新房你地做緊乜?

 

走咗去睇Shaft同新房昭之班底嘅《煙花》動畫,套戲對於我嚟講係有少少失望。

首先劇情係女主角及川奈砂因為佢阿媽改嫁就要搬屋離開小鎮,臨走之前同男主角典道同祐介對賭,邊個游水贏咗就要聽對方指示。結果祐介贏咗女主角就約祐介佢睇煙花,但最後祐介就失約。故事去到呢度就無乜問題,做得尚算正常,但係之後就有少少尷尬。

當男主角典道無意中攞到女主角奈砂嘅玻璃球,劇情開始急轉直下。回到過去的情節拖沓同無謂,某幾段情節譬如女主角喺電車唱歌等情節基本上無咗對動畫劇情係無影響。而男主角典道同女主角奈砂一齊私奔,有點不合情理。中段動畫係被男主角幾次擲玻璃球回到過去嘅情節,令到套動畫節奏好拖,似唔夠片長喺度塞啲多餘情節入去。如果大家想睇男女主角細膩情感的描寫,呢套動畫似乎無乜,唯一叫做有意思嘅情節係女主角奈砂講佢自己身世,只係延伸不足。

動畫畫功就略嫌普通,未夠之前Shaft套《傷物語》咁精緻。格硬將物語系列的電波風塞入去呢套《煙花》動畫,確實有少少「水土不服」。呢個問題到咗動畫後段,電車兀然駛咗去無盡頭嘅鐵軌,同埋男女主角到咗沙灘四周天空變咗玻璃罩嘅樣係同戲唔多夾。結局似乎太反高潮,睇完令到人不知所措。

男女主角配音真係唔得!尤其係男主角典道嘅配音,把聲太沉完全唔似一個中學生,女主角CV似想學花澤香菜把聲但唔多似,尤其被佢阿媽捉走嘅配音唔夠感情。反而其他配角配得稱職,而花澤香菜淨係配老師呢個無關重要嘅角色實在令我大惑不解。如果女主角CV換花澤香菜或者其他物語系列CV好似齋藤千和,而男主角CV再換第二位好啲嘅人,成套動畫會更加令人投入到。

總括而言,《煙花》動畫實在唔太得,如果因為岩井俊二原作、你的名字班底或者新房昭之個名入場睇嘅人可能會失望。

 

 

關於作者:粗人敵卡

粗人敵卡
一個要將別人忽視的事寫出來的九十後寫手,閒時看電影、讀小說、聽音樂等等,夢想做一個通俗小說作家

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。