毒撚Ocamp 攻略

 

 

Regday過後,一眾應屆DSE考生係時候迎嚟新嘅大專生活,而入學首當其衝迎嚟嘅,就係Ocamp。身為毒撚嘅你,當然未必想玩Ocamp,你亦都或者會問,話到明係毒撚,緊係留係屋企打下機,無人個陣就打個丁,玩乜嘢Ocamp啫。
你啱。

不過,每年總有一班毒撚,希望入到大學脫毒,然後識(食)下囡囡,過下荒淫無度嘅大學生活。又或者,有一班毒撚因為抵受唔住靚靚學姐嘅遊說,最後報咗名去玩。姑勿論你係咩原因報咗名去玩Ocamp,身為毒撚嘅你,從來都不擅溝通交際,確實係揀咗樣未必好啱你參加嘅活動。我知,你可能好想脫毒,但因為你仲未脫毒,所以如果你仲係咁樣on99去玩,你唔enjoy之餘,亦都脫唔到毒。筆者身為毒撚,但玩咗4年Ocamp(如假包換嘅毒撚,唔好質疑我),都順利渡過,所以依家就提醒下各位,過一個快樂Ocamp。

 

1. Ocamp係啲乜

首先,玩Ocamp一定要知Ocamp係啲咩。Ocamp中文名即係迎新營,每間大學都有好多唔同Ocamp,例如大O(即係學生搞嘅Ocamp,乜嘢系嘅人都報得)、細O(由學院或學系系會搞嘅Ocamp,淨係嗰個學院/學系先玩得)、Hall O(Hall搞嘅Ocamp)、Soc O(學會搞嘅Ocamp)。每個Ocamp都分好多組人一齊玩,一般嚟講,每組除咗組仔女、組爸媽,仲有OC同spy。

 

組仔女

雖然Ocamp叫迎新營,名義上freshman當然係主角啦,不過一個Camp咁多人,每個人都有唔同目的嘅。對於組仔女嚟講,最基本當然係認識下唔同嘅人,始終出外靠朋友,係大學呢個社會嘅縮影,獨自過4年絕對係痛苦嘅事,如果你同組爸媽熟,仲好可能可以知道更多關於學科上嘅Tips、reg科攻略之類。

不過,亦都唔好淨係巴結組爸媽,盡可能同每個Omate保持良好關係,唔好大細超。

 

組爸媽

組爸媽就係負責帶組搞氣氛嘅人。任何單身嘅組爸(或者唔係單身嘅都係),好肯定都會發揮男性嘅本能,就係想識(食)女。呢樣好難免,因為男人本身就係咁。不過,唔係個個都係獸父嚟嘅,一個稱職嘅組爸,應該掩藏獸性,照顧每一個組仔女。如果你組爸淨係顧組女,唔理你,咁就係佢仆街,不過記住都係唔好同佢反面,無著數。

至於組媽,感覺上比較少食組仔嘅,因為始終比自己年紀細啲,唔係人人啱。如果同唔到組爸熟,就嘗試同組媽認識下。

 

OC

OC係Ocamp嘅工作人員,幫手set場set game,亦都會有啲時候帶下組。由於有部分OC係莊員嚟,所以佢地嘅其中一個任務,就係睇下有邊啲人適合上莊。
事實上,Ocamp同上莊就係有莫大關係,因為永遠都要搵新血接莊,所以有意上莊嘅人,係Ocamp就盡量識多啲人,同埋唔好做kam嘢。

 

Spy

至於Spy呢,其實即係一啲扮組仔女混入組嘅人,實際上佢係師兄姐嚟(有啲大學可能會搵其他院校嘅人嚟做)。呢班人簡單嚟講,就係以組仔女身份搞氣氛,令到成個Ocamp更加開心、暢順。有時一組入面啲人太怕醜太摺,就好需要佢地廷身而出,以組仔女身份帶動其他人。所以,就算你好醒咁發現咗佢係spy,但都唔好拆穿佢,因為係唔會獎的,只係搞串個party,淨低嘅日子佢都唔點算。

