【塔羅個案】四年入面,我睇住個客拍拖、結婚再離婚。

文教 / 最新文章綜覽

 

 

我有部份客人,係由我未開舖嘅年代就已經開始搵我的,最耐嗰位應該都跟咗我超過八年,睇住佢由初中妹妹問人際關係,到而家大學準備畢業黎問我事業前途,有時都不禁講一句光陰似火箭。

不過今次就唔係講呢位妹豬嘅事,而係講我另一位客人 Alison 嘅故事。

Alison 四年前開始搵我,當時佢讀緊書,入大學前,佢對於「大學生」嘅生活充滿期待,覺得自己單身將近廿年,黎到大學,應該出到 Pool 啦啩?咁當時佢都幾 Open Minded,上莊、搞學會、聯校活動,只要令自己增加曝光率嘅,佢做得到嘅都願意去試。呢一點我欣賞架,因為起碼佢明白守株待兔係無用的,願意主動出擊,比好多匿喺屋企咩都唔做然後怨自己無拖拍嘅人,黎得進取好多。

咁當時佢身邊有兩個可發展對象,A 君就穩重內向,但係可以同 Alison 共同進退,係一個非常理想嘅後生仔;B 君呢,就會好開心囉,好多新玩意新搞作囉,但係蜜月期過後,兩個人就唔會好夾囉。

聽完我嘅建議之後,Alison 結果,係揀咗 B 君。佢話,A 君可以遲啲先諗,人一世物一世,自己未拍過拖,點都想刺激咗先。

人係貪玩嘅,呢一點我都明白,不過,我亦都預見接下來嘅日子,Alison 應該都會 Keep 住黎問感情方面嘅問題架喇。

係架,Alison 同 B 君 嘅蜜月期只係兩個星期左右,佢地好快就開始嗌交,主要原因係 B 君本身人緣極好,身邊女性朋友如輪轉;而 Alison 自己本身就唔係一個爆有自信心嘅女仔,加上第一次拍拖、佢對男女關係嘅認知,都係黎自網上啲……Er……Articles?即係好似「留住男友的十個方法」「讓他不能沒有你!迷人女友的小心機」呢種嘅文章咁啦。

好老實,B 君擺明就未玩夠嘅,而 Alison 亦未至於成熟到可以 Handle 到呢種若似還無嘅感情關係。然後,呢一年間,佢地離離合合嘅次數,我諗都有六七次,咁 B 君其實唔係唔鍾意 Alison,只不過真係覺得 Alison 真係好 Chur,年少氣盛,唔激得唔鬧得。

至於 Alison,喺佢地第四次分手嘅時候,佢有諗過「不如搵返 A 君啦?」咁,不過 A 君又點會默默守候佢呢,人地晨早都有新著落,同個師妹打得火熱,仲諗住一齊去 Working Holiday 添。

有一日 Alison 再黎搵我時,佢已經準備畢業了。我原本想同佢講句「女,算啦,由佢啦,分手啦,今次當係學習啦,咁辛苦做乜?」

Alison 笑笑口,「唔係呀,今次唔係黎問分手呀,我要結婚啦。」

結婚?Sorry,好衰,聽到呢句說話,我個心寒咗一截。根據一直以黎幫佢同 B 君開嘅牌,佢地都係死撐死忍咁樣延續關係,絕對唔係理想嘅婚姻人選;而且,黎緊先大學畢業咋噃,結婚?係咪快咗少少?做乜嘢事?B 君又會肯嘅?嗰個未玩夠又唔定性嘅 B 君喎?喂阿姐,係唔係屋企有咩事,要結婚沖喜呀?你唔好同我講妳有咗饀呀,我喊架……

「我有咗 BB 呀,佢媽咪話,咁你地結婚啦。」

聽到呢一句說話,我個腦,出現咗宇宙大爆炸,出現咗好多唔同客人嘅面孔,出現咗好多唔同嘅故事;而呢啲「未婚生仔+超後生就結婚」嘅客人,黎親搵我,當然都唔會有咩好結果。

「妳認真?」我有少少緊張,「Alison,妳真係有信心?真係想嫁比佢?」
「我特登架。」Alison 嘅回應,令我想成個肝嘔出黎,「我想佢定落黎,唔好再咁吊兒郎當吖嘛……」

我個腦停止爆炸,變成一片空白。

特登。

之後,Alison 真係結咗婚,不過就無大搞,只係簽咗紙,就準備生仔咁啦;佢地當然亦無能力置業,女方住埋入去奶奶屋企,相處上係 OK 嘅,但係 Alison 明顯就唔係好開心。

原因無他,亦很老套:自己在家安胎,而 B 君開始就業,一來多同事應酬,二來夜晚成日拎住電話默默打 Whatsapp,笑得好開心咁。

Alison 開始更加不安。

佢地結婚七個月之後,BB 出世。

BB 出世兩個月之後,Alison 經短訊同我講,佢,決定離婚了;小朋友會交比老爺奶奶嗰邊照顧。而佢個短訊最後一句係……

「我有時會好後悔,當時無聽妳講揀 A 君。」

佢離婚嘅原因,我並唔知道,亦無再追問,因為 Alison 經短訊同我交代完之後,話自己想諗下「下一步人生應該點做」,不過呢一年黎,佢都無再現身喺我舖頭了。

今日無意中諗起 Alison 嘅故事,唔知佢今時今日過得好唔好呢?

 

【塔羅牌個案分享】

後生女教友畀已婚傳教士搞大個肚唔認數

「我想分手,佢話唔好,不如去開房;然後我覺得佢仲愛我」

你話想生仔我咪唔避孕囉,我家下有咗你就叫我落?

著名大學 Year 1 學生問「我點先可以做到 Hall Queen」

名校老師婚外情的故事

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

睇完文有嘢想講?入嚟Gööp嘅「輔仁文誌」社群講兩句啦!可以匿名發言﹑即時睇文,輔仁專屬嘅討論空間。

即上iOS App Store/Google Play下載「Gööp」手機程式,碌緊手機嘅讀者可以立即開啟
註冊成為用戶後,輸入社群邀請碼: vjmedia 即可加入,入面見!

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。