【塔羅個案】你如果有病,你會信醫生講嘅定係信師奶 Kingdom 啲留言?

文教 / 最新文章綜覽

 

唔知大家有無遇過一啲黎問你嘢,問完又唔信,甚至質疑你,然後同你講「但係我個朋友/阿邊個邊個/上網見到(下略五百種消息來源)唔係咁講架喎!」

呢個時候,你會有咩反應?

Jessie,二十出頭後生女,黎到我舖頭唔夠兩分鐘,見佢拎住枝水,扭極都扭唔開個蓋,仲要一路用力一路發出「咿---」咁嘅助聲詞。佢眨眨眼,望住我,「對唔住呀,你可唔可以幫我開?我一向比較弱小。」

我無出聲,幫佢一嘢扭開枝 Bonaqua,一路望住佢圓碌碌嘅身驅,應該大我一個碼,然後,弱小?聽完佢咁講,嘩我人生第一次覺得自己好大力,me so strong。

弱小嘅 Jessie 黎問感情問題。佢同男朋友拍咗兩個月拖,「我第一次拍拖,好多嘢都唔識,好驚呀,成日上網見到啲人話男朋友唔覆短訊、唔覆電話、唔報到之類係出軌變心嘅跡象,我男朋友真係唔係好覆我架咋!」Jessie 講到呢度扁嘴仔,「同埋…同埋我唔知佢想我地將來點,佢又無提結婚嗰啲……」

即係咁,聽到 Jessie 講咩「唔覆短訊、唔覆電話、唔報到就係男朋友出軌」呢句 Statement 嘅時候我已經倒抽一口涼氣;我問多兩句之下,其實佢男朋友唔係唔覆佢,只係 Jessie 真係 Whatsapp 得男朋友好密,Er,或者咁講,係好 L 密,由朝早起身到出門口呢半個鐘,Jessie 係可以 Send 成五十幾個 Whatsapp 比男朋友的。男朋友有時睇完唔覆,佢就不安啦,佢就覺得自己不被重視啦。

咁我開牌就同佢講,「你男朋友無異心噃,雖然覺得你有時會比到少少壓力佢,但 Overall 段關係 OK 架噃。」

「吓?真係無第二個?即係好愛我?」Jessie 一臉懷疑,「但係我之前開過塔羅牌話佢對我唔好架。」

我已經唔想同 Jessie 解釋「無第二個」同埋「好愛你」之間,其實仲有好多層唔同嘅情感變化;不過是但,我循例問多句「即係你最近都搵過其他師父幫你開牌?」

「唔係師父,但佢係我 Best Friend,佢一直都好迷信,所以佢都有學塔羅,佢住我隔離,我晚晚都會搵佢開牌架。佢唔係咁講囉,你係咪睇錯呀?你唔準喎咁樣。」

各位朋友,我做塔羅,但係我未至於好迷信的,呢兩樣嘢我唔認同中間要劃上等號;講返 Jessis 個 BFF,我當然唔會話人地準定唔準,不過,對方只係買咗本塔羅書返黎,然後每個問題開牌都要查書,圈啲佢認為 make sense 嘅 Key word,再加好多「我覺得佢唔重視你」「我認為佢唔係好仔」等等嘅個人評語黎幫 Jessie 解牌,而 Jessie 因為個 BFF 句句講中佢想聽嘅嘢,所以覺得佢個朋友講嘅先啱,我呢啲講事實嘅就係「唔準」……

喂阿姐,咁我駁唔到架喎。你咁樣同啲家長,個小朋友明明有病,死都唔去睇醫生,寧願上網睇師奶 Kingdom,問下各界姐妹「有咩睇法」「我個小朋友咩事」咁樣黃綠斷症又有咩分別呀?

結果 Jessie 始終都係唔信我副牌,認定佢男朋友係刻意冷落佢,認定自己比人玩弄,認定自己好慘。

我……循例講句,祝你幸福~

 

【塔羅牌個案分享】

「我想分手,佢話唔好,不如去開房;然後我覺得佢仲愛我」

你話想生仔我咪唔避孕囉,我家下有咗你就叫我落?

著名大學 Year 1 學生問「我點先可以做到 Hall Queen」

名校老師婚外情的故事

集氣,祝福・妳一定會好返的!

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。