題外話,因為要扮freshman,難免會講下大話,所以唔好太介意佢呃你。過往有啲人知道自己Ocamp嘅好朋友係spy之後,會即場喊……

 

2. 溝通

首先,毒撚最大問題一定係溝通。溝通一般可以分幾種問題:
第一, 無話題,唔知同人講乜;

第二, 有話題,但話題狹窄,而且好毒,淨係識講ACG;

第三, 因為無自信,講嘢陰聲細氣,口齒不清,1999,而且口神閃縮。

講真,呢個問題要解決絕對唔易,尤其係第三,因為係講緊你一直以嚟嘅生活習慣同性格,唔係一時三刻可以改得晒。不過咁,都唔係無得救,所謂「知恥近乎勇」,你就承認自己就係上述所講嘅毒撚先。

首先記住第一戒,「唔好開口埋口都係講動漫同打機」、「唔好開口埋口都係講動漫同打機」、「唔好開口埋口都係講動漫同打機」。傾偈之所以無話題,因為你嘅生活太單一,太沉悶,除咗ACG,你無留意身邊其他事物。點解盡量唔好成日提呢啲嘢,因為非常殘酷嘅事實係,呢啲嘢係普遍人眼中真係好毒!的確,好多人都會打機同睇動漫,但除非對方都好鍾意,如果唔係真係唔會無啦啦講;而且,一般人除咗呢類話題,仲有好多其他話題可以講。將心比己,如果有個肥婆不斷同你傾韓國男星,講邊套韓劇好睇,你會有咩反應?當你對住其他女仔傾ACG時,其實你同呢個肥婆無異。

「但唔講ACG我無其他話題啦喎……」我知道毒撚有呢個問題,因為身為毒撚嘅我,有時都有相近問題。最簡單嘅,既然大家都係初入學,一開始緊係可以講下學校嘢先,邊方面都得,學術、環境、設施、食物都可以吹下。呢類話題有時未必非常有趣,不過至少一般嚟講容易搭得到嘴先。此外,當然係留意呢排有咩熱話,例如邊套戲好睇,邊度嘅食物好食。同女仔傾食物,十個八個都無錯,不過唔好第一次一見到面就無啦啦問人鍾意食乜,可能試下一齊食飯,或者係超市買零食嘅時候,講下呢類話題。

仲有一樣嘢,如果好唔擅長開話題嘅,咁一班人嘅時候,咪等人開,跟住自己試下加入。不過記住唔好勉強插嘴,唔識又要扮識,講啲九唔搭八嘅嘢,因為好可能成個場被你整到靜咗。

仲有仲有仲有一樣嘢。就係Ocamp你會遇到好多人,盡可能都記得一哋個名同個樣,可能有啲難,不過盡量啦。見到面時,如果人哋認得你,但你唔認得人,都幾kam架。

 

3. 儀容

曾經聽過一件事,有一名毒撚係Ocamp嘅時候,發現自己啲鬚(或者應該叫汗毛),跟住係全部人一齊係房傾計嘅時候,佢係自己個袋拎咗把鉸剪出嚟,然後修剪自己啲鬚……

成件事有幾咁奇怪,我諗唔洗我多講了(如果你覺得好正常,咁就要小心啲了)。毒撚對儀容、整潔嘅求其,有時真係幾嚇人。你可能話已經慣咗是是但但,不過要脫毒嘅,就緊係要改變啦,而且一個整潔嘅儀容,亦係對人,對自己嘅一份尊重。

係衣著分面,毒撚真係好容易成為他人笑柄。不過好彩嘅係,Ocamp好多時都係著Camp tee,呢個問題可以縮小。而係需要著便服嘅時候,其實夏天簡簡單單著件fit身嘅淨色tee,加條短褲,著多對波鞋就已經算正常,當然唔好著啲標新立異嘅顏色,例如黃色tee加橙褲,咁就無人幫到你。

