喺香港做Freelance 嘅利與弊

 

 

「其實你哋返工為咗啲咩㗎?」

是咁的,我以前做廣告嘅。
自從大學畢業出黎之後轉過四份工。人工萬二,返工時間朝九晚十一。你老闆。轉黎轉去咪又係咁上下。講真喎。

某一晚,好彩老細早走,我成功九點正放到工,跟住同班死黨買咗半打啤酒去附近嘅觀塘碼頭吹個水。一番討論之後,我哋得出咗個結論 — 大家都好厭倦自己嘅工作,記者有記者嘅壓迫,Marketing有Marketing嘅辛苦,就連banker都有banker嘅苦悶。 沈默咗一陣之後,我個Banker friend突然彈一句:「其實你哋返工係為咗啲咩㗎?」

記者friend:「挑,仲好意思講!二萬五咪係你人生嘅意義囉!」

我哋四個笑咗成晚,完全唔記得咗答佢呢條咁有啓發性嘅問題。但我之後成個禮拜都集中唔到精神做嘢,因為佢條問題喺我腦海裡面係咁盤旋。結果,我終於把心一橫向老細辭咗份工。因為我平時有影開相做開平面設計,加上有時啲friend搵唔到人都會搵我頂,反應都唔錯,所以我索性走咗去做全職freelance。

話長唔長,話短唔短,做咗Freelance接近兩年。由當初成隻綿羊咁咩都唔識係咁俾人搵笨,到宜家都算做得順利,所以想喺度同啲掙扎緊做唔做Freelance嘅人分享一下自己對呢個行業嘅睇法。

 

優點一:彈性上下班時間

其實上一代人經常批評八九十後唔捱得、怕辛苦,其實我想講有時唔係話辛唔辛苦,工作量大唔大嘅問題,而係我哋要嘅係有效率嘅工作彈性。喺香港,有時返工最反智嘅係我朝早無論如何都要九點返,食完飯飯氣攻心想瞓返十五分鐘都唔得,最後又係奉旨OT。例如喺德國,人人都可以五點準時放工,之後去同三五知己飲啤酒食pretzel,幾逍遙呀。但係喺香港人工又少,樓價又貴,工時又長,其實做freelance嘅機會成本真係相對好低。自己接freelance最好嘅地方係客人只會俾個deadline你,中間你想點做任得你。自問我又細到大都係到夜晚十一點productivity先高嘅人,所以做freelance俾到我兩點瞓十點起身嘅自由。

 

優點二:刺激感 + 滿足感

因為每間公司都會有佢哋嘅客路,所以返工面對嘅客人類型都相差無幾。例如你做in-house 攝影師,可能影黎影去都只係幫公司影佢哋啲產品,最多俾埋佢哋啲活動你影。但漸漸你會覺得自己好似一個攝影機器,影影下都麻木咗,可能悶到連本身對攝影嘅興趣都冇埋。接freelance嘅好處係驚喜重重,今次可以係影慈善晚會,下次影下啲食物,悶咩又可以換下影家庭相 (咁當然啦你要有返一定程度嘅技術)。

 

優點三:自由 — 想做咩就做咩

香港近兩年好興講一個term叫SLASH,泛指一啲同時有幾樣freelance技能嘅全職自僱人士。例如我自己咁,有做攝影、平面設計同翻譯。前排屋企發生咗啲事唔想出去同人social,所以keep住做平面設計多 。而近排就集中做攝影,因為三樣黎講攝影俾到我最大嘅成功感 ,仲要好pay啲添!好多朋友都會成日問我點接job,當中唔少得有傳統嘅referral啦,其實我通常一半嘅job都係朋友介紹。除此之外,宜家其實網上都有唔少渠道專俾做freelance嘅人接job嘅,不過選擇時候一定要小心謹慎。

本土啲黎講自己好鍾意嘅其中一個網就係freehunter.hk,最好嘅係就算我嗰排懶唔搵job,啲客都會自動上佢嗰網黎contact我。加上我有一次接過一單好好pay嘅job我就開始keep住用佢。

另外,如果對國際市場興趣嘅話我就會推薦freelancer.com,因為接到嘅都大部分係外國客人,可以有機會認識同學習唔同國家嘅設計風格。好彩自己英文溝通能力上都算唔錯,所以同外國人skype或phone chat都冇問題。

 

缺點一:孤獨感

好多人都講到我哋呢啲做Freelance嘅人生活好正咁,因為又唔使早起身,想去旅行又可以隨時去。但佢嘅優點亦正正係佢嘅缺點,因為人嘅工作自由愈大,社交圈子就愈模糊。做freelance最大嘅敵人就係自己俾自己嘅孤獨感。記得以前返工有幾個同事總會晚晚一齊OT一齊傾下計,起碼會有個共同話題,例如喺背後講下啲好冇禮貌或者好無理嘅客啦,又或者講下某一位成日射波嘅同事啦,咁就一日。做freelance好多時唔係話會真係冇朋友,因為好多本身熟嘅夜晚都會約出黎,但工作上嘅夥伴就始終係少啲。如果有心喺呢行發展,我真係勸告大家要多啲出去識人 。

上meetup.com 或者 eventbrite.com 報啲相關嘅活動,例如有時會有啲Friday Drink、工作坊或者講座。嗱,我自己就有個獨門秘方嘅,唔好周圍同人講呀拿呢度講呢度散:通常我去呢啲活動嘅目的只有一個,就係搵到啲啱嘴形嘅人(最好係單丁或二至三人組),之後搵機會就同佢哋夾下啲project或者做完啲設計問下佢哋意見咁。最理想係問到一個可以間中出黎coffee shop一齊做嘢志同道合嘅戰友,感覺就好似中學一齊去自修室溫書咁,做嘢都有衝勁啲啦係咪。

