金判坤返韓國,又關「港奸」事?

 

部分本地波死忠恨咗咁耐,金判坤終於下台走人。(雖然亞洲盃外圍賽仲有場對北韓未踢就走,又俾人插佢唔負責任)又一如好多波台黐線佬預期,金蛇一下台就有好多平日唔睇波嘅所謂「球迷」,甚至連「球迷」都唔係嘅塘邊鶴係到鳩噏金蛇點點點偉大。其中一個就係某位前「旅港X籍XX華人」(要講返「前」因為好似移咗民),直頭就講到係「港奸」搞事。呢位乜生平日都偉論多多,本來都想一笑置之就算,但呢舖實在太戇鳩。

唔知點解,本地傳媒frame金蛇下台嘅時候,往往都會係話佢重用入籍兵引起爭議。當然,係部分大中華膠/愛国血統論者眼中,呢個的確係死罪,但對波台黐線佬嚟講,用入籍兵唔係問題,好多入籍兵的確係體能、鬥心、甚至技術上都好過華人,揀佢哋都無可厚非,亂揀人同亂出人先係問題。幾個球員,好似卓耀國、陸志豪、謝德謙……都唔知幾時得罪金蛇,香港隊一隊好似永遠都冇佢地份咁。有睇本地垃圾波就知,謝德謙上年打得咁好,年尾都輸畀葉鴻輝贏唔到最佳門將,甚至阿輝上台都話自己唔值得拎,而矛頭就指向有份評審嘅金蛇。另一個例子曾錦濤,再上一季打得好,唔揀;到後尾表現回落,又揀返,玩嘢咩大佬?至於辛祖打中場、揀屎波嘅「墓臭」個啲,有睇就真係會知。

阿乜生話識好多「本土中人」好敬重金判坤,佢講緊咩人就唔知,但有幾多真係有睇,心照啦。呢位「律師信魔人」仲口口聲聲,最反金蛇就係「熱普城友仔」。先唔講嗰班人前排叫人唔好睇本地波,體液報講呢單嘢嗰陣都唔見得有幾反金。(又話hater比supporter更清楚,原來都未必)不過啦,佢將所有唔認同佢嘅人打成熱狗五毛都唔係第一日。

講返金判坤,吹到佢係香港民族英雄咁真係好誇張。追本溯源,點解香港隊有一排突然咁多人睇咪又係多得鄰國幾張白痴海報。香港人呀嘛,自己人只有我可以鬧,你唔鬧得。幾場外圍賽踢得好有好多因素,甚至係環環相扣——頭幾場對手廢,多人入場,又俾幾張海報搞到心中有氣,球員自然想威返俾人睇;贏得幾場,自然又想繼續入場睇下點威……真係咁多曼德拉,用運動凝聚全國咩?金蛇只係剛好係呢個嘅時候教緊,而又咁好彩俾佢遇到一大班入籍兵入籍踢港隊,又咁好彩抽到條好好好好籤。

公道少少,話金蛇係垃圾,唔完全係,但係咪真係咁好,亦唔係。佢最叻除左教到球員心態,真係想贏之外,就係同到足總、球圈班老世溝通,係到咁多年識得講嘢,識點PR。(其實部分外籍兵有時都會揀波踢,去到港隊唔見得有咩分別)金蛇上一手摩力克咪就係唔識同班老世、華人大佬溝通,俾佢地夾手趕走。(咩日後會變「中國B隊」,咪玩啦,以後鄰國踢波唔夠香港好搵就話嚟呢邊踢姐,而家睬你都傻啦)

外人唔睇本地波,見到佢講咩「Die for Hong Kong」等等金句就覺得佢真係好愛香港,但其實香港都畀唔少嘢佢。本來佢都諗住收山唔踢,點知又俾佢遇到郭家明,仲叫佢嚟香港繼續踢,踢踢下就輾轉係到咁多年。其實可以想像,香港波雖然搵唔到咩大錢(不過做香港國家隊教練好似都唔少錢),但佢係到浸咁耐,CV靚仔到可以俾佢返鄉下足總坐下神枱位。打份工有好路就走大家都明,唔好講到咁偉大囉,真係想「Die for Hong Kong」就尊重合約,教埋場北韓先走啦。

金蛇突然走人,聽聞唔少球圈人都開香檳,當中誰是誰是可能永遠都講唔清。但唔識,平時又冇睇嘅就講少句,唔好丟人現眼啦。

 

關於作者:湯姆李

曾經於男校五年,後轉到男女校。間歇性對社會熱心,反叛,愛挑戰一切。

則留言

閱讀後覺得好,請多多讚好及分享~:)

其他熱門文章

  • 琴日我第1次約PTGF,有感而發(利申23歲男) by losing her was blue
    話說前日放假,無聊係IG到禁下ptgf呢樣野睇下。我就咁睇,行個街,睇場戲,全部都收人幾百蚊個鐘。但我見到個tag有成4萬幾個post。係個刻,我就知道,原來真係有人會幫襯。係到我想講句,多謝哂你班仆街毒撚/9公係到成日頂爛市,做壞規矩,寵…
  • 雞之報應 by 霏子
    二零一四年嘅春天,阿海同阿琪仲讀緊Year_One,阿海仲未識到Miki,同阿琪仲係好friend。嗰一年,佢地見證咗一場悲劇,阿海稱為「雞之報應」。 …
  • TVB 是大到不能倒 by 阿享
    香港有咩企業唔可執笠?公營企業,港燈、中電,煤氣?四大發展商?港鐵?港交所?你依家要我答,通通唔係。TVB先係最香港大唔能夠執笠嘅企業。…
  • 【塔羅個案】你身邊有無日日覺得自己懷才不遇嘅人? by 神婆
    你唔知道自己鍾意、擅長做咩唔緊要,起碼你要話到比我知你討厭、抗拒做啲咩,咁我先可以用最少嘅問題引導到你去較清晰嘅方向;如果你咩都「唔知呀」咁,老老實實,你可能問好多問題都問不出個究竟。 …
  • 點一根煙,記梁天琦 by 程悅
    作為投過他和梁頌恆的新界東選民,我總想找回那夜曾支持他的六萬多人,大家現在是意氣消沉得不欲說話,還是早已恨透他的「懦弱」,變成在連登為他入獄而喝采的人?我寧願相信,大家只是對現實無語,像面對抑鬱病人,了解的盡頭反而吐不出半句安慰說話。…
歡迎讚好我們的facebook page,免費資訊源源送上。