【塔羅個案】集氣,祝福・妳一定會好返的!

文教 / 最新文章綜覽

 

1月2號開市以黎,就聽到幾個頗令我震撼嘅個案。其實人生面對嘅問題,除咗情情愛愛搵錢食飯,真係仲有好多嘢係會構成煩惱的,例如係家庭倫理、關係修補、自我否定……雖然我都唔知呢啲算係塔羅個案定係心理輔導,不過呢幾日真係過得好充實。

點解成日寫情愛嘅個案,一來係 Juicy 嘢多人鍾意睇,二來係太 Specific 嘅 Case 寫成文章的話,感覺又怕會變得太沉重了。

就好似呢兩日遇到其中一個客,眼仔大大細細粒,長髮披肩幾靚女,不過好瘦。佢非常健談,講夢想、講工作,估唔到佢人仔細細,卻非常捱得,試過一日打兩份工,照顧自己、照顧埋屋企;有個對佢幾好嘅男朋友,倆口子你串下我、我笑下你,不知不覺已共渡了一段歲月。

然後,佢發現自己有 Cancer。

佢已經開過刀,而搵我之後嘅第二日,佢就會開始接受化療了。佢一路講,一路笑;一路輕描淡寫,一路形容自己父母非常大驚小怪,非常地不冷靜,「我都無佢地咁好氣。」

佢繼續講自己發現有病嘅過程,耐唔耐搞個 Gag,講兩講就自己笑,我唔出聲,我繼續聽佢講,一路微笑點頭。

其實入舖頭咁耐,佢一直無望過我雙眼,直至佢講出一句,「我一直以為呢件事係假,我以為好快會過,但係,原來唔係,原來真係好大鑊,真係……」

佢第一次望住我,而佢雙眼馬上紅了。

「我好驚。」

老老實實,我都好驚,因為我知佢想問乜嘢,佢想問自己嘅治療到底順唔順利,想知道自己仲有無能力去搵自己嘅夢想、去開展自己嘅事業。佢有好多嘢想做。

而我,唔知好彩定唔好彩,我有長期面對癌症病人的經驗,到底有幾茫然,有幾徬徨,我唔可以話我完全明白,但係我一定理解。

不過,我好緊張,我開牌咁多年黎,應該最緊張都係呢一次。到底佢嘅病會唔會做完化療就根治呢?我努力保持表情輕鬆,努力控制唔好手震,默默咁睇住佢揀牌,默默咁諗定,Touch wood 結果唔好嘅話,可以點樣講、點樣表達呢?可以點樣都 Ensure 到佢一定會去做化療呢?

結果,開出黎,兩隻正牌 Judgement 同埋 Strength。 我鬆咗一口氣,簡直同我會考當年拎住成績表見到 Maths 無肥佬一樣,我衷心咁同佢講咗一句:

「妳信我。放心接受治療。妳仲有好長嘅路可以行。」

佢呆咗一秒,嘴角顫抖,但依然保持輕鬆嘅口吻,「咁,咁我好返之後要諗下轉唔轉工好啦,聽日帶部 Switch 入醫院先。」佢眼角有少少濕潤,「我信妳架啦。」

「妳信我吧。」我好堅定咁同講,不過都不忘輕鬆回應,「記得帶夠尿袋或者入套劇落 Ipad 入去煲呀,好悶架。」

佢笑,今次唔係佢刻意嘅笑,而係一種見到未來嘅笑。

「我好返之後,返黎再開牌問工作吧。」

我點點頭,心裡為佢送上最大的祝福。

 

【塔羅牌個案分享】

「我想分手,佢話唔好,不如去開房;然後我覺得佢仲愛我」

個客認為喺放工時間嘅金鐘地鐵車廂入面睇英文書會增加異性緣

你話想生仔我咪唔避孕囉,我家下有咗你就叫我落?

有個客為咗受男人歡迎,走去養狐仙

著名大學 Year 1 學生問「我點先可以做到 Hall Queen」

名校老師婚外情的故事

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。