邊一個發明了返工?

 

 

我諗好多人都有問過呢個問題,但實際上,又有幾多人真係思考過呢個問題呢?你有無?

我就有啦,我係好認真嘅。

首先,我諗緊返工嘅定義係乜,返工可以係廣義嘅,即係所謂嘅「搵食」,「唔搵邊有得食」;又或者,返工亦可以係狹義嘅,只係計算收取利益然後做某種特定嘅事。

如果係廣義嘅返工,咁應該無話咩發明唔發明,因為所有生物,都要「搵食」,即係為自己生存而想辦法攝取能量,而大部份生物(包括人類),能量嘅源頭都係來自太陽嘅。綠色植物進行光合作用,用陽光嘅能量將二氧化碳同水變做自己一部份,可能係葉,可能係塊根,可能係果實,可能係種子。之後植物會比動物食用,透過吸收同呼吸作用將食物變返做能量。

咁你話邊個發明光合作用?係咪上帝?呢個就係智慧設計論同達爾文演化論應該爭論嘅問題,唔係呢度要講嘅野。

如果係話採集狩獵社會呢?佢地每日就出去採集植物或者打獵,咁係唔係返工作呢?定只係單純搵食?我就咁諗嘅,佢地其實算係自僱人士,自己搵、自己食,只需要對自己負責,某程度上可以話返緊工,但某程度上,佢地亦唔係返緊工,只係為左自己生存,一定要同自己負責啫。

咁邊個發明採集狩獵?我估唔算發明,因為你肚餓然後去打隻兔仔黎食呢件事,係本能黎嘅;即係有一隻猩猩係森林摘生果黎食,你唔會話佢返緊工,你唔會問佢究竟係邊個叫你黎摘隻蕉嘅。

如果係農業社會呢?日出而作,日入而息,算係返工啦掛?講真,我都覺得未係,因為農耕社會雖然有交易、有供求,但做所有野,都係為自己,同只需要對自己負責;失收時,捱餓嘅係自己,豐收時,都係自己享受,所以同狩獵採集一樣,我覺得佢地唔算返緊工。(手工業、早期商業同理)

咁果時已經有士兵嫁啦喎,士兵一定算係「收取利益然後做某種特定嘅事」啦,咁佢地應該算返工啦,咁如果我搵到邊個第一個發明「軍隊」,咁我係咪可以話自己搵到發明「返工」嘅果條友,然後每日返工嘅時候都詛咒佢?

最早關於「軍隊」嘅記錄係公元前2700年,位於新月沃土嘅蘇美人留低嘅。咁當然佢唔會寫住係邊個發明「軍隊」嫁啦,我當入晒基加美修(Gilgamesh,定我叫佢「金閃閃」會多D人知係邊個?)數,但係你日日詛咒佢之前,問題黎啦,其實果時嘅軍隊(直到幾百年前民主憲法嘅出現前)其實都係上層社會嘅一部份,佢地係負責欺壓低下階層嘅,某程度上,佢地唔係「收取利益然後做某種特定嘅事」,而係做左某種特定嘅事而獲得大量利益,最後分贓,所以再狹義D,都未算係工作。

好啦,基加美修,你算逃過左一劫。

時間再一路推進,所謂返工,其實應該係工業革命後先出現嘅野黎嘅。即係1760年代,開始用機器取代人力,開始有一樣野叫「工廠」出現。而「返工廠開工」呢件事,無論點狹義都好,都一定算係返工。

普遍認為,1769年,英國人瓦特改良蒸汽機之後,工業革命正式展開,之後由英國開始漫延到成個歐洲大陸,再傳去美國。

好啦,終於出現一個人名,而呢條友應該係水洗都唔清嘅。如果無蒸汽機,紡織製衣呢D野全部都會係停留係家庭手工業,無得再擴大發展,唔擴大發展,就無法子起工廠,無工廠,就唔會有勞工。

你諗下,如果紡織製衣呢D野用人手做,會因為手工同經驗問題導致品質嘅差別,即使你做衫幾靚都好,你賣到幾多衫始終受限於你雙手嘅速度,你想請多個人做咩,佢一定無你做得咁好,但係你就浪費左原本你可以做衫嘅時間黎教佢,所以最後都只可以停留係家庭手工業嘅程度。

但用蒸汽推動嘅紡織機就唔同,無論邊個黎操作,出黎嘅成品質量都唔會有太大差別,你只需要比錢買多一部機,請多一個人,就可以有雙倍產能。

紡織製衣只係一個例子,其實各行各業都係咁。

而好不幸地,你就係果個比人請黎提升「產能」嘅人。換句話講,就係「返工」嘅人。

所以,如果有日有人問你:「究竟邊一個發明了返工?」,你可以理直氣壯咁答佢:「係英國人,瓦特!」

如果你返工時好痛苦,想搵個人詛咒下,你都可以搵「英國人,瓦特」。

又或者,你可以諗下生命其實係咪有其他出路,即係咁多人過勞死,你唔會希望下一個係你。

 

 

關於作者:Katarina Prestor

Katarina Prestor
好想寫小說,但寫親都無人睇。當然我唔覺得係自己問題。因為呢個世界上,當問題出現既時候,永遠都係人地有問題。https://www.facebook.com/katarinaprestor

則留言

閱讀後覺得好,請多多讚好及分享~:)

其他熱門文章

  • 港島人同九龍人,有鬼分別咩! by 小李子
    筆者係地道九龍人,由細到大讀書做嘢都係九龍區,冇乜必要好少喺港島區留連。 但自從上個月搬咗去上環做嘢,我就發覺港島人真係零舍唔同,係零舍串呀! 行去中環食lunch,個個西裝友都好似特別白鴿眼咁, 連翠華個阿姐都特別惡! 但我到最近機緣巧合…
  • 我可以肯定,大部分人並不適合一個人旅行。 by 達米安
    獨自一人在舉目無親的地方會令人變得緊張,因為無論遇上甚麼難題,發生了甚麼意外,都不會像在家鄉一樣有家人朋友的支援,也沒有了對公共系統的熟悉,所有後果都得自己承受。更甚者,當在語言不通的地方時,連如何向路人求助,都可以是一個難題。只要不是太缺…
  • 【塔羅個案】基督徒黎開牌問:「我個仔契比黃大仙好唔好?」 by 神婆
    「我想問下個仔契比黃大仙好無呀,」Angela個樣好認真,「會唔會以後條路易行啲?」…
  • 【偽影評】 《棟篤特工》:電影的隱喻? by 馮志豪
    作為大學主修哲學的子華神,不少演出都是借故事諷時事,甚至有時直接觸及政治神經,例如他在楝篤笑中曾經說過 : 「知唔知一國兩制最偉大地方係乜?就係肯承認佢自己個制真係嚇親人!」和「全港市民熱烈慶祝『收返』!」等,令中在笑中帶來一點思考。…
  • 25歲以後 by 小盛女
    當我永世做Marketing,由assistant升到officer再升到senior又甚或是咁好彩升到manager,人工都可能只有2、3萬,日日做到隻狗咁,到頭來首期都儲唔到,真係諗起都一額汗,最後我想了十萬九千次,只有兩個辦法可以解決…
歡迎讚好我們的facebook page,免費資訊源源送上。