敵人往往會偽裝成你的同伴

 

在近期追看的日劇《小巨人》入面,呢一句說話「敵人往往會偽裝成你的同伴」好深刻,一語中的道出職場既黑暗。劇中講到身為衝鋒陷陣既警察但竟然社會係無律法去保護佢地,其實放諸所有打工仔既職業都一樣,有邊個會實牙實齒去保護你?好快你會發現只有自己係可以絕對信任。

而純品既小熊,非自誇,更多人解讀「純品」為愚蠢和後知後覺。我唔否認,因為係職場上唔夠謹慎眼利,自己係要承受沉痛既教訓。係公營機構生活,敵人會唔會比私人公司多呢?似乎係工作上既鬥爭程度係無咁緊要,人工福利晉升條件都好公開,唔會有因為大家同職級但人地人工高你一倍,大假無端多你十日既情況出現。反而係人事上既是非多到不得了,「識做」去討好上司和同事,花時間去認識各部門有利用價值既同事,係好基本既戰略。

係小熊既部門,有幾位賺錢買花帶既廿十尾三十頭女同事,就好出色地每日重覆做示範。猶記得我第一日返工,就已經好雀躍地話要請我食飯,係完全無理由拒絕之下當然受邀出席。一餐飯入面,問左好幾次係interview時對考官既印象,當時既考官就係我而家既直屬經理,我都算係出於真心講返佢問得好仔細,了解我以前工作過既人事部門係點。不過人地想聽入早既唔係呢啲,再推進一下問題「佢會唔會好長氣,你覺得佢個人點啊?好唔好?」,難道我第一日返工就講上司壞話嗎?見我無咩反應,就開始諗計引導我講。呢餐飯後,多多少少了解到佢地係一個主力天文台,唔會走漏眼去收集情報,點都唔可以俾任何新人有機會成為經理們既新寵兒,威脅到佢地地位。

由於我跟著個麻煩上司,入職左幾個月已經好困擾,呢班小花又點會放過可以進擊既機會呢?好多時我地既合作係源於要宣傳或者係機構活動上做工作人員,總會有多餘既時間可以閒談,當然係我旁邊一齊數算我上司,七情上面去同情我,鼓勵我有咩勞騷不妨講出黎。見到咁既誠意,歷練不足既自己唔多唔少會被打動,不過係人地用左幾個月時間儲夠要知道既事後,唔知點解就會極速通晒天,傳晒入相關人士既耳入面。

呢啲是與非即使有人搵你對質,只要你堅持係人地扭曲左你既說法,尚有轉彎餘地,再高招去打擊你既係用方法直接干擾你既仕途。

係公營機構入面,同事可以任意申請覺得合適既職位,而我都唔例外,好想擺脫黑心上司。湊巧隔離team有同事升職去其他部門騰出左一個空缺,而呢條team既team head出左名係好好先生,對下屬全部都好包容,只要你做好份內事,日日準時收工唔會有意見,評核個分一定有咁鬆手得咁鬆手!對我黎講好吸引,心思思想申請,蠢就蠢在走去問小花意見。「呢啲位係有經理blessing先好去申請啊!同埋呢,聽講雖然本身個位係跟番原本呢個既,但係收到風之後會降grade架,如果你走去做個降grade位,都好唔抵啦!」聽完立刻對念頭止步,原來要有高層開聲先好去申請,否則只係晒時間,仲會俾上司思疑點解有去意,可能俾佢進一步玩弄。

不出兩個月,真相大白了,有日食lunch同專職請HR既前輩傾開計,佢問我點解咁頂唔順自己上司都唔申請呢個空缺,我一五一十將小花講既說話講返出黎。佢好驚訝,話從來無傾過要將個位降grade,而且小花們係經理面前好落力介紹自己啲朋友好有心想黎做,所以,結果,就係請左佢地朋友囉!

朋友?同伴?唔好諗得太簡單,每做一個重要既決定之前都唔應該只聽一面之詞,最後結果係點自己都有責任。

 

 

關於作者:HR熊

HR熊
人事部工作既小妹,見盡唔少公司既「人」同「事」,係呢個平台上一齊分享職場上既苦與樂,笑與淚。Facebook: https://www.facebook.com/hrbear.dairy

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。