唔放心女朋友落酒吧,係啱嘅。

 

好多男人都唔放心自己女朋友出去飲嘢,我可以講嘅係你地冇做錯到。

有啲酒吧好啱幾個朋友坐低傾計係真嘅,好多女仔都係用依個理由去說服自己男朋友放行;但有啲任飲場,劈場真係可以比蘭桂坊更淫亂,特別係搞生日Party依啲咁多人,個個Friend搭Friend而嚟嘅地方。而好多口講出去同朋友飲兩杯嘅女仔最後都會嚟咗依啲Party,最後就喺男朋友乜都唔知嘅情況下派出一頂又一頂嘅帽。

噚晚係我一個朋友生日,之前佢已經話會喺某間樓上酒吧慶祝,咁我冇理由唔比面出席嘅,十點幾左右我就上到去。望一望個格局,廿幾三十個人,一列過霸三張檯,隱約聞到大家之間都唔係好熟——不過我本身都唔好得幾多,因為除咗壽星本身,成個場我有印像嘅只係得三個人,一個見過幾次(然後我噚晚先記得佢個名),另外兩個都只係有一面之緣。我真係唔明點解生日Party要搵幾廿個圈子嘅人出嚟聚,不過總有人會開心嘅,話哂真係識女仔嘅好機會。

同壽星乾完杯,我搵咗個空位坐低,同識識地嗰個傾咗幾句,點支煙食咁。我對面係一對情侶,條仔就醒呢,識陪埋女朋友出嚟玩,成晚都冇仔埋過佢女朋友身,當然我唔排除就算條仔唔喺度個女仔都可能會潔身自愛啦。我支煙都未食完就比隔嚟個女仔撩玩骰盎,玩玩下又Join多幾個人轉玩啤牌,大家飲多幾杯就愈玩愈癲,愈講愈大聲,唔經唔覺我隔嚟個女仔已經痴咗埋嚟。玩到半路壽星話要出去影相,大家都陸續起身準備行過去,依個時候個女嘅突然拖住我,一開始我已為佢飲多咗唔得啦,吖原來仲好清醒。咁都冇乜嘢嘅,艷福依啲嘢冇人嫌少係咪先?點知就喺依個時候,比我望到佢電話個Wallpaper係同一個男人嘅合照,從佢地嘅親暱行為睇嚟,個男嘅一定係佢男朋友。

當我心裡面粗口都未講得切,佢已經用好凍為理由從後攬住我。到底佢用點同佢男朋友講今晚出嚟飲嘢?到底佢利用咗男朋友嘅信任幾多次?我估唔到。依個時候壽星搵全女班陪佢影相,攬住我嘅佢行開咗,而我都入咗去食煙避席。影哂相之後玩樂繼續,個女嘅依舊坐我隔嚟,但同時又同另一個男嘅玩到好埋。一時拖住個男嘅,一時又瞓落我度,原來艷福不淺嘅人係佢。去到點幾左右,佢拎咗部電話出嚟覆,我望到佢覆緊嘅人最後一條訊息係「BB,我瞓啦,你自己都要小心啲」。

兄台,要小心嘅係你。

玩多一陣,我發現見過幾次個女仔起身準備走,而我都抽起比人攬實咗嘅手臂,話同佢一齊走。

「你咁快走啦?」艷福不淺條女問。
「係啊,聽日返工。」

我冇再理佢講咩,懶係有風度咁幫見過幾次個女仔拎個紙袋然後閃人。

兄台,我幫到你就係咁多,執生啦你。

 

 

關於作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。