為甚麼香港人不用國產行動支付系統?

 

 

早兩天,在新加坡的朋友對我說:「我聽返你節目,你分析『手機支付』果部份,真係令我諗返,我呢幾日係呢度有冇用過現金。我坐車係用grab 同 uber既,我食飯就用卡。我冇用過現金。後尾,有個丹麥既同事同我講,話佢地都冇用現金好耐……」

為什麼香港人不用手機支付呢?不如你睇下,我2018年2月果陣,為 903國民教育寫既稿?

係呀,我係有稿架。仲係full script添。

每個星期,大概5000至10000字。

 


 

 

新年流流,有冇打牌先?

有冇番睇果d好多年前既電影先?

又有冇睇新戲呢?我估,新戲,大家都冇睇啦,只不過,只要電視上又出現「呢套戲」既話,我估,你都會乖乖地咁坐低,靜靜地咁睇晒佢。又或者係,打住麻將咁睇。

過年,大概都係咁既。因為,大家都知道過年大家都唔係好睇電視。而唯一可以同電視、手機同埋平版電腦鬥既活動,就係打牌。

最緊要既,都係有d聲既jei,係咪?

你仲睇唔睇電視既呢?

 

 

電視既功能,大概就係話畀我地知,除左人聲、麻將聲之外,仲有少少唔同既聲,係可以襯住個熱鬧氣氛。

畢竟,過年,大家要既都係一d氣氛野。

有一日,我睇住d朋友打左幾圈啦,之後,原來大家都唔計錢架啦。而家呢,佢地都用咩找數呢?原來,係用手機支付程式。無論係香港製造既payme,或者係大陸既支系微系支付平台,原來大家都唔用現金。

男聲:起~~~ 果幾廿牌婆larr 數,又要找碎銀,邊度黎咁多碎銀丫。你又冇個八達通機畀我嘟。有呢個野咪幾好囉。黎黎去去都係幾百蚊上落數。

手機支付系統,似乎是大勢所趨。而呢個亦都係現金、支票、信用卡以外,似乎係第四波既消費革命。大家都話,消費越黎越簡單,就會刺激消費。以前,作家林燕妮小姐就講過,點先會令你使少d錢呢?只要你所有野都用現金買,就會覺得唔想買。你諗下,去h 字頭的大品牌店,要你買一個手袋都30000蚊,你會唔會拎30張一千蚊出黎數?數果一下,你有冇心理負擔?但如果你用卡既話,大家都會話,個感覺冇咁大。而且,佢仲有好多咩分期,好多人都會覺得咁樣消費,可以動用既「金錢」既可能性,就會高d。

 

 

但係香港,手機支付系統,反而就唔係咁盛行。而有好多人,最近,有好多機構都用各種方法去引香港人用。好似美式快餐店都會叫人食野,25蚊個餐,可以畀返10蚊你,變相六折,都有好多人搞。但點知呢,原來你用左之後,縛定左信用卡,仲有身份証,有人話,唔會cancel 到既。而且,你用完果一次之後,原來都唔會有其他地方,再用第二次。

男聲:所以我細佬就中左伏啦,畀佢縛定左張信用卡,仲畀埋身份証佢添。

係咪中伏呢?我唔知。但我肯定既係,我地未來既生活,應該會越黎越少見到現金既。

好似我平日咁,出入好多地方,都唔使用現金。除左坐的士之外。我平時食飯,係中大飯堂,我會用八達通。係出面買零食,因為想儲miles,所以都係用手機既信用卡支付系統。唔理你係android pay 定係apple pay。都係用個手指或者用返面用對眼去畀錢就得。當然,前設係你月尾會找數啦。所以,大部份時間,用現金,都係篤魚蛋或者街頭小食先用到。

