為左可以申請公屋,我去左申請做大廈看更

 

話說我唔想申請唔到公屋,又唔想日日OT做奴隸獸,於是我去左申請做大廈看更,心諗就算兩年一檢最低工資,我都保證到自己有收入流動性,呢次仲唔係我人生以黎最最聰明既一個decision 黎?點知我去到應徵,竟然俾阿姐點左去另一個公共體育館地方,去參加遴選程序。

因為想見看更既人實在太多,而名額只有兩個。文書我唔掂,所以考文果下我一定無資格;至於武方面,有關當局即時舉行左天下一武道大會,表明邊個最後都無訓低,而且無毀壞到公眾地方既,就可以奪得看更一個席位。但我識打條鐵咩?只見賽事一開始進行,就已經出現左一亂鬥既情況。好彩坐係我身邊既MK曹星如,佢一下子就一彈一跳,拉左我去另一處安全地方暫避。

只見有唔少人都即刻以打倒MK曹星如為目標。但係MK曹一邊叫我自己小心D果陣,已經一個欺身,左右兩邊閃避,而且出手快如閃電,就已經出左幾下直拳。心理上,甚至覺得聽到拳既風聲比用眼睇到黎得更加之確切。然後係MK曹既身影再一次俾自己既大腦辨認到果下,幾位人兄已經相繼伴隨住呻吟聲倒地。

MK曹既鬥爭一路持續緊,但係佢仲可以一邊俾到意見我:「你如果真係唔想打,就走開啦」/「但係你要考既係看更,就要打,唔打就輸一世」/「自衛都要既,立住架生再講啦」,但其實見到四周既環境係如此既咁混亂,試問我又可以走去邊?大佬,我應徵考個看更諗住HEA下渡日,唔係要去火山考戰神一職呀。駛鬼打到天下無敵咩?

就係呢個時候,突然間傳來一下震耳欲聾既獅子吼,一位身穿黑色唐裝既白眉老者突然一個箭步,就衝左去MK曹既面前。MK曹實在一呆,但係呢一呆都應該無超過0.05秒,兩人既掌同拳迅速相交。轟然一聲響,身邊已經又有幾十個嘍囉被轟開。睇黎看更既職位,都會係兩個人既競爭黎。

主辦單位立即出示左黃牌:「小心D!打碎左地下既木地板,即時取消參加資格!」但係睇黎只有我先留意到呢句警告。MK曹既西洋拳,同埋白眉老人既排雲掌(我9UP架渣。。。),已經打左超過二百回合,都未分勝負。佢地既所到之處,如果D人唔能夠及時走避既,都會即刻被KO。唔需要再計算任何點數問題。

究竟我依家仲可以點做?有個訓低左係度嘔血既仲攬住隻腳係度問我,究竟邊到有洗手間。頂你!我自己急緊都唔敢去呀。於是我一腳踢開左佢。而就係呢個時候,白眉老者終於都發話了:「後生仔,唔識咩叫敬老咩你,看更呢D職位分明就係俾我地呢D人做架啦,你咁叻打拳,就自己去做拳手啦。」MK曹係言語上都無示弱,就話:

「你有生果金又有關愛座又盛,仲好意思同我地爭?死廢老,我地連樓都無你俾份工我地做都唔得?」說罷,MK一咬牙,似乎一下子施出幾個重拳,連攻老者頭胸腹三個大穴。如果係動畫既情節肯定會有招名又有聲效,甚至會解釋埋究竟厲害係邊先出招。但現實生活梗係唔會啦。邊有人講俾敵人聽殺著係點破解咁ON9架?

白眉極之沉著咁樣,擋下左兩拳,但係第三拳因為實在太快,所以點樣都唔會避得到,只好將真氣運係左胸,硬生生接下左呢招。呢一下兵行險著,可能係大出MK曹既意料之外,只聽到佢咦既一聲,心諗未必會咁順攤。但果然白眉就借住心口中拳呢一下收招既間隙,係零硬直既情況下,一掌直拍MK曹既眉心。

呢一下出得又快又陰濕而且靜過分體式冷氣,所以基本上都了解唔到究竟MK曹有無中到掌,就已經見到佢急急後退左二十幾三十步。兩個人正式分開之後,只見大家都各自掩住岩岩被對方擊中既地方,扮晒仲好緩慢咁係度呼吸緊。

兩人大戰一輪之後,其實場內既參賽者亦都死得七七八八。開始打卡上FB,同埋等緊聖若望救傷隊黎幫佢地擔架離場。咁係呢D垃圾時間例牌兩人都要無野搵D野講:「老實,真係好耐都無咁痛快咁樣打一場了。」「係,真係估唔到係呢度都會遇到咁既高手。」「今次真係無撼了。」「係。」

「咁,我相信,你依家既諗法,同我都一樣?」「的確係咁。」「OK!」於是兩個人就收起架式,開始向住主辦單位走去。我覺得大奇,下,咩唔係講完呢堆廢話之後,suppose 就會出大絕然後出動真氣互拼最後好似歐陽峰同洪七公搞到吐晒血,然後再由唔識武功既我黎執死雞架咩?

