【塔羅個案】個客自我介紹:「我覺得我係一個情場殺手」

文教 / 最新文章綜覽

 

臨近情人節就特別多客人黎問吓姻緣感情問題,咁唔係下下都悲情慘豬嘅,有時我都會遇上啲非常搞鬼嘅客人。

Lilian 今年三十幾歲啦,佢都好直接咁同我承認「自己都唔細,唔係𡃁妹仔」,想知道自己黎緊一年到底會唔會遇到好姻緣,再順手問埋工作情況咁樣。

我一路洗牌,一路循例問下 Lilian 嘅背景。
「妳做邊行架?」

「我本身做 PR 嘅,不過⋯⋯」Lilian 有少少感慨,擺出一副準備仰天長嘆嘅模樣,「我有時更加覺得,我喺感情路上嘅身分,係一個情場殺手。」

我打咗個突,乜⋯嘢話?情場殺手?Are you serious?我個腦喺兩秒之間閃過好多念頭,仲無啦啦響起埋「女~殺~手~」嘅古早味歌聲。

到底 Lilian 何出此言呢?

「You know,感情嘅嘢無得強求,其實我唔係無人鍾意,我異性緣唔差,even Lesbian 都試過 approach 我,但係好遺憾地,佢地無一個人令到我想留低,愛我嘅人,只會受傷同失望,而每次令到佢地 upset,我就會覺得,我又 hurt 咗一個真心,I feel so sorry for them.」

雖然聽到呢度,我好想窒佢一句「喂阿姐,如果個個同妳拍拖都失望或者唔開心咁走,其實有無諗過係妳自己有問題?」但係,因為 Lilian 認為唔係自己有問題,只係自己遇唔啱 Mr. Right,所以自己先唔想花精力去愛,咁話喎。

咁我問 Lilian 喺感情上到底要咩先?妳講到為愛情咁祟高喇,咁係咪只求真愛求良緣唔睇家景成就先?

「咁我覺得人工要多過我 which is a must 囉!」Lilian 開始侃侃而談,分享佢縱橫情場咁多年嘅見解,咁當然都不乎要有樣有家底有正職要高大要年紀大過佢少少要⋯下略五百字左右嘅條件咁樣,「先可以令我覺得 I feel safe 同埋想同佢交往架嘛。」

咁我都好直接串咗 Lilian 一句,小姐,妳話自己唔細啦,但又列咁多條件;話自己唔心急,但又強調自己好需要婚姻,幾時有新對象,即係點先?

Lilian 靜咗,或者我講嘢直接 Hurt 到佢卦?不過我就唔得閒去安撫佢啦,幾十歲人,口不對心,自相矛盾,明明就因為揀擇同埋自戀所以令到一個又一個男朋友離開佢,都仲可以將件事咁理直氣壯咁解釋成自己係「情場殺手」?殺咩手呀?我對所有客人一視同仁、普愛眾生,咁我唔通話自己係「塔羅瑪利亞」呀?做咩啫而家,開高登網名咩!

無呀,聲稱自己人緣嘅 Lilian 結果今年感情上就無咩意外之喜架啦,我叫佢專心工作,佢有少少無奈,但係都好乖咁尊重牌嘅結果,呢一點要讚。

「咁睇黎今年我都係做職場女強人罷啦!」

我目送住 Lilian 離開嘅背影,個心嘅諗法只有一個:點解呢位女子咁鍾意幫自己起 Title⋯⋯⋯?

 

【塔羅牌個案分享】

後生女教友畀已婚傳教士搞大個肚唔認數

「我想分手,佢話唔好,不如去開房;然後我覺得佢仲愛我」

你話想生仔我咪唔避孕囉,我家下有咗你就叫我落?

著名大學 Year 1 學生問「我點先可以做到 Hall Queen」

名校老師婚外情的故事

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。