但係呢,原來你只要返過一次大陸,而家唔用手機支付平台,似乎咩都做唔到。所以呢,而好多陸客黎到香港,都好唔習慣用現金。

有一次,我係銅鑼灣一間鋪頭食魚蛋粉。呢間鋪頭只收現金,而有一個國內的遊客,一個姐姐仔,佢都應該有點小錢既。因為佢用既係h 字牌既新手袋。而佢不斷咁問店員,

女聲:(國語)可以刷卡嗎?可以支付寶嗎?不行?那好,你先下單,我去提款。

點知,個老闆同佢講:你食左先啦,之後先黎畀錢啦。果幾廿蚊,你唔會走左去既。

個姐姐仔一臉愕然,佢好似體會到佢人生好少體會到既一件事,係店家,竟然相信食客既信任。

信任。呢樣野,又值幾多錢呢?

但去到呢度,大家就會問。點解香港冇手機支付平台呢?係大家唔肯搞,定係點呢?

我係東京既時候,係唔使拎八達通,即係日本果張suica 出黎既。因為,只要我用手機,登記左,張卡就會係我手機入面,而且要增值呢,仲唔使排隊,只要用信用卡畀就可以啦。

而係香港呢,你就會發現,大家拎住個手機,之後就會張張八達通放係個手袋入面,然後係個入閘機度係咁磨係咁磨。再唔係呢,就係有d遊客,佢唔知點解唔會識用八達通既。咁我明白既,香港既野佢地用唔慣,都唔出奇。但,手機支付,係咪真係咁先進呢?

拜年既時候,同d朋友傾計,佢地話,好唔明d新一代,點解咁抗拒大陸發明既手機支付系統。佢話:

女聲:仲有d人話,因為大陸落後,所以手機支付先變得先進。呢個邏輯,我真係有d唔明白。

呢個邏輯,你明唔明呢?畀一首歌時間你諗下。呢個世界,有冇d先進既野,因為你好落後,所以會被發明既呢?

我重覆一次,呢個世界,有冇d先進既野,係因為你好落後,所以先會被發明既呢?

咩叫做「有d先進既野,係因為你落後,先會被發明呢?」

唔明白,都好合理既。因為香港人,慣左二分法。點解我地唔用開手機支付呢?有好多原因。先講下,d台商點理解大陸既手機支付系統丫?最近,有一個台灣網友就係一個討論平台度講,話佢對台灣既手機支付系統,冇大陸咁先進,有d意見。

男聲: 我是一個在中國(China)做左十幾年野既台灣人,天天在用微信支付和支付寶。

據我觀察,中國(China)人愛用支付寶實在是有不得已的原因的。
一、提款機密度不高:不是到處都有便利商店、便利商店裡都有提款機,也不是到處都 有銀行。
二、跨行提款手續費太高:唯一沒有手續費的手機提款,只有「同樣城市的同一間銀行」,同一個城市內的不同銀行之間會收你2~4元人民幣的手續費,相當台幣9至18元,係台中,飲一杯珍珠奶茶,都只係25元台幣咋啵。如果你去唔同城市呢?手續費,係按交易額既百分比黎收既!你冇睇錯,係百分比啊。即係話,假設我而家唔夠現金,從上海又急住要去北京出差,身上就只有一張提款卡,要拎5000人民幣去北京周圍既張家口,有一個叫祟禮既地方滑雪。好多時雪場既抵押金,只收現金既,咁我拎5000蚊,會畀人收幾多錢手續費呢?係50蚊人民幣,即係225台幣。

你係我,你會唔會想有「其他」消費方式呢?呢兩年,中國先畀visa 同埋master 入國,之前係台灣申辦既信用卡,全不能用。對中國人黎講,佢地以為「銀聯卡」,就係碌卡。但其實唔係,銀聯係現金卡。而且係大陸,幾年前都唔係每個地方可以用。所以,係呢種情況下,手機支付,變成左最方便,成本最低既野。一下子,就流行起黎啦。

