【體檢中心的早與晚】愛滋少年想隱瞞份愛滋報告

 

老老實實,小弟就從事左體檢行業就兩三年既姐,唔係新人之餘,又絕對唔係舊人,但其實係體檢中心都有成日有好多趣聞,雖然好多都已經見慣見熟(話晒都做左三年),但其實工作每次推出新型檢測,都總係有D搞笑野發生。

今次呢,我就唔係講咩新型檢測,而係講講血液測試。通常來講,我地幫客人進行身體檢查時,第一步就係同佢收集尿液,之後就到同佢抽血。抽血之後,我地都係幫佢驗下紅白血球量、血紅素、咩血型、血球容積、血小板等基本測試,同時,我地亦都會問下個客人,會唔會驗埋有無愛滋同梅毒,假如個客人話唔會,我地就當然唔會驗呢樣野。但係,做左咁耐,都好似無見過有人特別話唔驗。

事緣就有一次,係幾年前,有班廿歲至四十歲左右的男人一齊上來驗身,後來打聽原來佢地係同一間大公司一齊做兼職而相識,有時會成班一齊尋歡作樂。今次,係因為佢地當中有個朋友叫晒佢地一齊來驗身,於是佢地果日就聚首一堂,齊齊驗一驗。

之後,護士同仍地咁多個抽血,而且亦都好順理成章咁驗埋愛滋同梅毒測虐,然後就好快速咁,係兩個鐘內驗晒世衛建議的一百項驗身要求,然後成班就齊齊去等候區食下小食,等份驗身報告。

雖然成日有人話「唔賭唔知時運高,唔驗唔知身體好」,但今次就唔應驗,今次當陪住個後生仔,去醫生度聽報告時,佢個愛滋病毒測試竟然係POSITIVE 。之後,佢顛左咁否認,不斷講「醫生,你有無驗錯架」、「驗錯GE機會有幾高阿」之類,總之就用盡一切辦法去否認。咁醫生見到佢咁,都努力安慰佢,話:「其實呢,愛滋病毒測試有時都會出現『假陽性』,會進行再次覆驗先至可以確定。」老實講,雖然就話咩測試都無可能保證100% 準確,但其實現時的愛滋病毒測試已經去到99.X %準確,只因為愛滋病係大病,因此社會相當重視,醫院、體檢中心唔想搞錯,先至進行覆驗。因此,我地中心亦都安排左佢兩個月後上來驗多次,到時都仲係POSITIVE,就應該要蓋棺定案。

聽完醫生講解報告之後,個男仔神情變得極度低落,佢先同我講,覺得係自己同班同事一齊北上叫雞,先至搞到有病。然後佢將份報告交比我,佢同我講:「我唔可以比佢地知道我有病架,知左既話我係公司入面就唔洗再生存架喇。」於是,我幫佢收起份報告,然後我地公司可以幫佢將份報告寄去佢屋企。

不過,我又咁諗,雖然佢D朋友睇唔到份體檢報告,但大家都自己即場拎走份報告,唯獨佢要寄返屋企,加上佢失落的表情,或多或少都估到少少。不過,寧比人知,莫比人見,一日見唔到份報告,佢既朋友都只有估估下,唔會當佢真係有愛滋。

雖然咁講,我理性上就覺得叫雞唔戴套得愛滋就抵死既,但見佢廿歲仔就搞到咁,我都覺得好心痛。事前你總係可以大叫「身體自主好高尚,戴唔戴套我話事」、「環保吹、無套中出唔影響人,事前了解清楚風險,你情我願咩都得」,但事後你仲會唔會咁諗呢?

 

作者:體檢小子

體檢中心其實好搞笑

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 171711
Date: 2017-11-03 05:36:49
Generated at: 2019-10-20 11:49:19
Permalink: https://www.vjmedia.com.hk/articles/2017/11/03/171711/【體檢中心的早與晚】愛滋少年想隱瞞份愛滋報告