘅生意,仲正式加入成為【VJGamer】嘅一員,所以:係呀我係賣緊廣告,睇緊呢篇文嘅你,或者妳,或者妳嘅男朋友係鍾意動漫同打機嘅,請記得 Like & Follow【VJGamer】,神婆會很高興地賜福給你~LOL

今次要寫嘅個案,老老實實,好戲劇性;同埋故事中牽涉嘅嗰位男士,喺社會上都算係有頭有面,如果開名都幾大鑊,所以,Macy(化名)係占卜完之後同我講「我想妳寫我嘅故事出黎」時,我都有啲吃驚。

 

故事好簡單。Macy,二十來歲,鄰家女孩模樣,本來為 Patrick(化名)下屬。二人相對久了,慢慢發現彼此都產生出微妙的感情。Macy 雖然年輕,但佢同自己講,要理智;所以佢喺 Patrick 變得主動嘅時候,不斷提醒對方,「你有老婆,有小朋友……」

「但係我真係鍾意妳……」
「唔好認真,唔好咁樣,你有屋企的。」
「但係我真係好鍾意妳呀!!」

就係咁,Macy 嘅心折服了,佢同 Patrick 開始咗情人一樣嘅關係。Macy 好清楚自己行緊嘅,係一條無結果、亦唔應該希望有結果嘅路;但係,至少,同 Patrick 一齊嘅時候係開心的。

「開心……就夠啦,係咪?」喺寂寞嘅時候,Macy 惟有咁樣安慰自己,「至於其他嘢,就唔好諗了。」

「唔好諗」嘅事有好多,例如 Patrick 係咪真係同佢老婆感情唔好?佢會唔會離婚?抑或會唔會有一日,Patrick 一句「厭咗」兩人就會分手呢?自己呢?自己其實真係可以唔要名份咁樣生活落去?

講到呢度,你係咪以為 Macy 突然有一日頂唔順第三者身份發難?你錯喇,Macy 一直忍耐,佢一樣煩惱都無同 Patrick 提過,佢一直逼自己理智。

唔理智嘅,係 Patrick。

十年,由相識拍拖到結婚,Patrick 而家先驚覺,咁樣就十年了。到底當時係點解會愛上呢個女人嘅呢?又點解會同佢結婚呢?原本以為生左小朋友可以拉返緊彼此嘅關係……Patrick 而家當然知道自己太天真,生仔,只不過係喺「婚姻」呢個責任上面再加多一習「為人父母」嘅責任而已,對修補關係、或者令到二人感情增溫,唔得,就係唔得。

所以,Macy 嘅出現,簡直係佢平淡生活入面嘅一股清泉,二人相處點滴,甜美而清新,對住 Macy,Patrick 甚至有種尋回初戀嘅感覺。

喺無問過 Macy 意願嘅情況之下,Patrick 有一日,擅自選擇同老婆攤牌。大部份女人對於男人係咪變咗心呢啲嘢,自古以黎,只會諗多,唔會諗少,呀老婆都唔例外。

「好,你要我離婚,咁你就同我一字一句講清楚。」老老實實,十年生活感到平淡嘅又豈止 Patrick 一個?老婆一流大學畢業,不過老公有錢,咪唔做嘢囉,屋企又有工人,基本上每日唔係行街食飯買嘢,就係跟實洗米華同 Heidi 同 Mandy 而家仲有個 Model 唔知幾多角關係嘅娛樂新聞。

而家,屋企有事,Patrick 變心話要離婚,老婆內心居然,有一絲興奮。

「你同佢上過床未?第一次係幾時?每次可以黎幾多次?有無用套?定射入去?」出身小康、名校畢業嘅老婆,都有少少驚訝自己講嘢會咁粗俗,「佢溝你?定你溝佢?你地做過啲咩?逐樣講。」

即係咁,正常人都知道呢啲位係唔需要交代啲乜嘢,變心又好,出軌又好,一夜情都好,係一個 Fact;但 Fact 以下嘅細節,其實真係無咩需要講得咁清楚。

「佢無問過我,就返去同老婆攤牌,我都算,」Macy 把聲有少少震,「佢連我地之間嘅相處細節、我地嘅床事、我住邊……連我最近去學車咁 Minor 嘅事,都話哂比佢老婆知!神婆妳話喇,佢係唔係講得太多?佢有無尊重過我都有私隱?」

當我喺舖頭聽住 Macy 重覆 Patrick 啲說話時,每一句我都覺得難聽過粗口,每講一句我個心就鬧一句: Patrick 哥,你傻的嗎?

