【消委會報告行內分析】UberEATS 請唔夠電單車手,係絕對唔會準時嘅!

 

 

消費者委員會響11月15日就佢哋之前測試外賣平台嘅服務表現,收費等等出咗個報告。作為外賣仔,咁我就同大家講下份報告啦。

首先由個記者會完咗,各新聞機構出咗關於呢份報告嘅新聞,俾送外賣員工講得最多嘅部份係消委會話食物價格收費高過堂食。消委會,我明啦,原來啲外賣平台全部都係義務工作架,絕對無成本架,嗰系統係由個天跌落嚟架,無人寫架,送餐嗰班外賣員全部都係義工嚟架。

但係今日呢篇嘢主要唔係講啲外賣平台嘅食物價錢比起堂食貴幾多,而係想同大家解讀一吓份報告。響呢份報告入面提及嘅外賣平台,honestbee(蜜蜂)我對呢間公司嘅資料真係唔係太多,唔係有太多嘢可以評論嘅。而「我要外賣」呢個平台,我今日睇呢份報告我先至認識到呢間嘢,我連佢嘅服務範圍,有咩餐廳可以叫嚟食,佢係點運作我都唔知,所以真係評論唔到。

 

第一樣我想講嘅係準時呢樣嘢,亦都係全份報告入面最有趣嘅其中一個地方,因為報告入面,UberEATS嘅準時比率竟然只係得20%,而我覺得消委會呢個實測嘅數字絕對唔會有錯,因為UberEATS響送餐準時呢方面真係可以好災難架。

UberEATS呢個外賣平台係好有趣嘅,佢係咁多個外賣平台當中大部分外賣員都係以逐單外賣計人工嘅,各區只有少數有時薪嘅車手(不過咁少位,有啲區都仲有位剩),當無時薪車手好過。而UberEATS嘅外賣員係可以鍾意返就返,唔返就唔返(呢個亦都係UberEATS非常自豪嘅特點,藉此吸引人加入),既然係咁,咁佢每日嘅外賣員數量就會係好浮動啦,咁樣嘅話佢個陣時率得20%係好正常吖。如果你個送貨地址距離餐廳太遠一定要俾電單車做,步兵或者單車手唔做得,咁樣咁啱啲車手都做緊單,然後你張單響落單嗰陣你嗰區有好多張單已經等著送,或者你落單個一刻前後突然有好多人一齊落單,咁我就祝你好運啦……

但係UberEATS有個機制,如果張單太遠,本身預計由電單車送,但係附近無得閒嘅電單車手,公司嘅電腦系統就會俾張單步兵,又或者單車手,睇下佢會唔會送。我覺得係UberEATS係咁諗,張單橫掂都係遲,不如搵個步兵或者單車手去送啦,但係係UberEATS嘅單車手或者步兵係有一個送遞距離嘅,超過咗送遞距離嘅單UberEATS會offer 一程的士或者交通工具去送貨目的地,外賣員先付款,之後clam返錢,但係個外賣員都可以打返去係UberEATS到推咗佢,好多時有啲地址例如響 地利根德徑、舊山頂道等等係冇巴士、小巴落返嚟,而要由山上面行落返嚟根本係好辛苦嘅,所以有啲經驗啲外賣員見到呢啲地址而超出送遞距離都會盡量推咗佢,叫UberEATS俾返電單車送,因為步兵或者單車手做完唔洗做其他單嚕,畢竟人工逐單計嗎,時間就是金錢嗎。

有一樣好緊要嘅嘢,就係因為UberEATS電單車嘅人工夠你食餐午餐但係就唔使旨意做到好多嘢,所以一直都吸引唔到全職,穩定嘅長期兼職車手加入,因為隔離公司高過UberEATS多多聲,重要係做同一樣嘅嘢,有穩定時間都做隔離公司啦(但係步兵,或者單車手會搵到人,係因為真係有太多無聊人做,無成本嗎),導致呢間一直都公司唔夠電單車手,呢個機制幾乎每小時都會被啟動……