點解手機支付會流行起來?
三、提款機太爛:China各地的提款機經常會吃卡,我去年十一月就親眼看見我朋 友卡在我面前被吃,打電話求助客服一點屁用都沒有。
四、假鈔太多:
往年逢年過節我得代表公司去「潛規則」某些重要關係人時,經常會發生領了一堆現金結果裡面有假鈔的事,結果還得自備驗鈔用的筆,這種事情也不是一次兩次了。
五、水電費、手機費等日常生活的費用全部都不能直接銀行按月扣繳。所有開通手續,必須要全部都先預繳,水、電等要先存錢在水卡、電卡裡,手機也必須先預繳,阿用得久了會產生「信用額度」,可以讓你 欠多一點再繳,但一樣是餘額沒有了就會直接給你切斷。

中國地方這麼大,人這麼多,如果像台灣一樣「先使用後付款」,那就「絕對收不到錢」。聽中國當地老一點的人說,以前有些地方的確有試行過「先使用後付款」,可是被派去收款的人有被打 的,有被趕出來的,根本收唔到。結果,中國各種生活費用的「預繳制度」是針對十幾億的「刁民」最適用的辦法。用手機支付可以直接在網路上買通話費、流量、儲值水電費,讓你要繳費時(既然不能先使用後付款),可以有個方便的管道,好歹比去電信公司、電力公司、水公司等地繳費來得方便,因為 ,阿你以為可以像在台灣一樣「直接去seven繳費」哦?抱歉,不可能。所有最方便的繳費方式就是透過手機,利用行動支付啦!

中國只是因為中間層的基礎建設缺乏,所以才直接用「行動支付」蓋過一切,創造出一個「方便的假象」。
就像,中國很多地方其實是沒有室內電話的,就因為沒有鋪好線路。為什麼?中國的不少大城市其實都是2000年左右才開始慢慢有實體電話線路的,這種情況下,當然是直接用GSM系統的行動電話比較快。

六、我呢個台商,剛到中國時,已經是十多年前的事了,那時很多銀行都還不能「跨行取款」哦! 就是,你在同一家銀行的A分行開了戶,是不能去3公里外的B分行提款既!
後來,我辦了一張帶有「銀聯」(銀行聯合支付系統)功能的提款卡,才能夠在別的銀行的提款機取錢。現在不知道在偏遠地區的銀行是否還有人在使用沒有「銀聯」功能的提款卡。

七、最最最最最嚴重的問題:「鈔票與零錢的設計有問題」我如果要帶「一萬塊的人民幣」(100張百元鈔)是厚厚的一疊,你要是要給人十萬塊現金,那就要用不小的紙袋裝。阿同值的日幣只要16張萬元鈔(福澤諭吉),很薄很薄。同值的台幣(45張千元鈔)也只有一半的厚度。所以要攜帶時實在太不方便了。
咁平日,使錢呢?大部分國家的貨幣,都是「同樣面額的只有紙鈔或硬幣單一一種」,但係人民幣是「有些常用的面額紙鈔和硬幣都有」!即係話,你會在你那個放人民幣的錢包裡面同時找到一元紙鈔、五毛硬幣,也還會見到一元硬幣及五毛紙幣。

然後,由於中國太大,不同地方的物價以及通貨比率都不同,舉例來說,我明天要去北京旁邊的張家口的崇禮滑雪的話,假如全部都帶現金,租車渣,抵額金用支付寶,就要3000元 去張家口或北京到內蒙古的雪場的話,買東西、吃飯,你就會找到一堆亂七八糟既散紙。

