【塔羅個案】你身邊有無日日覺得自己懷才不遇嘅人?

文教 / 最新文章綜覽

 

「驚自己入錯行」「唔知自己做乜嘢工作先適合」等等,係客人黎問事業時,最常問到嘅問題。呢種問題其實唔難開,大前題係客人自己要有想法:你想對客定唔對客?就算做 Sales 都有分地產保險或者貨品零售;打 Office 工亦有分「非常上進嘅工作」以及「非常穩定嘅工作」之分。

你唔知道自己鍾意、擅長做咩唔緊要,起碼你要話到比我知你討厭、抗拒做啲咩,咁我先可以用最少嘅問題引導到你去較清晰嘅方向;如果你咩都「唔知呀」咁,老老實實,你可能問好多問題都問不出個究竟。

不過,如果你問我邊種問前途嘅客最難湊,絕對係以下呢一種。

Sassa 大學畢業咗兩年,由於佢讀嘅唔係啲咩專科,純粹叫有個學位嗰種,所以佢話「我呢兩年黎份份工都做唔長。」

我聽完有少少黑人問號,咁都叫有個大學學位吖,同「份份工都做唔長」有咩直接關係?關咩事?

「妳唔明架啦。」Sassa 今年其實都廿幾歲,唔知係咪貧血定係血糖低啦吓,佢由行入黎我舖頭嗰下開始就係咁啜住枝珍寶珠,有幾下瞄到佢啲口水喺口角差啲流出黎,我嘅心情就好似睇住隻貓爬出窗台咁樣戰戰兢兢,一邊心諗喂阿姐你咪整污糟我副牌呀⋯⋯

「文員,日日做一樣嘅嘢,學識用公司個系統,就好悶咁淨係 Data Input. No fun at all.」Sassa 語氣中帶啲不屑,「保險公司係咁,銀行又係咁,數字人生,我搵唔到做嘢嘅意義囉 Okay?」

我不置可否,好想當面講一句「其實打工嘅意義就係搵錢、搵工嘅重點係搵返自己做得比較 gur 嘅。」不過,Sassa 完全無停落黎聽我講嘢嘅意思,佢繼續侃侃而談,分享佢對職場嘅見解。

「PR 我都做過,做咗個零月,真係不了,成個部門都係女人,去到邊都聽到啲 Gossips,阿姐又唔係好有料,淨係識指人做嘢,佢呀,自己唔會落手架,係叫我地班細嘅去做架咋!」

聽到呢度,我已經有少少想反白眼;叫得做阿姐,唔通仲會落場同你一齊做苦力?唔通會喺前線一齊同妳聽 Hotline Enquires?唔通會去做 Filing?仲有,人地有無料我唔知,但你先做得一個月多啲,你肯定你有資格話你有料過你阿姐?

「我覺得我人生好 lost,到處都搵唔到一個地方可以 enhance 到我嘅 potentials(原諒我,佢真係咁樣中英夾雜講嘢的),我覺得我嘅能力根本無人賞識到,日日勞勞役役咁為乜?」

我聽到呢度,個心同時出現咗兩個念頭。一,我唔知做乜,諗起 Chef Nic 首「潛龍勿用」(九唔搭八對唔住);第二,我想鼓掌,因為可以自視咁高、同時漠視個社會到底係點樣運作嘅人真係唔多,而 Sassa 把口話就話「啲工唔啱我」,但事實上有幾份工根本係係佢做唔黎焗住辭職。

咁到底佢憑乜嘢覺得自己叻過其他人呢?佢覺得自己嘅潛力係咩呢?佢自覺懷才不遇嘅理據,到底係乜嘢?哪來的自信?

「我想做啲勁嘢,大茶飯,大生意,而唔係月入萬幾蚊嘅打工仔。」

Sassa 喺開完牌之後好不滿,因為佢想創業(雖然佢連搞咩生意都無頭緒),但係父母唔會支持、搵唔到朋友夾、同埋佢仲有個問題好正架,佢話想將自己嘅想法寫上 Facebook,會唔會吸引到投資者欣賞佢,從而打本比佢做生意。

即係咁,出黎做嘢,有時的確係識人好過識字;但係喺未識到人嘅時候,你不如問下自己到底有啲乜嘢特質,係值得人地去欣賞你架啦。如果無,發少陣夢,老老實實返去打工,從而搵出自己嘅方向,都好過黎同我講「我唔想打工,但我有才能,點解無人欣賞我,我叻過好多人囉」咁樣。

塔羅牌唔會助長你發春秋大夢,只會嘗試比啲解決或改善方法你。Sassa 去到走嗰一刻都似乎未明白自己嘅問題係乜嘢,而佢目前已經失業咗個半月了。

惟有祝佢好運啦。

 

【塔羅牌個案分享】(事業篇)

個客問創業,我話佢未 Ready 佢唔聽,而家蝕到入肉叫我救佢

佢話兩個月過去都未搵到工,要求我道歉

問牌最緊要聽話:個客成功創業仲越做越大!

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

則留言

閱讀後覺得好,請多多讚好及分享~:)

其他熱門文章

  • 人失敗到盡頭總要學會打飛機 by 田小姐
    我呢位朋友,大學畢業五年,一個月前搵到一份寫字樓工,月入唔夠一萬。早幾日成班朋友約出黎食飯,呢位朋友就話佢想辭職唔做,自己搞生意。我心諗,搞生意?你連自己嘅生活都未搞得掂喎!於是我就問佢:「你份工好哋哋做咩唔做呀?」佢「唉」左一聲,話:「我…
  • 愛男友,請愛埋佢屋企人 by 小盛女
    「有無人要食麵啊?幫你地夾。」Mike大喊。「使乜幫佢地夾,佢地無手o架?」Brenda黑面說。Mike即時怔了一怔,他從沒想過這麼簡單的舉動會令Brenda爆seed。「都係順便姐,大家一家人,我幫你夾埋喇。」Mike盡量壓抑自己的情緒,…
  • 應如何對待男友嘅朋友? by 小盛女
    晚飯後她又教大家玩大學時O-Camp的集體遊戲,很快便和Mike的朋友們混熟,特別是男性朋友。玩遊戲少不免有些身體接觸,Mike都一一看在眼裡,他最怕就是看到這些疑似抽水的行為,出聲唔係唔出聲又唔係,自己女友又鬼死咁主動,同人玩得鬼死咁盡興…
  • 「我想結婚之後先搞,有錯咩?」 by 樂人
    點會有錯呢,我覺得堅持係好事,o岩架,千其唔好俾佢得手添呀,唔係好快趙完鬆!VV,你要醒水!呢啲咁嘅臭男人,我仲見得少咩!…
  • 【年輕新貴】識打工一定係做半更保安 by 鵝鑾鼻燈塔
    看更呢樣野,做得真係好足,而且唔需要太多體能訓練,單係實踐呢方面抱負,門檻又低,已經贏左。…
歡迎讚好我們的facebook page,免費資訊源源送上。