另外,由於Ocamp一般時候都係室外活動,所以如果你係大汗、多面油嘅,就準備定啲嘢清潔下。平時帶多包紙巾隨時借畀人,都係個唔錯嘅做法。

 

4. 玩Game

玩得Ocamp,就緊係要玩game。你可能會覺得有啲玩戲好無聊on9,呢樣我有時都覺嘅。不過參加得Ocamp,就預咗實有on9 game,如果唔會太意淫,太冒犯你嘅底線嘅,咁咪玩下囉,成班人一齊做啲on9嘢,有時都幾開心。

而且,玩game嘅時候,有時可能一組人分幾輪玩,又或者係要每人擔任唔同角色。呢啲時候,就唔好次次要人三催四請先去玩,有啲嘢你覺得ok嘅,咪自告奮勇去玩,咁樣會容易建立一個較好嘅印象。相反,乜都唔參與,乜都要人「請」先去玩,人哋緊係會覺得你麻撚煩啦,而且自己呢幾日都唔會過得開心。

 

5. 食女

我知,你飢渴咗好耐,同埋成日聽人講話Ocamp啲女好open,好易食。

可能,有部分女真係想係Ocamp覓食,不過,個對象好肯定唔係你,先唔計有其他MK組仔,仲有組爸們同你爭;就算真係睇中你 (應該都都無可能架啦),啲咁飢渴嘅女仔,你都係食唔住架啦,帶帽就有份。

所以,你都係照下鏡,諗下自己本身性格有幾毒先,唔好FF咁多啦。如果有個女仔你好鍾意嘅,咁咪嘗試認識下,做住朋友再發展先。

(利申:我做埋組爸都係A0咁Grad)

 

總結

毒撚要好開心咁玩一個Ocamp,未必係一件易事,因為始終係要比較多social,而且係同一班陌生人相處,所以如果可以非常樂於其中嘅話,嗰個應該係偽毒嚟。不過,想正正常常咁過嘅話,其實又唔係真係好難,只要盡儀容談吐正常啲,玩嘅時候放啲,嘗試多啲融入,咁就ok。

 

 

關於作者:救火的少年

救火的少年

廢青廢噏,擦存在感。鍾意標奇立異,唔會隨波逐流。

則留言

閱讀後覺得好,請多多讚好及分享~:)

其他熱門文章

  • 夜半,被彈鐘的第一個人 by 余該隱
    「呢度三千蚊,我哋之間就咁算。對唔住,你令我諗起一個人……」Sally眼定定望住三張金牛,佢唔係未試過俾人彈鐘,但喺半夜三點,俾人彈鐘仲要收足錢,就真係第一次。…
  • 黃于喬(Emilia Wong) 收費裸照爭議給了我一點點的倫理學實踐。 by 司徒曉生
    亞里士多德(Aristotle)的德行論(Virtue_Ethics)強調的是行事的人是依照他的良好人格去行事,實踐道德上應該做的事,而培養人格重於大眾的價值觀。人生的目的就是成為一個有道德的人。雖然這個涉及循環論證(因為甲等於乙,所以乙等…
  • 【塔羅個案】名校老師婚外情的故事 by 神婆
    大家對老師嘅印象係乜嘢?係有教無類,抑或係道德端正?我中小學都有幸就讀風評唔錯嘅所謂名校,大部分老師教學用心,係我嘅榮幸。…
  • 唔通波大著衫會柒啲架? by 堂前燕
    話戴咗呢隻bra令個胸集中啲睇落去大啲,聽到真係笑到我gapgap聲,個pad仲大過你個胸睇落緊係大架,你唔好話塞兩個手球落去,大過杉原杏璃都得啊。…
  • 每對情侶都經歷過的sweet sweet moment by 小盛女
    話說某一天零晨十二時多Brenda都還沒有收到Mike的「報平安」的電話,即使是塞車,最遲都應該十一點便回到家中。打電話給他,卻響了一下便掛線,接着打了十多次電話也是「你已被接駁到。。。」難道是電話無電?但回家應該也可以充電,還是電話被偷了…
歡迎讚好我們的facebook page,免費資訊源源送上。