我於是跟過去。MK曹向我點頭示意,果然佢成隻眼都俾白眉打到腫左。「發生咩事?你地。。。」MK曹向白眉一指:「我地兩個都傷左,唔想再打,又就黎下午茶時間,出去食煉奶多士好過。我地決定棄權。」「下,你地咁樣走左,唔怕俾人地網上公審呀?一陣又話你地打假拳。」白眉對住我既膊頭大力一拍,搞到我大聲呼痛,幾乎成個骹位甩出黎咁滯:

「廢青,你點打都俾人講架啦。你唔理佢地,咪贏囉。」跟住兩個人辦完簡單既手續,就相偕離開會場。

不論情況如何,既然依家結果係咁,我都只能夠接受現實,食花生食到個看更職位啦?於是我問主辦單位,看更呢個職位,係咪我拎左。但係主辦人員托托眼鏡,就話:

「唔好意思,情況有變喇,岩岩上頭打電話黎,話要hold 住先。因為好似出現左一個更適合既人選,所以呢場比試,就大家以武會友算喇,大家當無事發生過?」「下,咁都得?」

「為左表示歉意,每個人都有四州紫菜禮物包同埋Small Small Channel 免費睇AV一年。大家都開心離開,仲話成功避免左一場公關災難。」主持人攤攤手,最後佢仲同我語調深長咁講:

「後生仔,睇開D啦。出黎社會,最重要都係人脈呀。好似依家中選果個,同上面__個阿爸有聯繫架。識打無用架。一鋪牛力有用咩?最重要係耐心,包容,然後憑自己一身努力,不斷改變世界。」

好囉。我都係諗下今晚食咩先好過喇。妖。

(完)

關於作者:鵝鑾鼻燈塔

鵝鑾鼻燈塔

前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

則留言

閱讀後覺得好,請多多讚好及分享~:)

其他熱門文章

  • 群眾去左邊?群眾去右邊。 by 隨緣
    這幾天,立法會有集會,指希望收集民氣,說要「阻止立法會修改議事規則」。民眾好像不太出來,由第一天的幾十人,第二天在場群眾說「真係連警察都仲多過我地」,然後到最近一次好像有千多人了。是不是很多人呢?…
  • 梁耀忠:梁公好龍 by 爽健
    古時有位葉公自稱很喜歡龍,衣服畫龍,家中乜柒都係龍圖案,天上龍神看到凡間有葉公呢種擁躉,好很感動,祂親身到訪葉公之家,以為葉公會好膠興,丫,點知阿葉佢一見真龍便化膿,佢驚到跳上牆淆哂底,葉公好龍,原來只是口頭好龍,心底怕龍怕得要死。…
  • 港女個個都係熱褲短裙黑絲,佢地唔明白,女神,係要襯長裙 by 高教授
    「你班港女唔好再學啲韓妹著高腰熱褲啦,你估你係EXID個個Hani咩」當那個身高不足一米六,穿著高腰熱褲的少女從我身旁經過時,我有一刻衝動想走過去向她說這番話,可是我忍住了。因為我知道,阻止港女露腿,會被港女「燒春袋」的。…
  • 一餐飯的兩性攻防戰 by 窮家有道——窮一生
    當一個男人觀察一個女人係唔係認真既對象,多數係食飯就會開始觀察。打扮、談吐、興趣、價值觀。呢d野你點吹水都冇用,兩下就露底。愈有能力既男人,愈會介意你老奉唔俾錢。點解呀?因為食飯你都唔出錢,同你生活就更加唔駛旨意你會付出,唔一定係錢,而係你…
  • 每對情侶都經歷過的sweet sweet moment by 小盛女
    話說某一天零晨十二時多Brenda都還沒有收到Mike的「報平安」的電話,即使是塞車,最遲都應該十一點便回到家中。打電話給他,卻響了一下便掛線,接着打了十多次電話也是「你已被接駁到。。。」難道是電話無電?但回家應該也可以充電,還是電話被偷了…
歡迎讚好我們的facebook page,免費資訊源源送上。