【真人真事】兩年來我點樣試盡美容院嘅「手段」

 

貪靚係女人的天性。對於變靚,有人會靠化妝,有人會去美容院,有人甚至會去整容,簡直無所不用其極。

唔知讀者有無去過美容院,但年中應該聽唔少女生喊曬咁話被美容院呃錢的新聞。今次唔係想講我點被美容院呃錢,不過我曾經幫襯美容院兩年了,嘗試分享吓呢啲美容院的「手段」。我去美容院的誘因,就因為一個$388的永久脫毛療程。熟口熟面對嗎?好似每日喺Facebook、Instagram啲廣告都會見到大量呢類型的廣告。最初我都係喺Facebook被其中一個廣告吸引到,重特登inbox問詳情,講到明童叟無欺,咁就放心去試吓玩吓咁啦。

人生第一次去美容院,$388係揀三個小部位去做療程,我揀了上唇為其中一個部位,然後呢場遊戲要開始了……佢哋話我全臉都有好多小毛髮,如果剩係脫上唇的毛,其他位置會好明顯;而且臉上太多毛髮會阻礙護膚品的吸收,脫全臉比較好。所以喺用優惠價去做三個小部位療程的同時,又用了一個感覺相宜的價錢買了一個脫全臉毛髮的療程package。

第二、三次去,佢哋話我因為塊臉太乾,做唔到脫毛,就推薦我做療程前先做保濕facial。事實上我都覺得自己皮膚好乾,T字位乾到出油,所以聽落個facial幫到自己,順理成章地又成交。

後來突然間轉了美容顧問,佢重新去了解我的皮膚狀況,再推薦我做適當的療程。當時我先發現原來最初果位美容顧問因為只係見過幾次,未完全了解我的皮膚細節,只係針對我一個問題去介紹一款療程。第二位美容顧問有時會因應我的情況讓我以「試做價」幾百蚊試做一次美容院的最新療程,再決定買唔買package。

脫毛療程係大約一個月一次嘅,後來漸漸由一個「貪玩」的心態變成了習慣,美容顧問話facial最好一星期一次,所以現在每星期都要抽啲時間去美容院。OK,講重點。當然每次去到總會被介紹唔同的療程,連body massage都有。作為一個無知少女,聽到唔同療程對自己有唔同功效,都真係有點心動。

一星期做一次facial,大大話話都做咗廿幾次,皮膚質素有無好返曬?只能說好咗少少,然而有時阿媽話我好似重差咗。剛剛做完果吓效果並唔係最明顯,因為針清完反而搞到成塊臉好紅。本身皮膚唔好,平日又無乜點護理又夜瞓,過兩日啲臉油、黑頭同暗瘡的問題又出現。重有重有,每次針清都好痛,痛到標曬眼水!

美容師喺療程期間同我講,除咗一星期一次的療程外,日常生活都要護膚。我喺藥妝店都唔識買適合自己的護膚品,結果又喺美容院擺低錢買護膚品——始終覺得美容顧問比較了解我的皮膚,終於發現自己一次過買了差不多半年份量的護膚品。

講到呢度,讀者一定已經覺得我好蠢,咁容易被人氹到。我只係想自己皮膚好點,對自己好一點,所以當下的消費都係你情我願,是對外形臉貌的一種投資。有人會投資喺車、喺樓,有人投資喺化妝品、衫褲鞋襪,或者有人投資曬所有以上提及的,呢啲全都係提升自己生活,我唔覺得有對與錯之分。

計返啲package其實真係幾貴,即使可以分開幾次畀,條數都唔細。美容顧問同我講信用卡可以分期付款,負擔會無咁大。我無申請信用卡,都已經投資咗唔少喺度,有信用卡重得了?所以就算我申請咗信用卡都唔會認。咁我總共投資咁咗幾多?唔好問啦,會反面的……

至於我重會唔會再去美容院,答案係……已經無去幾個月。好啦好啦,我醒了。上個月突然收到美容院電話,話就話係送療程畀果個月生日的我,我覺得無咁簡單的;今個月都有打畀我呀,無聽之嘛。雖然啲package買咗又未用曬,有啲療程又包一世,但老實講,做咗咁多次又唔見得有明顯效果,每次去都要花差唔多半日時間,不如在此宣佈是次投資失敗,安份守己吧啦。

 

 

關於作者:姜茵

姜茵
無內涵的宅女,寫無內涵的文章,製無內涵的影片。有個網名有個page,專貼無內涵的帖子。http://www.fb.com/TRHK.KYan/

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。