【塔羅個案】你話想生仔我咪唔避孕囉,我家下有咗你就叫我落?

 

 

有讀者反映「神婆你次次寫啲故事都好戲劇性啊,係咪真架?」咁我一開始寫文嘅原意,其實就係想將啲比較令我難忘嘅個案同大家分享,不過既然有朋友想睇啲日常生活化啲個案,我諗起以下呢個故事。

Angel,三十出頭,做名店 Sales,不過本人對於名牌唔算好大興趣,電話殼同銀包都係蛋黃哥公仔造型;本人眼大大水汪汪,都算幾靚女,笑起上黎仲好甜,搞到我講嘢都忍唔住溫柔啲細聲啲,想鍚住佢吖嘛。

以上係我第一次見 Angel 時嘅印象,當時佢黎問工作轉唔轉公司好;女性客黎唔問感情問題比較少有,當時佢話「唔會呀,男朋友對我好好,我地同居緊,佢仲話想要有小朋友添!有咗就同我結婚,前排仲同我去睇嬰兒用品展。」Angel 嬌羞笑一笑,「我呢,因為身體唔係幾好,以前做婦科檢查,醫生話過我生小朋友可能會易有危險架!不過既然佢想要,我都好想同佢建立自己嘅家庭,所以最近睇緊中醫調養身體,同埋不設防架啦。」

雖然一日未結婚,我都覺得件事聽落無咩保障,不過個客自覺生活過得好,我無理由疑心重地諗埋哂啲唔好方面的。

所以到 Angel 第二次黎搵我嘅時候,我忍唔住鬧自己:係咪我諗嘢太居心不良呢?定還是我一早就應該提醒佢?如果唔係,件事或者唔會發生到咁嘅地步。

Angel 第二次黎搵我,已經係七個月後嘅事。佢面色好差,又或者咁講,係「氣色」好差,望落非常憔悴。我心中一沉,然後慢慢聽佢嘅故事。

七個月後嘅 Angel,同男友已經分咗手,嚴格黎講,係比個男仔飛咗。分手嘅時候,Angel 已經順利懷孕三個月。

「但係件事並唔係佢之前所講咁樣,佢知道我有咗之後,明顥冷淡咗好多,同埋係咁話未 Ready,唔夠錢之類。」Angel 臉色一片死灰,「我咁辛苦先有咗 BB,仲因為以為黎緊要陀仔,舖頭話升我,我都 Reject 咗。而家佢一句話唔想要,就⋯⋯」

「佢係咪出面有第二個?」我好狠心咁直接問出重點。男方由好想生仔,去到女朋友有咗就變臉話唔要,呢件事嘅落差太大了,咩經濟問題都係 bullshit,如果真係驚無錢,一開始點會咁講,仲同女朋友睇嬰兒用品展?

Angel 苦笑,「佢話無。咁件事拖到而家,個 BB 三個月了。」Angel 下意識摸吓個肚,我眼光飄開,有啲唔忍心望佢腹部隆起嘅部分,因為⋯⋯

三個月了,可以輕易話唔要嗎?咁生出黎,Angel 又可以點面對點照顧佢?

「⋯而喺上星期佢終於攤牌了,佢話唔想同我再住落去,因為層樓係佢租的,佢連行李都幫我執埋,我可以點?」

聽到呢度,Angel 忍咗好耐嘅眼淚終於流落黎,而我呢?

老老實實,我有啲淆,因為副牌開咗出黎,其實個男仔的確近期轉咗新工,或者公司多女同事啩?總之,雖然佢未正式同其他人開始,但個男仔就花多眼亂,想喺個森林度揀多陣先。

我諗咗一陣,用一個比較婉轉嘅方式同 Angel 講,「復合嘅事,相當渺茫,勉強留住之後都只會發生更唔愉快嘅事,倒不如諗吓自己接下來應該點做。」

「即係佢有第二個?」
「未有。」我唔想講大話,「將會有。」

Angel 好似想講啲咩咁,但最後都係閉上嘴巴,望住我淡淡苦笑一下,起身離去。

我知道講任何安慰嘅說話都是徒然,惟有默默目送 Angel 嘅背影離開。

一個月後嘅今日,我再收到 Angel 嘅短訊,佢選擇咗唔要個 BB,不過,佢本身體質都唔係好好,今次落咗仔之後,「醫生話唔建議我再懷孕了。」

醫學嘅嘢我唔識,婦科嘅嘢我都一知半解;但如果 Angel 係因為咁樣而失去為人母親嘅權利嘅話⋯⋯生唔生仔,係個人決定;但不能生小朋友,點諗,我都係為佢有啲心痛。

 

【塔羅牌個案分享】

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

則留言

閱讀後覺得好,請多多讚好及分享~:)

其他熱門文章

  • 地鐵 by 李天恩
    生活在香港這樣的都市,女孩子們基本上都能從對方的衣著、裝扮、服飾及姿勢態度上得知許多資訊,從經濟狀況到住在哪一區,大致都能看得出來。我瞄了瞄自己的手腕,同時察覺那兩位女孩都偷偷督向我左手配戴著的卡地亞手錶,這隻手錶一般不是我這個年齡的女生有…
  • 我係搞手我係狗(二)——「啲女係咪處?」 by 霏子
    屌,我知你有畀錢,但都唔使咁過份,問埋我啲女係咪處㗎?我班女都係畀同一個價㗎咋,咁佢地係咪又可以要求你有超強御女術呀?呢條友真係當正我係媽媽生。最後,我冇追問佢嚟唔嚟,而佢都係嚟咗。…
  • 第一次約會?要唔要睇戲特登挨落佢膊頭,要唔要胸壓佢? by FAKE 文青
    首先要化個淡妝,所有大眼仔,濃妝not_ok…
  • 【網購】唔好再助長奸商,買物非所值嘅衫 by 夏長樂
    生氣的不是買到劣質衣服,而是覺得商家都當消費者是笨蛋嗎?值百多元的衣服賣百多元,很合理。值百多元的賣三百多,就不合理了,還不如去買淘寶,起碼可以以價判質,心裡有個底。…
  • 琴日我第1次約PTGF,有感而發(利申23歲男) by losing her was blue
    話說前日放假,無聊係IG到禁下ptgf呢樣野睇下。我就咁睇,行個街,睇場戲,全部都收人幾百蚊個鐘。但我見到個tag有成4萬幾個post。係個刻,我就知道,原來真係有人會幫襯。係到我想講句,多謝哂你班仆街毒撚/9公係到成日頂爛市,做壞規矩,寵…
歡迎讚好我們的facebook page,免費資訊源源送上。