【神婆雜談】我好鍾意銅鑼灣

小城小事 / 最新文章綜覽

 

今次篇文黎個好老套嘅開場白:我對銅鑼灣好有感情。

以前中學放學成班同學就由天后行落中央,溫完書就去皇室堡唱 K(Red Box 年代)然後買杯 Starbucks 行埋去 Times 頂樓影貼紙相。

大個之後開始返工,咁我好幸運地之前兩份工,一份返太古,一份返中環,最後而家返左銅鑼灣,每日行返舖頭,不知不覺行咗三年。

先唔講以前讀書嘅年代,淨係呢三年入面,銅鑼灣都變咗好多,由滿街金舖,去到而家連羅素街、白沙道都好多吉舖;之前金百利、東角都話有啲小店可以睇下,而家就好多都「租約期滿」「業主加租」咁越黎越少嘢睇。銅鑼灣地帶更加係好多吉舖,相比我讀書嘅年代,真係冷清好多。

當然啦,自從網購興起,無論邊個國家嘅貨品,上網撳兩撳就直接送到屋企門口,識玩或者搵到人夾份抵運費嘅,分分鐘仲平過出街買,所以零售係難做嘅,舖租又貴,無咁上下資金真係點敢亂開舖頭賣嘢呢?

轉型或者係生存方式黎嘅,好似燈籠街咁,對我呢啲經常喺港島活動嘅人黎講可能係好事:呢條街以前最旺嘅,一個係新記車仔麵,一個就係入夜後嘅永光中心——一棟出名比人劈酒嘅爛場(聽講爛啦,我唔飲酒無去過,留待大家認證),當年補習完行過,就會見到長長人龍等住上酒吧。而家燈籠街搖身一變成為中高檔食街,連惟一一間落地牢嘅機舖都變咗做譚仔,對面舊樓重建後又係變咗食肆商廈,日夜都熱鬧非常,我諗係近年變化無常嘅銅鑼灣裡面我最高興嘅一部分。

雖然我有時會好懷念舊時嘅銅鑼灣,嗰個無咁多人嘅銅鑼灣;不過,又或者咁講,我懷念嘅亦可能係當年嘅中學生歲月。而家可以繼續喺我熟悉嘅銅鑼灣經營自己嘅事業,好處⋯當然係方便我自己啦(笑)第二樣嘢係,銅鑼灣帶過好多快樂(同傷心 LOL)嘅回憶比我,而家,唔再係學生啦,以工作嘅方式,往後銅鑼灣呢個地方,又會帶比我點樣嘅回憶呢?

臨近年終,人係感性少少,多謝大家收睇呢一篇同塔羅完全無關係嘅雜談~

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。