【塔羅個案】個客問創業,我話佢未 Ready 佢唔聽,而家蝕到入肉叫我救佢

文教 / 最新文章綜覽

 

除咗問感情牌之外,事業前途牌都係我經常遇到嘅問題;而家嘅香港當然就唔會仲係以前啲長輩口中嘅「遍地黃金」(海港城地下啲物理黃金則不在此列),我大學畢業時,Fresh Grad 平均人工係萬二蚊,幾年黎嘅今日,聽講仲拎到萬二蚊已經叫相當唔錯嘅人工。

為咗自己生活過得好啲,又或者覺得打工唔適合自己,近一兩年黎,好多客除咗問「轉工」嘅前景,仲多咗客黎問「創業」到底行唔行得通。

即係咁,係,創業聽落好開心呀,自己做老闆,唔駛受同事氣;好似我咁,三年前辭咗份工,正式將副業塔羅變成正職,都叫創業吖,優點係時間算彈性自由,缺點嘅話,就係手低口停,無咗每個月有糧出嘅保障;如果我惰性多啲,開少幾日工,就真係分分鐘食風~

不過我搞塔羅都係自己顧自己,唔駛請人,相比啲搞大茶飯嘅生意當然黎得簡單,如果要入貨賣貨、或者需要請人開舖等等嘅生意,喺開始之前,真係要諗清楚計清楚。

好老實,真係唔係人人都適合創業的,黎過嘅客人應該都見識過我講嘢幾直接,你問一啲決定,你唔適合,我就真係會直接建議你收皮的。咁你黎搵得我,我就當然會講真話,至於你唔信我,事後出錯,咁就真係惟有講句貴客自理了,

好似 Fiona 呢個 Case 咁。Fiona 廿歲出頭,讀完大學一啲所謂比較「摺」嘅科出黎,入咗間中型船運公司做文職。咁啲同事年紀比較大,工作性質又悶,加上 Fiona 認為「班同事都係老屎忽,公司死氣沉沉,好無幹勁」,所以開頭我以為 Fiona 想問轉工或者轉行。

「唔係呀,打工發唔到達,我想搞生意。」Fiona 雙眼發光,「搞咩好呢?搞時裝美容囉?女人錢好賺吖嘛!」

喺 Fiona 講完佢創業嘅方向時,我有啲驚訝,因為 Fiona 本人嘅打扮非常隨心,佢頭綁頭巾,身穿 T-Shirt 加條 A 字型長裙,話佢「文青系」又唔係,「森林系」嘅話,又唔會揀鮮紫搭酒紅呢啲顏色配搭吖?我當然唔係有咩批評嘅意思,人人品味唔同,可能人地放假,所以打扮 Causal 啲都唔出奇嘅。

不過,Fiona 問創業嘅開牌結果相當差,審判反牌、塔反牌、連女王都係反牌,簡單黎講就係呢條路唔 OK ,直接啲講就係「小姐妳諗清楚喎,妳無做生意眼光同才能,會蝕到 PK 喎」咁樣。我亦都好老實咁同 Fiona 講,佢嘅閱歷同埋準備不足,如果一刻就要搞生意嘅,一定唔會成功;建議佢都係打多幾年工,儲多少少本金,順便諗吓自己到底想做咩生意,之後再算啦。

不過 Fiona 聽完我解牌之後皺哂眉,「咁點先賺到錢呀?」「咁即係我小心啲就得啦?」「咁我入少啲貨咪得?」睇黎佢並無真係將我嘅建議聽入耳,咁我都無嘢好講。

大半年之後,我收到 Fiona 嘅短訊,咁發生咩事呢?佢就當然係一意孤行,堅持搞佢嘅生意,問屋企借咗錢,又搵朋友做 Partner,喺無搞網路宣傳、無開 IG、連出 Promotion 都淨係用個人 Facebook 仲要 Friends Only 咁出 Post 嘅情況下,一黎就喺荃灣線某個大型平價商場租咗實體舖,啲資金大部份擺咗去裝修度,結果可以用黎入貨嘅錢就唔多,原本話去日本入、之後變成淘寶入(啲貨入完返黎,仲要唔剪走人地個 Label)。