但如果你係北京,由五環入三環,百元紙幣就會用得好快。在其他地方不小心錢包就會被廢物一般的小零錢塞滿,貧富差距太大的結果就是這樣。

所以我的錢包中究竟是要多準備些百元鈔?還是多放點零錢呢? 結果,手機支付,就最方便。

這時我就會感謝科技的進步了。

但是,你諗深一層,係台灣,有冇需要考慮咁多事呢?沒水飲?隨便走幾步路就有便利店,連清境農場果種山區入面都有。而身上沒帶錢既話,入左便利店一定有提款機。

要搭捷運?悠遊卡拿出來刷就好啦!還可以在便利商店買東西用。 在中國要用儲值卡搭地鐵?你要先搵到人手的儲值櫃檯。像日本或台灣一樣用機器儲值?唔方便,亦都唔多。而好在因為有警察係度,所以儲值櫃檯錢的人,仲會排隊。 要買單次買飛?得既,首先你要有散紙。咁去邊度換散紙呢?身上如果沒有現金,提款機可以係好遠好遠既。呢個時候,手機支付就好重要啦。

講到尾,點解中國既手機支付行得咁快?就係因為佢地既「中層基礎建設」做得唔夠好。結果手機一出現,就可以解決晒幾乎所有問題。

就拎「滴滴打車」呢個app黎講。我覺得,以前係中國,你打車,用電話係叫唔到既,錶係會亂跳既,司機係會亂兜路架啵。有各種問題,相關從業人員質素差,而有呢個「快速解決方案」。所以,手機支付,唔一定係先進。佢既普及,只係話畀你知,佢地既「日常中層所需的基礎建設」越做得差咋。

當然,都有人反駁既。因為,佢地覺得 微信支付呢d咁既app 真係可以幫到好多人。好似我有一個係大陸工作十幾年既朋友就同我講,佢話佢係大陸,覺得微信呢個app 真係超厲害而且好方便。

佢話(女聲):大陸提款機遍佈商場百貨公司,通常是幾大銀行的機器都有,悉隨尊便,而且提款卡銀聯付款早就可以共通;大陸紙鈔最大一百面額,沒有人帶幾千塊錢出門的。大陸超市一般幾分或者一兩毛錢你沒零錢可以不收,有時候幾分一毛不找給顧客也沒有人發難,因為大部分人都佔過便宜。而手機支付,就有一個好重要既好處,就係「純粹是唔使帶太多錢所以鼓勵了隨時消費,包括送外賣甚至送藥上門,都可以微信搞掂。你話大陸落後?係香港,如果你半夜唔舒服,你又冇男朋友既話,你肯定冇人會半夜送藥上門畀你啦?微信就可以解決好多問題啦。

究竟點解,香港又唔會咁易行到手機支付系統呢?

問題係,我地既中層建設,做得好好。

首先,信用卡好普及。幾乎大學生一入大學就已經有信用卡。佢地好習慣都會用卡。同歐美地區或者大陸唔同,歐美地區,學生多數係用debit card,即係現金掛帳卡之類既野,唔會係信用卡。而同時,由於信用卡方便,所以我地又會用蘋果手機既手機支付平台。

而同時,我地好早已經有八達通,佢同suica 呢d 為左坐車方便既儲值卡一樣,其實都係一種電子貨幣系統。呢d咁既團體,係香港,我會理解為「既得利益者」。而既得利益者做生意既方法,係一定會避免新競爭者加入,從而鞏固自己既地位。好似係日本咁先算,其實好多汽水機,都會接受手機支付,但香港就只係現金同八達通。因為八達通係首先加入呢個市場既唯一儲值卡供應商,所以,佢地可以同汽水機公司合作。而裝左之後,其實汽水機公司,係冇誘因去改變佢地既機器,去畀一個冇畀過普數佢地既支付平台既。點解要我投資去就你既平台,賺左既錢又唔係分畀我呢?