最傻嘅係,當 Patrick 哥同老婆攤牌,見老婆好似好冷靜,就越講越多;點知老婆聽哂之後,衝入房抱住個幾個月大嘅仔,「你離吖!你離婚就一屍兩命!我話你知,我有抑鬱症,我唔怕死!」

身為過來人嘅我只可以講句,抑鬱症病人一定唔會咁好氣同你爆 seed,不過唔緊要,重點係:你以為一哭二鬧三上吊呢啲招數男人最憎?或者係嘅,但係 Patrick 受落。

「佢話佢老婆同個仔如果死,係死兩個;如果唔要我,都係傷我一個;條數聽落好似唔要我呢邊抵啲。」Macy 講到呢度冷笑一聲,但我一直留意到佢眼角好濕,我知佢只係忍住唔喊,「佢先頭話離婚,幾個鐘後就話唔離啦,仲要同我分手,因為唔想老婆同個仔跳樓死,咁會好大件事;仲話以後都唔好見啦,叫我辭職,廢事佢老婆知道我仲喺公司入面做,會受刺激又想跳樓咁話。」

「佢搞咁大壇嘢出黎,結論係連妳份工都……?」我聽到好無奈。

「我去到佢屋企樓下,我話求下你,就算講再見,都面對面講,尊重下我得唔得。但佢話佢一行出門口,老婆就要同佢離婚,佢唔想比其他人知搞大件事。結果我之後喺公司終於見到佢,佢同我講,分手,比三個選擇我。」

一、去佢朋友公司做,薪金待遇會好過而家。
二、出國讀書,讀咩讀幾耐都得。
三、空頭支票,想寫幾多銀碼,就寫幾多銀碼。

「我過兩日飛澳洲,老婆話原諒我,想同我重新黎過,想同我散下心。」Patrick 一副以為自己安排得好妥當嘅模樣。

「老婆原諒你?你將我地嘅事講到咁白,你又講到佢幾清高、幾咁有感情潔癖咁,佢點會原諒你?」

接下黎嘅部份,我聽完,個心好寒。

Macy 一臉不可思議咁同我講,「Patrick 話佢老婆好耐無試過好溫柔咁同佢講嘢,但妳知唔知佢講乜嘢?瞓醒,佢問 Patrick『係咪諗住條女呢?』、坐 Patrick 車時,一路拖佢隻手,一路問『呀唔知佢隻手好拖,定我隻手好拖啲』?神婆,妳話吖,呢啲,叫原諒?」

我倒吞一啖口水,唔係,無可能,呢啲點會叫原諒?明明就係白色恐怖,我甚至想像到佢老婆笑住咁煮飯,然後拎住把菜刀行埋去 Patrick 身邊嘅畫面……。

故事,就講到呢度。Patrick 喺呢篇文出街嘅時候已經身在澳洲,而 Macy,面對住三個分手嘅賠賞,只有心痛,同埋苦惱。喺開牌解答完佢工作前路嘅方向之後,Macy 好叻咁始終一滴眼淚都無流過,只不過佢企起身準備離開嗰一刻,佢回頭輕輕問咗我一句。

「……真係,唔好等佢啦可?」

咁樣嘅關係,咁樣嘅男人,咁樣嘅遭遇,但係,仲有已經發生而放唔低嘅感情。我望住 Macy,不禁嘆氣。

 

關於作者:神婆

神婆

非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

則留言

閱讀後覺得好,請多多讚好及分享~:)

其他熱門文章

  • 好多謝啲網民haters 幫Emilia 宣傳裸體寫真 by Cmw Boni
    Emilia嘅plan由八蚊美金去到四十美金不等,值唔值就見人見智啦,我覺得呢個世界,明買明賣,當你地班友,又要睇又要罵,咁點解唔好好利用呢個勢去順便搵下錢,就算科學家都會搵下點樣儲起行雷啲電啦,將負面嘅嘢化為錢唔好咩。…
  • 【塔羅個案】名校老師婚外情的故事 by 神婆
    大家對老師嘅印象係乜嘢?係有教無類,抑或係道德端正?我中小學都有幸就讀風評唔錯嘅所謂名校,大部分老師教學用心,係我嘅榮幸。…
  • 【堪輿命理】用術數搵「淫娃」?! by 庵念慈
    所謂「淫」,其實正確去講,就係性需求比較大,主要由於人類要繁衍下一代,所以內在某種基因自然會推動自己去尋覓繁殖嘅目標,而以我觀人於微所留意到嘅特徵,歸納如下…
  • 分手後她振作起來 by 霏子
    分手後的一個月,她如常生活。只是,每一晚她也會寫一篇日記,記下自己的痛苦。然後,晚上又會夢見他。獨居的壞處是一個人容易胡思亂想,好處是哭了不必向家人交代。因此,她每天哭醒。…
  • 人到底值幾錢?我只係值萬五蚊一個月 by 小盛女
    「喂,阿A今日無化妝啊!你睇吓佢幾殘!」、「嘩,阿B使咪著啲咁貼嘅裙啊,都唔知搏咩!」、「阿C係咪同經理有路?成日一齊食飯嘅!」每天就只有這些事事非非,比小學雞更要小學雞,而這裡的同事就只會是同事,不再像以前在廣告公司般,同事既像朋友,更是…
歡迎讚好我們的facebook page,免費資訊源源送上。