【塔羅個案】名校老師婚外情的故事

文教 / 最新文章綜覽

 

大家對老師嘅印象係乜嘢?係有教無類,抑或係道德端正?我中小學都有幸就讀風評唔錯嘅所謂名校,大部分老師教學用心,係我嘅榮幸。

今次嘅個案,或者要再次推翻大家對老師嘅固有印象。咁我都必須講句公道話,老師都係人,而人會犯錯,亦都唔係一件難理解嘅事;不過,可以理解係一回事,能否接受,係另一回事。

Emily 年方三十,眉清目秀,喺某著名中學任教。佢本身有一個已經談婚論嫁嘅男朋友,不過喺定婚後無耐,男友於國外玩高危運動時不幸遇險,老套講句,二人就從此陰陽永隔。

Emily 花咗好長時間都對呢件事無法釋懷,不過手停口停,加上為人師表,總不能因為個人情緒就影響學生學業,「我遭遇不幸嘅事,但唔想影響更多人,特別係學生,佢地就黎 DSE,如果呢個時候我無啦啦請假,邊度搵代課?就算搵到,都對佢地唔好啦。」

當然,呢件事好快就喺學校傳開,不少學生不約而同為 Emily 送上安慰,同事老師亦都表示支持,可見 Emily 喺校內人緣唔錯,能受學生歡迎,都應該係個唔錯嘅老師。

Eric 係校內某學科嘅主任,知道 Emily 嘅事之後,開始主動經常邀約佢食飯、放工去飲嘢。Emily 不禁心生好感,不過因為 Eric 本身已婚,所以 Emily 同自己講,「只係同事關心,唔好亂諗」,再加上自己其實亦無打算去開始新嘅關係同感情,雖然未婚夫走咗,不過 Emily 對未來奶奶老爺都仲係好關心,「佢地得一粒仔,就咁走咗,如果連我都唔理佢地,我怕佢地諗唔開。」

聽到呢度,我心痛嘅。不過,接下黎佢同我分享嘅事,就令我非常氣憤。

故事嘅起緣係,Eric 喺某次同 Emily 飲完嘢後,主動話送佢返屋企,二人發生咗關係。「我知道唔可以賴,但如果唔係有酒精影響,我諗我一定會堅決啲拒絕。」Emily 一副自嘲口吻,「我都覺得好可笑,明知對方有老婆,明知咁樣做唔啱……我事後係咁鬧自己:Emily 妳有無咁 Dry 呀?係咪寂寞到咁呀?所以,我好想呢件事係一次就算。」

不過,嗰晚嘅關係,只係開始。Eric 唔知係咪食過番尋味,開始不斷向 Emily Send 曖昧短訊,一方面不斷透露自己同老婆性事唔愉快。Emily 一開始都好企硬,以為自己唔會再同 Eric 發生任何事,但係好快,佢地就有第二次開房,第三次,第四次……

然後 Emily 發現自己對 Eric 真係動咗感情,「我開始信佢話同老婆唔開心嘅事,亦信佢話想離婚……神婆,我係咪好傻?係咪好蠢?」

我好想答一句「唔係」,不過,頭先 Emily 問 Eric 對自己係咩感覺,開咗一張正牌惡魔同賢者……簡單解釋,Eric 係單純地覺得 Emily 就手容易食,純性關係,純偷玩;但係一啲感情都無。

而呢個時候,學校入面開始有閒言閒語,大概係有人留意到 Eric 經常去搵 Emily 單獨食飯,或者任何原因都好;喺佢地呢種關係延續咗大約幾個月之後,Emily 有一日返到學校,先知道 Eric 即將離職,轉任其他學校。

「我問佢點解唔同我講,轉工,一定唔係一時三刻嘅事啦?」Emily 有啲激動,「點知佢話,佢做啲咩,無必要同我交代,不過如果我想個 Game 繼續玩落去嘅,佢隨時都 OK。「神婆,妳明唔明,Game 呀!佢話係 Game 呀!Game 咋!」

咁樣 Emily 當然就唔會再理會 Eric,一口氣將佢所有聯絡方式 Block 哂。原本就相安無事,不過 Eric 離職四個月之後,學校搞開放日,喺 Emily 唔知情嘅情況之下,Eric 帶埋老婆返黎參觀,話探舊同事咁話。