其實而家一般自動販賣機只要本身有mon有連線, 改少少program 就可以支持多幾個平台。而八達通呢?就要改硬件。你可以反對大陸既手機支付, 但唔好成日仲抱住覺得八達通仲係好好無問題呢個諗法,其實就有d笨既。

而同時,手機支付,已經進化到一個地步,係大陸既城市,係你冇左佢唔得。本來,

有網友就話:

女聲:手機支付只係其中一種方便嘅支付模式。不過某國想推推銷佢變成唯一,透過手機容易監控嗎!其實,去英國等地方旅行時,人地主要用debit/credit俾錢買嘢,甚至AA分單俾,咪一樣唔使帶現金。
男聲:只因為信用卡不盛行,要用以充值付款卡代用之,最重要是公安實名制,每個人經濟能力,行縱等私隱等,全部實時上載公安.可以實時捉人及凍結流動現金.
女聲:冇錯係好方便啊,方便到依家直頭壟斷,係大陸冇微信或電話號碼連free wifi都上唔到,上淘寶可以搞掂所有野。當你想轉其他都轉唔到
咩叫監控呢?

阿oscar呀,扮住你女朋友先得唔得?

o:喂我唔玩呢d架啵。
健:扮住先啦。
o:好啦。

拿,假設,有一日oscar用左汽車既自動繳費系統,去左機場,兜左個圈。而我係女朋友,佢係唔知既。於是,我就係果個自動繳費系統既單呢,係由我去找既,我就會問佢啦。

健:咦:你上星期唔係話去旺角睇玩具架咩?點解會有個數,係青馬大橋既?你入左機場黎咩?
o:係咩?冇呀。
健:哦?唔通信用卡公司搞錯左?等我問下先。
o:哦~~~ 我記得啦,我之前有個朋友同我係日本呢,買左d玩具,咁佢落機叫我車佢,我去左機場接佢之嘛。(心虛)
健:哦?你講阿風呀?你車左佢返屋企?佢又話同我食飯,食極都食唔到。
o:係呀。佢armarm 返黎之嘛。
健:阿風住馬鞍山架啵。你同一晚冇用過尖山隧道咩?冇呢個數既。
o:哦,我過尖山果陣,我有散紙啵咁arm,我……我畀左現金之嘛。

拿拿拿,oscar,你話係咪出事呢?
n:喂呀,邊有人咁蠢先得架。要真係偷食呀,都唔會去東涌,或者直接渣車啦。你有留底,一定會好易畀佢check 到架。
健:咁又arm,如果佢真係想同你一齊既話,事實上都唔會好似我咁,問到咁細緻。反正女人都明既,男人去玩,你問佢,佢仲肯講大話,而你又扮拆唔穿佢,關係就仲可以存在。如果唔係,大家都真係收得工啦。咁你有冇畀人拆穿過jei?
n:eee~~~ 講呢d,恭喜發財~~~~

消費既時候,如果你留底既話,係有好多唔同既可能性既。我唔敢講係危險。好似,有人同我講,只係係google search 過一d 體育運動品既野呢,面書同埋其他網站既廣告,就會自動咁畀一d 體育用品既廣告你。有d好笑d既係,有人search ua 戲院,就出左運動品牌 ua 既廣告。一般黎講,呢d 行動同消費模式既分析,都係一d 重要既資料,等商家可以賣廣告畀你。

而如果佢只係賣廣告畀你,你已經好彩。因為,如果中國將來真係要建立一個叫「社會信用系統」,只需要微信或者支付寶一個app,已經可以知道你既消費模式同行動習慣。比如,你平日係點使錢既呢?你用幾多時間係手機買野?你幾點住地鐵。你會唔會打車,即係坐的士?你一個月大概會出街食飯幾多次?睇幾多次戲?會唔會去商場既時候買下珍珠奶茶?你出街食飯既時候食既野係咪健康既呢?你幾點訓覺?你平日會同幾多人傾計?傾d乜野?會唔會同屋企人傾計呢?

如果你平日買既係家庭用品,好似紙尿片等等既野,咁社會信用系統就會理解你係一個有家庭既人,對你會投放多d信任。但如果你係一個成日係網上買安全套,性玩具既人,咁又點呢?你既微信既朋友,會唔會都係冇著衫既戶口,講埋d調情說話呢?咁,個系統大概就知道,你係一個咩性取向既人。

係咪咁恐怖呢?

