謹祝各位高齡A0 盡快走出comfort zone

 

 

親愛的A0大軍:

早排喺森美嘅電台節目度,聽到兩三個迴響頗大嘅表白電話,打電話想表白嘅,不約而同都係A0嘅隊員。
好多人會安慰A0嘅朋友:「你未遇到嗰個對的人啫」「緣份未到啫」,簡單啲講都係啲叫你要靜候再靜候就算失收始終要守啦。
「保持自己原來的樣子就好」,聽落好舒服係咪?
但如果你已經二十五歲或以上,明明好似冇咩明顯問題,四肢五官健全乾乾淨淨,有朋友有正當職業或者讀緊書有啲學歷,想拍拖但依然A0,bb你唔係未遇到對的人,係你自己本身唔係那個對的人呀。
你再坐落去等落去,等到28歲都唔會突然拍到拖㗎。正如你20歲嘅時候,都覺得25歲點都會有拖拍/拍過拖啦係咪?
世人好反對為戀愛而改變自己,but why not?例如你25歲都搵唔到工,你都知有啲嘢要變啦,拍拖都係㗎咋,大部分人都唔係天生就識拍拖㗎,都係要觀察加練習加調整㗎咋。

我發現好多A0 bb都好執著,尤其女仔,好執著要遇到一個對嘅人先開始一段關係,而當你A0嘅時日越長,對「初戀情人就係我老公」嘅期待會越強烈。
尤其想結婚生仔嘅女仔,梗係啦,28歲仲係A0,如果初戀唔係老公點生仔?
但係,當你完全冇實戰經驗,就算畀你好彩遇到個啱嘅又一齊到,都唔代表就可以happily
ever after㗎。
再說,銀河系根本就唔存在那個命中注定的人,所謂「對的人」,只係願意同你互相磨合、又互相愛慕互相需要嘅人,可以係Michael可以係Samuel可以係Calvin,可以係Michelle可以係Samantha都可以係Catherine。
正如可以幫Beast解開詛咒嘅人,都冇話一定要係Belle。

我自己呢,其實都做咗好多年A0,就算後來出咗池,都係撞彩㗎咋。唔識點樣表達自己,好快就完結咗。
然後我又dry咗好耐。到頭來我覺得自己同A0係冇咩分別。
後來點呢?後來喺我第2046次因為收收埋埋自己曖昧一輪再錯過緣份之後,我實在係頂唔順自己終於想改變現況,然後我就開始咗個社會實驗(其實同個社會一啲關係都冇,完全沒有公共性純粹自我滿足,sorry for 騎劫ing「社會」)——就係不停實戰喇。
你睇再多pick-up artistsss嘅書,上再多所謂戀愛達人實質柒頭嘅堂,都不及搵個真人實戰傾一次計。
好多A0直仔直女都唔明異性點諗,實戰多啲自然都會幫你了解普遍異性嘅諗法,唔止對你出pool有幫助,對出pool之後點樣經營關係都好有幫助。
(信我,我有齊《把妹達人》啲書,我唔敢話冇用,但睇完之後就算同男神女神出街都唔會load得切識得用返出嚟,啲書擺埋一邊等你段數高啲先啦。)

可能有啲A0 bb會話:「實戰到就唔會係A0啦!」
冇人叫你搵個女神男神實戰,呢個世界咁多交友渠道,你慌識唔到仔識唔到女?

 

姐姐作為過來人,要勉勵各位施主再順便分享下當時點樣突跳出comfort zone。

我當時個實驗就係上啲交友app識人。
高齡A0 bb們,尤其係女仔,好多時都會被「梗係要男仔使主動啦」嘅觀念困住自己,而佢哋被動嘅程度唔單止係唔表白唔拖手,連釋放好意嘅訊息都唔識。
唔好再信啲台劇韓劇啦,唔會有男仔見你冇乜明顯反應都勇往直前㗎,你又冇苟姑娘咁索,有嘅話唔會坐咗喺度啦。

而好多A0 bb都有另一個共通點,男仔女仔都好,就係對於戀愛關係中嘅自己有份莫名嘅自卑——覺得人哋唔會鍾意自己。嗱,喺工作上有自信、交朋友有自信,唔等於發展戀愛關係有自信。點搞好?喺邊度自卑就要喺邊度搵返自信,正如你如果見廿份工都見唔成,桃花再好睇再多心靈雞湯都冇用。
所以你要有人證明畀你睇——你係有market㗎!

