點解我喺公司會上唔到位?

 

 

有時都會有朋友問我,點解係公司會上唔到位。但係我真係想坦白咁講俾大家知,呢個問題同:點解我無男女朋友一樣,根本係無辦法知道正確答案係邊。

而職場既情況可能更加複雜,因為牽涉既人更多,你作為公司既一粒棋子,往往都唔係一個老細既決定,而係好多老細一齊決定,甚至係大家係背後互相角力既結果。係公司做得好唔好,雖然有啲職業會有啲可以量化或者透明度高到可以人人都睇得到既指標(例如職業運動員咁打到世界級就係世界級,唔會話單憑關係一樣野就可以長做長有)。但係辦公室就唔會係咁,同埋有好多野就算可以量化,你細老細都可以遮住,又或者用番啲主觀野黎assess 你,輕易將你擊沉。

你可以話唔係電腦世界主宰既一日,呢啲野都係死症黎,講既不外乎都係際遇同埋命數。Team 入面有條友係交際手腕強勁既,隨時吹得一兩嘴樹上隻雀可以俾佢吹到落到黎,但可能佢老細咁岩係實幹型,唔鍾意啲好似得個講字既人。要記住我既字眼,係『好似』,換句話說,果個人可能係既talk 得,又做得既。但就係因為老細眼中覺得佢唔夠實務,甚至覺得佢輕浮,於是就樣樣野梗係都唔會睇得好順眼架啦。

咁換轉另一條team 有個直頭係博士學位,成績同履歷都係勁到爆晒炸既,但偏偏佢老細只係鍾意成日飲飲食食傾生意交際應酬,實務野咪搵我,佢最鍾意既就係不斷present 同present 係度做最佳推銷員。咁果位實幹既人咪又係永世不得超生囉。你或者會問,車,咁如果兩個可以咁岩調番轉,咪會好好囉。但呢個世界,往往都唔係咁樣操作。

有時口碑一開始做差左,就之後再幾好都係乘零點五。而人言可畏既野就係,一兩位老細講過一兩句負評,其他人就算唔係話完全信晒,但都會有戒心,會唔願意犯險,大project 一定唔會過俾佢地,咁邊有機會表現自己,邊有機會搶分,甚至上位拎bonus?你話嘩咁都好兒嬉啫。咁呢個世界就係咁架啦。你睇Donald Trump 退出TPP,好深思熟慮咩?道指波幅一二千點一兩晚,背後又有好多艱深理論咩?Bitcoin 上到兩萬再跌到六七千,人類社會就係不嬲都係咁兒嬉。

講好聽啲就係際遇,其實好多人上位都除左實力好多都係靠運。有能力既人比比皆是,但係辦公室政治明爭暗鬥,好多識避又好,唔識避或者避無可避都好,亡魂亦都不計其數。唯有都係睇開啲真係當打份工算。工在人在,工亡人亡,做生意就有。如果唔係,你有貓咁九十九條命都唔夠死。如果唔係爭果一萬幾千開飯,倒不如睇開啲算。以上只係點點感想。完。

 

關於作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。