我只可以話,如果所有資訊,都畀晒同一個機構,而呢個機構又可以追縱你既行動,你既消費,你既生活,你既感情,你既人生,咁呢個系統,係咪可以令你活得好舒服呢?係呀,佢係連你深夜要藥,都可以用個app 叫人買畀你。仲可以用個app 去叫周圍如果整多左野食既人,去送到你府上。一切,都好似好方便,但一切,都被記錄。你,又o唔ok呢?

大部份人都同我講,話我呢套論調,係大陸,係冇意義既。因為,生活冇左手機,已好唔方便。我係上海工作既時候,我試過畀的士司機藐左我一下。佢覺得用現金對佢地黎講,反而係唔方便既。

我理解既,個世界要向前行,我地呢d 局外人,好難會理解佢地點解會咁樣。而事實上,我地應該好清楚知道,中國已經大到一個地步,你要同佢有關係,就要有呢個追蹤你一世既支付系統。簡言之,係一人一個手機,一人一個追縱器,我們活得很好,很好。

 

 

關於作者:健吾

健吾
宣揚仇恨一點也不有型。這個世界,幸好還有愛。健吾專欄作家、記者、編輯……商業電台節目《人民大道中》、《903國民教育》、《光明頂》主持,香港中文大學日本研究學系講師。著書超過十本,最新的是《日本亂象》(北京人民大學出版社)、《100個在情場止蝕離場的理由(上))、《京都--貼近生活之旅》(圓桌精英出版)、《健吾收音機III——說好的幸福呢?》(CUP出版)等等。email:[email protected] |Facebook: facebook.com/kengopage |微博:t.sina.com.cn/kengowrites

我有回應

則留言

閱讀後覺得好,請多多讚好及分享~:)

其他熱門文章

  • 如果你令女兒相信自己係公主…… by Dr. T
    我們先不要討論好男仔存在與否,姪女我見過,全面每部位都有幾粒暗瘡另加單眼皮/扁鼻/冇眉娘呢個組合相信好難歸類為大美人。特別的地方是姪女非常了解自己是叻女這個道理,所以亦對號入座地認為自己不是張愛玲就是林燕妮,最愛用organic香薰油自硏手…
  • 劣質調情 by 文士琛
    當初我一直以為他們都是單身的。為什麼?因為他們每天都在肆無忌憚地打情罵俏。我公司陰盛陽衰,眾女的焦點都落在一個叫阿臣的男同事身上。阿臣二十多歲,外形普通過普通,而他的確是那種日夜碌著手機追趕潮流玩意一有空就睇波賭波的典型港男。作為一個adm…
  • 「我老豆叫我delete左個facebook account」 by 宇治金時
    「老豆其實都係一個月前先知道有facebook呢樣野。佢根本跟唔到個時代,更加唔知我諗乜,或者呢d就係所謂既generationgap啦,唔了解,唔願意去了解,郁d就想將d野由有變無,佢話無左就無發生過,即係唔存在喎。煩野點可以唔存在,唔s…
  • 【辦公室之男親女愛】如果有人匿名打上公司 HR 爆料揭發奸情,你會點做? by HR 扮工週記
    話說有一日小編收到一個電話,電話另一邊嘅男人自稱係匿名嘅爆料男。佢話公司嘅家英哥同道德妹有奸情,仲話家英哥已經有家室,係唔應該咁做,所以想我哋人事部阻止佢哋繼續錯落去,仲話家英哥個老婆都知道左,隨時會上黎公司捉奸………
  • 偷食的人有難了:我用GPS追蹤男友(一) by B612
    從來都唔會主動講密碼俾我聽,就連喺我面前解鎖手機都會遮遮掩掩。唔係身有屎嘅,怕咩俾人知?佢越係神神秘秘,我就越覺得佢想要嘅,唔止係私隱咁簡單。果然,一齊咗未夠兩年,就發生咗一連串令我哋無辦法繼續一齊嘅事………
歡迎讚好我們的facebook page,免費資訊源源送上。