但係好多時步兵,或者單車手外賣員去餐廳攞食物已經用咗10 – 15分鐘,有陣時重要20 – 25 分鐘添,而個送貨地址係要去到餐廳,攞咗食物,撳咗開始行程之後先會睇到,如果張單係本身預計係俾車手做嘅,而派咗俾個步兵,或者單車手,個地址超出送遞距離而唔太偏僻嘅話,咪有機會嗰外賣員同你搭車送囉,但係如果佢堅持唔送,然後就要跟程序打返上UberEATS講嗰問題,話超出送遞距離要取消張單又最少要15分鐘,重要嗰客張單係落到餐廳部機之後一段時間先開始搵外賣員嚟,咁講緊嗰度都已經接近30分鐘,甚至更長,然後當嗰外賣員推咗張單,咁就嗰尋找外賣員送外賣嘅process又要重新開始過,好運嘅就俾電單車囉,唔好彩嘅,又係步兵或者單車手,跟住佢哋又推咗張單……

所以個準時率有20%,已經算係好好啦。

 

而蜜蜂嗰準時率得44%,我諗只不過係新公司姐,佢要慢慢適應下。

報告話袋鼠同熊貓嗰準時率分別有70%同埋60%,我只可以講,真係經驗嚟,唔係一般人可以取代。

 

消委會仲提及到話外賣有倒瀉液體,食物傾側,食物有倒汗水等等,其實所有餐廳所出嘅食物響我哋攞個一刻已經包好曬,唔係又個外賣員包架,攞個一刻通常都唔會睇到有咩事,但係多數行緊去送貨地址途中,通常啲食物先會開始出事,個陣已經好難再去拯救,所以無論外賣員送得幾小心好都會有可能出事,畢竟包食物嗰個唔係外賣員,而係餐廳。所以有倒瀉液體,食物傾側等問題,源頭多數係來自餐廳。

而報告指出有好多食物價錢響外賣平台貴過堂食,主要原因係因為外賣平台會響食客所付嘅食物費用總數攞30%作為佣金(正常情況下),所以有啲餐廳會因此加價嚟填補所損失嘅嗰30%,但係有外賣平台同啲餐廳簽合約去加以限制餐廳,咁會收平啲佣金作為誘因,所以可能因此食物價格會同堂食差唔多。

 

 

關於作者:外賣仔

外賣仔

則留言

閱讀後覺得好,請多多讚好及分享~:)

其他熱門文章

  • 雞之報應 by 霏子
    二零一四年嘅春天,阿海同阿琪仲讀緊Year_One,阿海仲未識到Miki,同阿琪仲係好friend。嗰一年,佢地見證咗一場悲劇,阿海稱為「雞之報應」。 …
  • 地鐵 by 李天恩
    生活在香港這樣的都市,女孩子們基本上都能從對方的衣著、裝扮、服飾及姿勢態度上得知許多資訊,從經濟狀況到住在哪一區,大致都能看得出來。我瞄了瞄自己的手腕,同時察覺那兩位女孩都偷偷督向我左手配戴著的卡地亞手錶,這隻手錶一般不是我這個年齡的女生有…
  • 我係搞手我係狗(二)——「啲女係咪處?」 by 霏子
    屌,我知你有畀錢,但都唔使咁過份,問埋我啲女係咪處㗎?我班女都係畀同一個價㗎咋,咁佢地係咪又可以要求你有超強御女術呀?呢條友真係當正我係媽媽生。最後,我冇追問佢嚟唔嚟,而佢都係嚟咗。…
  • 罷買萬寧真的可以嗎? by Terence Yun
    或者有一些參考,就是日本麥當勞的經歷。當年因為福喜事件拖累,日本人不再喜歡麥當勞,對其感觀以及服務給予堅決的說不,使日本麥當勞經歷過最嚴重的業務衰退,曾經大蝕347億日元,關掉160家門市,寫下進軍日本45年來最慘的業績。但到去年,該公司業…
  • 世上有種自虐,叫stalk男友和他的前度 by 預妍
    為左可以stalk到想stalk既嘢,可以去到幾盡?有朋友試過開Fakeaccount去加男朋友前度既Facebook同IG,有朋友試過為左搵佢地相愛的經過由男朋友Facebook2015年即係依家碌到去盤古初開,有朋友為左stalk男朋友…
歡迎讚好我們的facebook page,免費資訊源源送上。