【塔羅個案】婚宴上你聽過最搞鬼嘅歌係乜嘢?

 

輝哥喺我客路群裡面黎講,算係比較年長嘅一群,去年已經退休,而家買下股票過日神,生活寫意。2017 年末,輝哥黎搵我問下 2018 年嘅投資運,無意中講起佢個仔準備結婚。輝哥以前任職酒樓部長,見識過好多唔同嘅婚宴場合,我見開完牌有時間剩,就同佢老人家傾下計。

「阿妹,妳未結婚都應該去過飲啦?妳有無試過喺飲宴入面聽過啲好格格不入嘅歌?」

我搖搖頭,我去飲嘅次數唔多,黎黎去去唔係播鄭伊健《一生愛你一個》就係方大同版嘅《Nothing Gonna Change My Love For You》,好正路,未遇過奇怪嘅歌。又或者咁講,擺酒播嘅歌可以有幾奇怪呢?

「十幾年前我仲做緊一間唔算好大規模嘅酒樓,有少少街坊嗰種。」輝哥未講完已經有笑意,「當時有對新人,好似好鐘意張國榮同梅艷芳,我原本知道呢度都無乜嘢,以為頂多可能播下哥哥首《為你鍾情》。講完一大輪嘢,我地上乳豬啦,對新人喺個台度鍚鍚緊啦,咁我啲同事咪幫佢地播碟入面佢地要嘅歌,點知一響起,嚇到我手都震埋,以為同事做錯嘢!痴線架,對新人揀嘅歌,係梅艷芳首《胭脂扣》呀!」

「唔係呀?」我聽到呢度,笑到成個下巴差啲跌落地,「佢地知唔知首歌講乜架?結婚播啲咁嘅嘢?!」

「對新人就係知!原因係因為佢地好鍾意套戲,首歌我地聽落唔老黎,但佢地聽住就覺得十二少同如花嘅愛情好淒美喎!佢地就開心啦,首歌一響呀,全場靜到呢!難為老爺奶奶外父外母坐喺主家席,塊面黑過芝麻糊呀!」

我笑到癲咗,成件事好有畫面,即係咁,就算我再鍾意《新世紀福音戰士》,我都唔會擺酒時播《残酷な天使のテーゼ》架?(雖然敬酒時播呢首應該幾 High LOL)唔係話老唔老黎,而係件事會好 Odd。我完全想像到我屋企人死魚眼咁嘅表情望住我。

輝哥自己笑完之後繼續講,「咁我咪話當時上緊乳豬嘅,因為當年仲係興乳豬眼放紅色燈泡仔嘅,首歌播到『情像火灼般熱~怎燒一生一世』嘅時候,大吉利是,主人家隻乳豬有一邊眼嘅燈泡,唔知唔夠電定點,無啦啦眨左兩下就熄咗!當時我剛剛幫佢地換緊茶,聽到兩位老人家倒抽一口氣嗰下,我忍笑忍得好辛苦呀!」

我比較幸運,我唔駛忍笑,輝哥講嘅故事太有畫面,我真係毫不客氣地笑咗出黎。當然我地無人知對新人而家近況係點,不過希望你地幸福愉快,新年快樂啦(笑)

 

【塔羅牌個案分享】

「我想分手,佢話唔好,不如去開房;然後我覺得佢仲愛我」

個客認為喺放工時間嘅金鐘地鐵車廂入面睇英文書會增加異性緣

你話想生仔我咪唔避孕囉,我家下有咗你就叫我落?

有個客為咗受男人歡迎,走去養狐仙

著名大學 Year 1 學生問「我點先可以做到 Hall Queen」

【塔羅個案】名校老師婚外情的故事

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。