【塔羅心得總集】一年又過去,點解我仲係單身?(男性篇)

 

每日見客嘅同時,我亦會留意客人嘅言談習慣、儀表打扮,因為呢啲細微位,都有助我了解客人,從而睇吓如何順住解牌去提供建議。開業以來,我經常被問到「如何擺脫單身」「幾時有拖拍」之類嘅問題;而從男性女性客人口中亦各自收集咗唔少「咁樣嘅人一定唔會考慮囉」嘅要素。

佳節臨近,一於就同大家分享部分「神婆 Database」,作為參考又好,搏大家一笑都好啦。事先聲明,「無錢咪無女」呢啲理由不在此列,我手頭上亦有好多認為「無錢咪無仔」嘅個案,世界是很公平的,呢方面嘅事有機會另外撰文再講。

 

(1)氣味

有時女性噴太濃香水你都唔鍾意啦?男士亦然。有啲年輕嘅男士以為噴古龍水會為自己增添成熟嘅男人味,但其實你外表望落去好後生好細個嘅,咁樣做只會弄巧反拙;甚至有人以為噴古龍水會遮到啲菸味汗味,老老實實,其實會仲臭架!

定期洗頭洗衫,信我,乾爽嘅洗頭水同埋洗衣粉或柔順劑嘅味道,已經係最好聞嘅味道。真係大汗嘅,噴止汗劑啦。

 

(2)眼鏡

戴眼鏡唔一定薯,亦唔需要刻意戴隱型眼鏡黎扮 Chill(有時戴完仲怪),不過,重點係要定期清潔鏡片呀!出咗街無得洗眼鏡嘅,你用件衫邊抹下都好吖,總之唔好比人見到你副鏡片有手指模、有面油呀大佬!真係有啲礙眼架!

 

(3)儀容

唔好覺得男仔用護膚品或者修眉就係「核突」,一個姿整嘅男仔,同埋一個滿臉走米暗瘡甚至有暗瘡疤嘅男仔,你覺得邊種會比較易被女仔接受?

至於修眉,唔係叫你執到個樣好似偶像派咁白淨脂粉,而係好簡單,頭髮長你都會去剪,如果眉頭鼻樑上面雜毛多,成個樣望落去都會無咁清爽。買個眉鉗從毛根部分清一清雜毛,你會發現自己個樣真係會有正面變化架。

睇到呢度你可能會話:神婆,係咪個個女仔都咁睇外表啊?我都好老實咁問返你一句,你地睇其他人第一眼或第一感覺都係黎自佢外表或打扮(無論個感覺準唔準確都好),既然係咁,人地同樣地都係咁對你架咋噃!

 

(4)談吐

香港男士經常有個通病,就係好鍾意認叻,可能係男性荷爾蒙影響,又或者係無自信所以想搵啲嘢刷存在感啦,但係好老實,開口埋口將自己識嘅嘢拎出來講同炫耀,個感覺就好似有港女當眾話自己「嘩我覺得自己好靚女好可愛」一樣,你係咪會心諗「做乜勁」咁樣先?

有麝自然香呀,除非你富二代想吸啲港女返黎炫富,又或者本身真係有啲好叻嘅才能;不然,其實香港女仔好醒架,你係真正有料,定係扮勁,其實佢地聽得出架,唔當眾拆穿你係比面你架咋。睇到呢度,有無開始明點解有啲女性約咗一兩次之後就唔再應機吖?

 

(5)打扮

你以為格仔裇+牛仔褲+背囊係好差嘅配搭?其實唔係,一來人著衫而唔係衫著人,點解日本 Visual Kei 係型,黎到 MK就係核突,呢啲係氣質嘅問題。

真正出事嘅打扮,有三樣嘢:波衫波褲、拖鞋或涼鞋、以及爛哂霉哂嘅袋或者鞋。

波衫波褲唔受歡迎嘅理由我唔清楚,不過從客人口中得知,著波衫赴會嘅男性,風評比拎動漫袋出街嘅男性更差⋯⋯如果有女性讀者有同感歡迎留言,因為我真係唔明波衫問題喺邊。

至於拖鞋⋯方便係一回事,爛腳指係一回事(笑),最主要係著拖鞋時,無論男女,步姿都會不禁 Hea 咗;直接啲講就係行得爛撻撻,感覺自然扣分。

 

(6)髮型

最後講髮型。唔好盲跟潮流啦,髮型都要襯面型,前排個個學剪韓星齊蔭頭,咁你有無跟到足化行粉底出街吖?

飛機頭嘅話無問題,但要注意髮膠用量,噴到個頭硬哂咁其實唔係人人好睇,有時頭油多啲嘅,仲變咗一堆頭皮。

女性對男仔髮型要求好簡單,見到額頭會加分,因為視覺效果會精神幹練啲。

 

呢幾年黎從客戶口中得知嘅資料就係咁多,不過就算唔係為姻緣,其實參考以上意見嘅,基本上對你搵工面試都有幫助架,各位男性朋友不妨留意下吖!

 

【塔羅牌個案分享】

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

則留言

閱讀後覺得好,請多多讚好及分享~:)

其他熱門文章

  • 人失敗到盡頭總要學會打飛機 by 田小姐
    我呢位朋友,大學畢業五年,一個月前搵到一份寫字樓工,月入唔夠一萬。早幾日成班朋友約出黎食飯,呢位朋友就話佢想辭職唔做,自己搞生意。我心諗,搞生意?你連自己嘅生活都未搞得掂喎!於是我就問佢:「你份工好哋哋做咩唔做呀?」佢「唉」左一聲,話:「我…
  • 愛男友,請愛埋佢屋企人 by 小盛女
    「有無人要食麵啊?幫你地夾。」Mike大喊。「使乜幫佢地夾,佢地無手o架?」Brenda黑面說。Mike即時怔了一怔,他從沒想過這麼簡單的舉動會令Brenda爆seed。「都係順便姐,大家一家人,我幫你夾埋喇。」Mike盡量壓抑自己的情緒,…
  • 應如何對待男友嘅朋友? by 小盛女
    晚飯後她又教大家玩大學時O-Camp的集體遊戲,很快便和Mike的朋友們混熟,特別是男性朋友。玩遊戲少不免有些身體接觸,Mike都一一看在眼裡,他最怕就是看到這些疑似抽水的行為,出聲唔係唔出聲又唔係,自己女友又鬼死咁主動,同人玩得鬼死咁盡興…
  • 「我想結婚之後先搞,有錯咩?」 by 樂人
    點會有錯呢,我覺得堅持係好事,o岩架,千其唔好俾佢得手添呀,唔係好快趙完鬆!VV,你要醒水!呢啲咁嘅臭男人,我仲見得少咩!…
  • 【年輕新貴】識打工一定係做半更保安 by 鵝鑾鼻燈塔
    看更呢樣野,做得真係好足,而且唔需要太多體能訓練,單係實踐呢方面抱負,門檻又低,已經贏左。…
歡迎讚好我們的facebook page,免費資訊源源送上。