長者十誡——二十一世紀老友記生存指南

 

 

近幾十年香港發展非常快,無論經濟、文化、科技、風俗、社會形態變化相當大。年輕人既適應力好強,所以唔會有大困難。但一個老人,經歷左幾十年既生活,幾十年累積既價值觀同行動已經深印係腦海當中。面對住咁急據變化既時代,宜家既老人其實每日都遇到好多文化衝擊。近年有唔少事件發生,或大事或小事,都牽涉一個問題,就係一班同時代脫節既老人點樣撞板、發生衝突、顯出歪理、自取其辱。

所以,雖然我都好憎個啲仆街老人,但係佢地角度其實係好多野都唔明白。佢地覺得自己明明做緊正確既事,明明錯既係其他人,明明錯既係班打壞後生,點解被取笑既會係自己?

今次我釋出善意,為手足無措既老人寫一個長者十誡,向佢地解釋一下生存在當世既香港,有咩要注意。

 

1. 不可打尖

排隊請行埋條隊去排,唔好企埋一二邊,放低把遮放低舊石當自己排左。你年紀大只係你出世早,一樣要排隊唔好諗住老奉上前先,你打尖畀人咒罵絕對係咎由自取。

 

2. 不可污染環境

唔好亂拋垃圾,唔好係街剪腳甲剪手指甲,唔好捽腳,唔好伸你對腳對面張櫈,尤其係,唔好再隨地吐痰,唔撚好。香港既街道近年已經乾淨左好多,唔再係幾十年前隨地垃圾痰蔗渣咁既樣。

 

3. 不可傳播病毒

除左上面講既唔好隨地吐痰,仲有麻煩你有病既戴返口罩,唔好係公眾地方咳同打乞次到得返半條人命都唔掩口鼻。你病你死係你事唔好傳染人,宜家香港人既衛生意識強左,佢地對狂咳狂乞次既人既接受程度低左好多,唔想病死亦都唔想畀人打死既,戴口罩睇醫生返屋企休息,唔好搞到人。

 

4. 不可強迫讓座

記住,無人係必然要讓座畀你。如果真係有需要坐既,禮貌問人大部分人都會畀你。而地鐵巴士個啲關愛座呢,你係優先坐既。但就算見後生坐左係關愛座,你係唔知人有無需要,唔好影人相或者扮正義上網搞人啦,今時今日你仲以為咁可以批鬥到人,我話定你知網上罵你既人會多過個後生。

 

5. 不可強詞奪理

唔好用你年代既標準去睇宜家既人,一代人有一代人難處。用埋啲咸豐年思想去迫後生認同你,只會自取其辱。宜家啲後生讀書多過你,接收資訊過你,分析快過你,係佢地眼中你地就好似強迫佢地接受地平說一樣,落後而無知。你要理解、承認、接受,虛心啲聽下啲後生同你講既野。

 

6. 不可太貪心

貪心唔係問題,有人派野唔通唔收咩?但太貪心就會出現好多問題。首先係你唔好迫啲後生同你一樣貪心,要去拎呢樣,排個樣,對後生黎講係好醜好肉酸。另外唔好走去貪啲唔合理既野,你做左幾十年人唔係仲以為會有咁大隻蛤乸隨街跳呀?一陣受騙又要啲後生幫你埋單。貪心都要睇情況架,貪得咁蠢就寧願安份啲啦。

 

7. 避免在繁忙時間出門

麻煩各位老人家避開晒啲返工放工繁忙時間出門。你地係有得揀遲定早出門口,打工仔無。搞到大家搭車又迫條路又多人啲位又要爭餐死咁,迫到大家辛苦何必呢?8點前10點後5點前條街啲地鐵巴士小巴咪就係你地既世界囉,鬥咩呢,點解要咁急?

 

8. 當注意擔遮禮儀

網上講既已經太多,總結幾句:有擔遮就唔好行入簷下同路人爭路;擔遮留意住唔好督到路人;開遮收遮唔好對住人;把遮濕左唔好放上櫈,簡單黎講就係唔好整到人,個世界唔係得你一個,條路都唔係得你一個行。

 

9. 當注意公德

網上講既都已經太多,總結幾句:搭電梯左行右企,唔好擋住條路;唔好行行下急停,撞傷你唔好怨;搭𨋢唔好係又㩒唔係又㩒搞到人地層層停;唔好係交通工具大大聲講電話或者開聲打機睇戲,你要煲電話粥,要享受喇叭既返屋企先;拖車仔唔好碌到人撞到人,睇路行;最緊要唔好你街大大聲鳩噏咩美帝中共,你要講細細聲,巴士唔係城市論壇無人想聽你政見等等等等。

 

10. 當承認錯誤

做錯野要認,得罪人要道歉,年紀幾大都好係唔會令你由錯變正確,咁要面子既就麻煩做事謹慎啲小心啲。做錯野唔認仲要大大聲諗住惡過對方,恃老賣老,永不認錯個啲就係最乞人憎最仆街個種。

 

如果你係上面所講個啲仆街老人而唔悔改既,你成個晚年都唔會過得愉快,因為你去到邊都唔會受尊重,去到邊都會畀人叫你廢老,仔女孫唔會孝順你,路人會鄙視你,社會會淘汰你,自己都會慢慢睇唔起自己。想人尊重,就由今日開始,做一個識尊重其他人,思想開通講道理,有羞恥之心,會三思自己言行既人。

 

關於作者:木人里

一個心地善良既仆街。

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。