去co-working space做嘢,香港有大大小小嘅總有一間會啱你。如果冇咁貴可以考慮一啲類似YOLO COWORK 咁嘅地方。之前有friend帶過我上去環境唔錯,乾淨企理,仲可以認識到各行各業嘅Freelancer添。

如果自己有信心,可以同三四個人合租個細細哋嘅studio。如果想平嘅建議喺觀塘/新蒲崗/葵青舊式工廈樓上,肯格下價嘅話(唔計算水電煤)每人每個月俾$1000有找都搞得掂喇。

 

缺點二: 收入唔穩定

做freelance收入嘅穩定性真係好睇天時地利人和,所以唔同人都有唔同嘅遭遇。例如臨近大時大節尤其聖誕節會零舍多job,仲要啲客嗰排唔知點解通常出啲價都高啲,自己嘅經驗係可以達全年平均月入嘅2.5至3倍。但我試過淡季一個月得兩單job接,連家用都差啲唔夠俾。所以如果你係個重視收入穩定性嘅人,就要勤力啲上網搵job同識多啲人,唔係一到淡季就會失曬預算㗎喇。最後,如果你認為自己嘅自律能力比較低都要再加考慮係咪要做Freelance。

 

缺點三: 沒有任何福利津貼

做freelance其實仲有一個實際考慮,雖然你可以話比上述嘅問題較細,但其實你做freelance就會落入自僱人士嘅類別,變咗平時僱員提供嘅醫療津貼、員工福利等等全部都唔會有,因為根據香港法例,自僱人士呢方面要自己打點。當然你可以自己買保險,咁到咗小至傷風感冒大至手術住院都有多重保障啦。不過我今日唔係想sell保險嘅,所以大家想知道更多詳情都係問返大家身邊做嘅保險friend比較好。

 

做freelance好打工好 講到最尾最緊要都係快樂

近幾年好興講work-life balance,但你知唔知一個香港人平均人生中有12年嘅時間都係喺工作中度過,亦都係唔計瞓覺嘅四分一嘅時間。喺2016年,瑞士銀行做咗一項調查發現香港係全世界工時最長嘅城市,港人平均每星期工作50小時。好多人都話工作時間應該愈短愈好,因為自由時間愈多。但諗深一層,其實大家應該努力去搵一樣自己真正enjoy嘅工作,一樣令你唔使返工等放工嘅工作。當work同life融合埋一齊,work 同 life 都係life,使鬼balance咩。

如果你好猶豫做唔做freelance好,其實我有個建議俾大家。Freelance有好多種,外國有一個term叫moonlighter,意思係指啲喺空餘時間接job做嘅人。做moonlighter嘅好處係你唔使咁大賭注一定要辭咗份工先,而可以先邊返工邊接job試下究竟呢個要主動搵job嘅模式係咪啱自己。

講真大家都係為快樂同麵包啫。如果你對自己工作有熱誠嘅其實無論做長工定freelance都會攞到你要嘅成功感同滿足感。有人二十三四歲就話自己冇前途乜乜乜,大佬呀麵包發酵都要時間啦下話。

最後一句,記住千祈唔好為穩定而穩定,更唔好為自由而自由。

 

關於作者:Richard 仔

八十後全職freelancer,對攝影、設計行業略有認知,亦對香港人追隨夢想這議題獨具看法。盼得到各江湖大師賜教。

則留言

閱讀後覺得好,請多多讚好及分享~:)

其他熱門文章

  • 琴日我第1次約PTGF,有感而發(利申23歲男) by losing her was blue
    話說前日放假,無聊係IG到禁下ptgf呢樣野睇下。我就咁睇,行個街,睇場戲,全部都收人幾百蚊個鐘。但我見到個tag有成4萬幾個post。係個刻,我就知道,原來真係有人會幫襯。係到我想講句,多謝哂你班仆街毒撚/9公係到成日頂爛市,做壞規矩,寵…
  • 雞之報應 by 霏子
    二零一四年嘅春天,阿海同阿琪仲讀緊Year_One,阿海仲未識到Miki,同阿琪仲係好friend。嗰一年,佢地見證咗一場悲劇,阿海稱為「雞之報應」。 …
  • TVB 是大到不能倒 by 阿享
    香港有咩企業唔可執笠?公營企業,港燈、中電,煤氣?四大發展商?港鐵?港交所?你依家要我答,通通唔係。TVB先係最香港大唔能夠執笠嘅企業。…
  • 【塔羅個案】你身邊有無日日覺得自己懷才不遇嘅人? by 神婆
    你唔知道自己鍾意、擅長做咩唔緊要,起碼你要話到比我知你討厭、抗拒做啲咩,咁我先可以用最少嘅問題引導到你去較清晰嘅方向;如果你咩都「唔知呀」咁,老老實實,你可能問好多問題都問不出個究竟。 …
  • 點一根煙,記梁天琦 by 程悅
    作為投過他和梁頌恆的新界東選民,我總想找回那夜曾支持他的六萬多人,大家現在是意氣消沉得不欲說話,還是早已恨透他的「懦弱」,變成在連登為他入獄而喝采的人?我寧願相信,大家只是對現實無語,像面對抑鬱病人,了解的盡頭反而吐不出半句安慰說話。…
歡迎讚好我們的facebook page,免費資訊源源送上。