每個高齡A0背後都有唔同嘅問題,太被動、太多幻想、太自以為是⋯⋯通過不停實戰慢慢就會釐清到,亦可以喺唔同嘅對象身上學到點樣示好、營造親密感⋯⋯blahblahblah。反思再改善,再反思再改善。
難度是如何在「保持自我」和「改變自己」之間取得平衡,就好似獨立同依賴咁,要取中庸之道,各走極端對關係都唔健康。

慢慢由text開始練習,順暢咗之後自然就會出嚟食飯睇戲,再之後嘅就睇你底線喇。
幾嗒糖都好,唔好借錢畀對方唔好唔用套,最緊要有意志力保護自己就好。
途中一定會通到仆街,遇到都唔係壞事,慢慢你就會從言行間識分辨咩人係真誠,咩人係扮真誠。
仆街無分性別無分性傾向,男仔女仔都好,如果冇乜戀愛經驗真係好易畀人呃。
啲老手同你傾十句計就知你係新手,如果撞正個唔好心地嘅,呃感情呃蝦條呃錢呃乜都有。所以就當係保護自己,練習多啲學識睇人都真係好重要㗎。

記住,呢個只係練習場,正正係因為你對呢班人冇感情,所以唔work都冇所謂,呢個唔work就下個,當然都可以同時間同好多個人練習。 遇唔到對的人係正常,遇到係bonus。
不過呢,我建議大家就唔好呃人喇,例如明明唔鍾意人又扮對人有意思。尤其當你段數變高、開始可以自在地表現自己之後,可能會出現至今未出現過嘅桃花期,突然有好多人向你表示好感甚至表白,呢個時候你可能會覺得一直以嚟嘅男神女神原來都不外如是,出面個世界原來有好多選擇。
你可以有好多選擇係事實,但唔好被沾沾自喜沖昏頭腦呀bb,我一直覺得,只有懦弱的人才會收兵啊。

技巧同心得我就唔share喇,我自己都還在學習的途中,再者更重要嘅係,人人適合嘅都唔同。都係嗰句,不停實戰從而發展出自己嗰套仲好。
唔一定要學我喺交友app識人,總之用下個腦諗個啱自己嘅實驗。不過,第一步:你要行出第一步。
既然已經喺個池入面游咗咁耐都唔知點出去,如果見到條梯嘅,咪爬出去睇下池外嘅世界係點先囉。
更何況,出池只係戀愛關係嘅第一步,之後點樣經營關係才是重中之重。
唔開心嘅,最多咪返去個池度繼續游,起碼都學識咗行丫。
共勉之。

 

 

關於作者:一百八十呎

一百八十呎
既然有人表演瞓劏房,全天候住劏房的都是行為藝術家。

則留言

閱讀後覺得好,請多多讚好及分享~:)

其他熱門文章

  • 地鐵 by 李天恩
    生活在香港這樣的都市,女孩子們基本上都能從對方的衣著、裝扮、服飾及姿勢態度上得知許多資訊,從經濟狀況到住在哪一區,大致都能看得出來。我瞄了瞄自己的手腕,同時察覺那兩位女孩都偷偷督向我左手配戴著的卡地亞手錶,這隻手錶一般不是我這個年齡的女生有…
  • 我係搞手我係狗(二)——「啲女係咪處?」 by 霏子
    屌,我知你有畀錢,但都唔使咁過份,問埋我啲女係咪處㗎?我班女都係畀同一個價㗎咋,咁佢地係咪又可以要求你有超強御女術呀?呢條友真係當正我係媽媽生。最後,我冇追問佢嚟唔嚟,而佢都係嚟咗。…
  • 第一次約會?要唔要睇戲特登挨落佢膊頭,要唔要胸壓佢? by FAKE 文青
    首先要化個淡妝,所有大眼仔,濃妝not_ok…
  • 【網購】唔好再助長奸商,買物非所值嘅衫 by 夏長樂
    生氣的不是買到劣質衣服,而是覺得商家都當消費者是笨蛋嗎?值百多元的衣服賣百多元,很合理。值百多元的賣三百多,就不合理了,還不如去買淘寶,起碼可以以價判質,心裡有個底。…
  • 琴日我第1次約PTGF,有感而發(利申23歲男) by losing her was blue
    話說前日放假,無聊係IG到禁下ptgf呢樣野睇下。我就咁睇,行個街,睇場戲,全部都收人幾百蚊個鐘。但我見到個tag有成4萬幾個post。係個刻,我就知道,原來真係有人會幫襯。係到我想講句,多謝哂你班仆街毒撚/9公係到成日頂爛市,做壞規矩,寵…
歡迎讚好我們的facebook page,免費資訊源源送上。