佢入啲咩貨我就唔清楚,但佢一句話係「時下後生女鍾意著嗰啲」我已經知道大鑊,咁即係咩都有炒埋一碟啦?即係無特色啦?仲要佢開喺嗰個商場,人地同你可能都係淘寶入貨,但因為裝修洗突咗,結果啲衫就賣貴過人地勁多。大佬,個場講緊一百蚊執到一套衫呀,你一件上衣賣 $499?呢個係銅鑼灣東角嘅價黎架。

「神婆我唔夠錢交租呀,可以點算?」
「啲貨賣唔出呀,不如我比 Discount 妳,妳叫妳啲客黎?」
「妳既然知我做唔生意唔會賺嘅,點解唔堅決啲惡啲阻止我?」

睇到最後一個問題,我忍唔住將 Fiona Blacklist咗,Chur 唔係最大問題,半夜三更短訊轟炸我,佢都唔係第一人;不過,衰咗想將責任推落我度嘅話,咁我惟有祝君好運。

其實呢個時候,Fiona 間舖只係開咗個幾月;咁做生意當然好難即刻回本,不過我聽完 Fiona 個經營模式之外,已經知道佢壇嘢都係早收皮早止血;原本佢都有自己看舖,但因為「又要拆貨又要睇舖,十個鐘好攰」,後尾,佢明明都唔夠資金,仲請個妹返黎看舖,話幫輕吓自己咁話。

咁大支出,咁低回報;唔好話賺錢,Fiona 連回本都難。創業搞生意係好架,但係至少要有心、有力、有遠見、有想法、夠勤力,至於有人脈就更好;少社會經驗唔緊要,但要虛心學習,或者人地見到你行條路唔 OK,叫你停,你要聽先得架。創業唔係逃避返工嘅藉口,亦都唔係你拎舊錢出黎就一定有回報,我手頭上當然有好多創業成功嘅客戶個案,但如果唔想搞到好似 Fiona 咁,大家記得諗清楚計清楚吖~

 

【塔羅牌個案分享】

 

關於作者:神婆

神婆

非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

則留言

閱讀後覺得好,請多多讚好及分享~:)

其他熱門文章

  • 【塔羅個案】「我想分手,佢話唔好,不如去開房;然後我覺得佢仲愛我」 by 神婆
    Sally壓低聲線,「我當時話,如果你呢兩年唔娶我嘅,就分手啦!你都唔愛我嘅!結果佢聽完,同我講,唔好分手啦,不如咁,我,我同你去開房好無?神婆,妳明唔明我嗰刻嘅心情?」…
  • 毒理學家:香港係冇黑色嘅蛇嘅! by Fava Bean
    「唔⋯⋯病人冇影相⋯⋯佢話佢係黑色。」「喔。」毒理學醫生頓了一頓,突然語出驚人地說:「首先,香港係冇黑色嘅蛇嘅!」我不由得大為震驚,感覺人生迄今的世界觀被徹底刷新了,長居在此多年,連香港有蛇都不知道,更遑論會知曉此地沒有黑色的蛇!我兀自沉溺…
  • 從無綫台慶睇老屎忽點摧毀一個電視台 by 清君
    這些年來,你講得出有幾多個大台主持?阿旦、曾志偉、阿叻、Liza、Do姐,較後生的可能要數崔建邦了,或者我算漏不少人,但來來去去都是那一撮人。昨晚一開show,就是Liza、曾志偉和阿叻引領,有前輩坐鎮當然係坐定笠六,但不放手給後生揸大旗,…
  • 你會同另一半講你嘅性史嗎? by 我從不穿睡裙
    講曬出黎,對方真係完全無野,完全接受倒,覺得呢D過去左既野係唔重要的話,我真係恭喜你。但萬一,對方聽完之後唔係咁既話,你要小心了。…
  • 廢青的一天 by 木人里
    「我到底做緊咩?我到底做緊咩?我到底做緊咩?我到底做緊咩?幾時放工?幾時放工?幾時放工?幾時放工?幾時放工?幾時放工?下又叫我?我未回氣呀﹗幾時放工?幾時放工?屌你老母都唔撚講道理架﹗幾時放工?幾時放工?你條死老野識條春咩?幾時放工?幾時放…
歡迎讚好我們的facebook page,免費資訊源源送上。