互相尊重

 

同大家講兩個故事。

  1. 有茹素嘅養貓人士知道貓嘅素食已經能夠提供捉夠嘅營養而無需食肉,於是佢餵貓食素。一個月後,隻貓死咗。
  2. 有條友因為落暴雨而叫咗架的士。的士好遲先到所以鬧咗個司機一鑊,司機就嬲到好似雲迪索上身咁開快車。結果炒車,兩者皆傷重不治。

以上故事純屬虛構,如有雷同實屬不幸。不過,喺現今呢個唔講尊重嘅社會,其實呢啲同死有關嘅事都隨時隨地發生,分別只係害死人定害死自己,抑或係攬炒咁解。

大埔公路巴士翻側事件,死傷者眾。好多人都話司機抵唔住頸就出咗事,但係又有無諗過佢點解抵唔住頸?講真,乘客坐得上任何交通工具都係將生命交託俾司機,佢揸得唔順就自己條命都隨時凍過水。偏偏就會有人嫌命長,為咗時間長短同個司機嘈,咁同對面岸個死神講「勾我魂呀笨」有咩分別?

呢啲戲碼日日都有,爭在死唔死人啫。上唔到火車地鐵就屌鳩職員、飛機延誤就插爆地勤、買嘢無折就要脅唔再幫襯⋯⋯基本上「只有我負天下人,莫要天下人負我」嘅姿態想任何人事物都迎合自己。

甚至,連養隻寵物都要隻寵物附和自己。「我唔鍾意食肉,我都希望旺財可以唔食肉,培養靈性。」培養靈性?我覺得隻貓培養到食講人話,第一句應該係「我食得好無尊嚴呀」。諗起朋友講未完全消化嘅糞便都有營養,兔仔都會食返,點解人類做唔到?

寫呢篇嘢,某程度上係為咗提高讀者嘅同理心。希望喺將自己嘅價值觀套用落人哋身上前,諗下自己會唔會收唔到科先。萬一興起喺屋企養獅子老虎嗰陣都唔會因為佢哋覺得食得無尊嚴而食咗你哋嘛。

 

關於作者:純儚

就單純一個80後肥宅,無咩簡介可言...

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。