「我喺操場見到佢時,由腳板底寒到上心口,雙手出哂冷汗。點解,點解佢會喺度?我好想走,但好多學生家長同事望住,而我有我嘅崗位,我原本諗住佢應該唔會過黎搵我架啦,所以繼續同學生整緊攤位。」

不過,Emily 估計錯誤。Eric 二話不說,同老婆十指緊扣,行到 Emily 面前。

學生見到 Eric 好開心,不斷叫「乜 Sir 乜 Sir」咁樣;而 Eric 太太,有少少怕羞,只係向現場嘅學生微笑點頭,然後同 Emily 眼神對上。

「老婆,我同你介紹,呢位係 Miss Emily,佢算係 Under 我嗰科嘅。」Eric 呢個時候望哂 Emily,意味深長咁笑住講,「喺我有需要嘅時候,佢幫咗我好多架。」

我聽到呢度,忍唔住講咗句粗口;而 Emily 當時聽完呢句說話,即刻衝咗入廁所嘔。

Emily 黎搵我,其實主要係問工作前景,因為佢想讀書;Eric 嘅事,佢只係問咗一條。當然,至少佢自己都知道「問黎無謂」,而的確,就算唔開牌,Eric 呢啲表裡不一嘅人,唔需要多問,都知道唔係一個關係情感上嘅好對象,至少對 Emily 黎講唔係。

人渣?PK?衣冠禽獸?為人師表…你可能會諗到好多痛罵 Eric 嘅字詞,而我聽完 Emily 嘅故事之後,都不禁喺心入面鬧咗 Eric 好多句人渣。食又食咗,玩又玩埋,仲要事後黎攞彩,我唔只為 Emily 抱不平,亦為佢太太心痛。如果佢知道身邊呢位任教名校、受學生歡迎、表面上仲對自己好好嘅老公,居然內心有咁黑暗嘅一面,唔知,佢會有咩感想?

對 Emily 黎講,2017 年恐怕係夢魘嘅一年。未婚夫離去,Eric 又咁樣。慶幸 Emily 讀書同工作方面都將會有唔錯發展,我可以做嘅,惟有祝願佢 2018 年會過得順利啲啦。

 

【塔羅牌個案分享】

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

則留言

閱讀後覺得好,請多多讚好及分享~:)

其他熱門文章

  • 人失敗到盡頭總要學會打飛機 by 田小姐
    我呢位朋友,大學畢業五年,一個月前搵到一份寫字樓工,月入唔夠一萬。早幾日成班朋友約出黎食飯,呢位朋友就話佢想辭職唔做,自己搞生意。我心諗,搞生意?你連自己嘅生活都未搞得掂喎!於是我就問佢:「你份工好哋哋做咩唔做呀?」佢「唉」左一聲,話:「我…
  • 愛男友,請愛埋佢屋企人 by 小盛女
    「有無人要食麵啊?幫你地夾。」Mike大喊。「使乜幫佢地夾,佢地無手o架?」Brenda黑面說。Mike即時怔了一怔,他從沒想過這麼簡單的舉動會令Brenda爆seed。「都係順便姐,大家一家人,我幫你夾埋喇。」Mike盡量壓抑自己的情緒,…
  • 應如何對待男友嘅朋友? by 小盛女
    晚飯後她又教大家玩大學時O-Camp的集體遊戲,很快便和Mike的朋友們混熟,特別是男性朋友。玩遊戲少不免有些身體接觸,Mike都一一看在眼裡,他最怕就是看到這些疑似抽水的行為,出聲唔係唔出聲又唔係,自己女友又鬼死咁主動,同人玩得鬼死咁盡興…
  • 「我想結婚之後先搞,有錯咩?」 by 樂人
    點會有錯呢,我覺得堅持係好事,o岩架,千其唔好俾佢得手添呀,唔係好快趙完鬆!VV,你要醒水!呢啲咁嘅臭男人,我仲見得少咩!…
  • 【年輕新貴】識打工一定係做半更保安 by 鵝鑾鼻燈塔
    看更呢樣野,做得真係好足,而且唔需要太多體能訓練,單係實踐呢方面抱負,門檻又低,已經贏左。…
歡迎讚好我們的facebook page,免費資訊源源送上。