八達通生性,班「八粉」肯定倍感安慰

 

因被政府半扶植而雄霸市場多年最近受支付寶瘋狂狙擊但依然屹立不倒嘅八達通喺上月宣佈,佢個都唔知幾多人下載咗嘅電話app「O! ePay」,終於同班契弟大陸電子支付對手睇齊,支援QR Code 付款功能,一班忠心八粉肯定為咁生性長進嘅八達通而倍感安慰。

家下網絡恥笑下八達通,又會俾班八粉話係打手要死全家,但今舖支援QR Code我又真係撐八達通嘅。

回想返起幾個月之前嘅八達通,就真係唔知佢做乜勁喇。今年七月嘅時候,政府明明俾張好牌佢上,主動開始喺主要隧道幹道推行「停車拍卡」,八達通簡直乜都唔駛做,淨係坐喺度都發過豬頭,和味過和味龍;點知自己屎忽痕自以為好鬼進步,整咗支伸縮啪啪啪卡神器(學名:價值港幣128蚊嘅伸縮八達通駕車好輕鬆),諗住方便市民啪啪啪卡。

可惜呢支自衛神棍設計實在太「時尚」同太「user-friendly」,引來高登連登仔雙管齊下瘋狂恥笑,話將張八達通痴喺衣架烏蠅拍仲方便過玩你支伸縮棍。唔知各大門市開始割價促銷未呢?其實班八粉都可以幫手諗下,呢支自衛伸縮棍除左啪啪啪卡之外仲有乜嘢潛在功能,假如開拓到另類市場同玩法,仲可以廢物利用幫堆神棍殺出新血路。

諗深一層,將QR Code應用喺道路收費,可能仲方便過你玩「停車拍卡」。到時唔記得帶八達通唔緊要,只要用佢個唔知幾多人下載咗嘅電話app「O! ePay」,掃兩掃就輕鬆放行;唔鍾意八達通嘅又可以用偉大祖國嘅一大堆支付工具,製造下市場競爭唔好俾八達通獨大,直接做大香港電子支付市場個餅。

不過咁,肯定又會有班八粉走出嚟話大陸嘢係雞係公廁,用QR Code只會益咗班大陸支付工具,幫佢地染紅香港盜取個人資料云云,實行應該乜都唔準用,落後啲「停車拍卡」就最開心。如果係咁大家就真係「停車自己揀,拍卡唔好喊」喇。

其實八達通都可以研究下,點樣又唔駛停車又唔駛掃QR Code又可以直接扣錢過收費亭嘅方法,咁樣咪最方便市民囉。諗諗下,爭咩呀,不如同Autotoll撈埋一齊做Octotoll,咁樣咪最和氣生財囉super!

 

關於作者:林保其

則留言

閱讀後覺得好,請多多讚好及分享~:)

其他熱門文章

  • 港島人同九龍人,有鬼分別咩! by 小李子
    筆者係地道九龍人,由細到大讀書做嘢都係九龍區,冇乜必要好少喺港島區留連。 但自從上個月搬咗去上環做嘢,我就發覺港島人真係零舍唔同,係零舍串呀! 行去中環食lunch,個個西裝友都好似特別白鴿眼咁, 連翠華個阿姐都特別惡! 但我到最近機緣巧合…
  • 我可以肯定,大部分人並不適合一個人旅行。 by 達米安
    獨自一人在舉目無親的地方會令人變得緊張,因為無論遇上甚麼難題,發生了甚麼意外,都不會像在家鄉一樣有家人朋友的支援,也沒有了對公共系統的熟悉,所有後果都得自己承受。更甚者,當在語言不通的地方時,連如何向路人求助,都可以是一個難題。只要不是太缺…
  • 【塔羅個案】基督徒黎開牌問:「我個仔契比黃大仙好唔好?」 by 神婆
    「我想問下個仔契比黃大仙好無呀,」Angela個樣好認真,「會唔會以後條路易行啲?」…
  • 【偽影評】 《棟篤特工》:電影的隱喻? by 馮志豪
    作為大學主修哲學的子華神,不少演出都是借故事諷時事,甚至有時直接觸及政治神經,例如他在楝篤笑中曾經說過 : 「知唔知一國兩制最偉大地方係乜?就係肯承認佢自己個制真係嚇親人!」和「全港市民熱烈慶祝『收返』!」等,令中在笑中帶來一點思考。…
  • 25歲以後 by 小盛女
    當我永世做Marketing,由assistant升到officer再升到senior又甚或是咁好彩升到manager,人工都可能只有2、3萬,日日做到隻狗咁,到頭來首期都儲唔到,真係諗起都一額汗,最後我想了十萬九千次,只有兩個辦法可以解決…
歡迎讚好我們的facebook page,免費資訊源源送上。